Geru Jesucristo Giti Mateo Nu Chada Degaba
San Mateo
Kwian onbre chada ai deganga kadakle Mateo amaña kadakle Leví. Mateo bebi chage Jesu ole Jesu gerua jwen gire ama igi ganga daba israelita nage chugagwalla kweri emperador nga Romamu alin. Jesu Mateo gau chage geru jwen Jesuge ule kwian na gdataboko giti gdaite ole, gire Mateo lle bo ngeru chugagwalla alin igi gai chugu ngwadi.
Mateo chada ai degu mo bitalla israelita alin Mateo Jesu keruchugu mo ologe giti kaire Mateo gwagedu mo gwagwa giti Jesu agedu giti, e giti Mateo chada ai degu.
Unsuialin tangle Chube geru gbu egdage kwian israelita ole Chube be kwian gdaite kage kwian israelita jwanngale siere ji chugege agedu me no gdale, kwian gdaite e be chege kwian israelita Chugagwalla kweri. Chui ege gwangerugu kwian israelita ulita mo ta gbu kwian gdaite e manade ngwange. Kwian israelita kwian e ka gbu mo kwirale “Mesías”, ka e kle gerule kwira griegole “Cristo”. Mateo chada ai degu israelita ulita ta gbagda ama me Cristo manadale ngwange dare, Jesu amaña Cristo chkubi, Chube ama kagubi Chube geru gbu unsuialin tangle kare.
1
Jesucristo enusulian unsuialin kalla
kle degaba chada giti
Cha chada ai dege ulita Jesucristo giti, Jesucristo David oindalla, David kwian israelita enusulian unsuialin oña chugagwalla kweri, kaire Jesucristo kwian israelita enusulian unsuialin oña kada Abraham oindalla. Jesucristo enusulian unsuialin oña ulita kalla kle ai kare:
Abraham kirolla Isaac, Isaac kirolla Jacob, Jacob kirolla gdataboko giti gdaboke molen, ama gdaite kadakle Judá, Judá kirolla gdaboke Fares kaire Zara, Fares kaire Zara chebia kadakle Tamar, Fares kirolla Esrom, Esrom kirolla Aram, Aram kirolla Aminadab, Aminadab kirolla Naasón, Naasón kirolla Salmón, Salmón kirolla Booz, Booz chebia kadakle Rahab, Booz kirolla Obed, Obed chebia kadakle Rut, Obed kirolla Isaí, Isaí kirolla kwian chugagwalla kweri David, David kirolla Salomón, Salomón chebia mo jun ngeru Urías ole, gire David muinga e junnga Urías ngeru chagedu ama ole, David kirolla muinga e giti ama Salomón.
Salomón kirolla Roboam, Roboam kirolla Abías, Abías kirolla Asa, Asa kirolla Josafat, Josafat kirolla Joram, Joram kirolla Uzías, Uzías kirolla Jotam, Jotam kirolla Acaz, Acaz kirolla Ezequías, 10 Ezequías kirolla Manasés, Manasés kirolla Amón, Amón kirolla Josías, 11 Josías kirolla tanre molen, ama gdaite kadakle Jeconías, Jeconías kaire Jeconías daballa ulita toidu suiale kwian israelita tanre dule skage nga Babiloniage.
12 Jeconías kaire kwian israelita na tanre dule skage nga Babiloniage tane giti Jeconías kirolla Salatiel manadu, Salatiel kirolla Zorobabel, 13 Zorobabel kirolla Abiud, Abiud kirolla Eliaquim, Eliaquim kirolla Azor, 14 Azor kirolla Sadoc, Sadoc kirolla Aquim, Aquim kirolla Eliud, 15 Eliud kirolla Eleazar, Eleazar kirolla Matán, Matán kirolla Jacob, 16 Jacob kirolla José, José María ñengulalla, María kirolla Jesu. Jesu amaña kada Cristo, Chube ama kagu kwian Chugagwallale.
17 Abraham oindalla bitataboko giti bitabagage tangle gire David, David oindalla bitataboko giti bitabagage tangle gire kwian israelita tanre dule skage nga Babiloniage. Ne suiale kwian israelita tanre dule skage ama ulita oindalla bitataboko giti bitabagage tangle gire Jesucristo chku.
Lle boanga nga ngaña giti chke gerule José ole Jesu giti
18 Jesucristo bebi menga gire boidu ene: María Jesu chebia ama mo chuia tku mo jwen José ole, María bebi chage ule José ole mo ñengula kare gire María chegu gaba Chube Oña kiralla giti. 19 Josége chku uñale María kle chage gaba agwa me José olia, José tañachugu María kle chage gaba onbre na ole malen José mo ta gbu me mo jwen María ole. José kwian no no, diali ama agenga no Chube takalin kare, José kwian ene malen ama me tadu agekalin me no María ole, José tañachugu mo tale gballa: “Cha mi mo jwen María ole agwa cha mi gerule kwian na ole boidu giti María ole, cha mi María gbe jiske kwian na ulita gwa giti, ma no cha chege kamne.” 20 José kledu tañachuge age ene gire lle boanga Chube alin nga ngaña giti gdaite chku gerule José ole José kle gbe gire, gerudu José ole gbire: “José, ba David oindalla, ba me kennga María gai mo muirallale. Chube Oña chku Maríadi malen María be kirogwa molen, Chube mo kiralla giti kirogwa e gbu Maríadige, kirogwa e Chube Kirolla. 21 María be kirogwa onbre molen ama ka be chege Jesu, ama be mo bitalla ulita jwen siere ji chugege age me no gdale, malen ama ka be chege ene Jesu.” Lle boanga Chube alin gerudu ene José ole gbire.
22 Ai boidu ulita Chube gerudu kare kwian Chube gerua ketanga unsuialin kada Isaías ole, Isaías Chube gerua degu unsuialin, chada e gerule:
23 “Muinga biale me chageba onbre ole, muinga ene be chege gaba ama be kirogwa molen, kirogwa ka be chege Emanuel.”
Unsuialin Isaías Chube gerua degu ene. (Ka Emanuel e gerule: “Chube kle ule che ole.”)
24 José kledu gbe gire José chiu tachke gbeske, ama agedu ulita lle boanga Chube alin nga ngaña giti gerudu kare, José María gau mo muirallale, 25 agwa ama me toidu kwian onbre kle mo jwen kle toi kare ama María manadu sugekare moge ama me gbedu ule gire kirogwa chku María kote, José María kirolla e kimule ka gbu Jesu Chube gerudu kare.