Pablo Nu Chada Degaba Filemón Alin
Carta de Pablo a Filemón
Pablo chada ai degangu skatemanalla kada Filemón alin. Filemón igi molen tanre ama toinga una Colosage ama Jesucristo gerua ganga. Filemón nu kwian kada Onésimo gigaba lle boangale mau alin agwa Onésimo skwe bo Filemón ngeru kigedu Filemón ngeru Filemón llea ole. Onésimo jo chke una Romage, una ege Pablo kledu skage Jesucristo gerua dbe gdale. Pablo Chube gerua Jesucristo giti ketu Onésimoge, Pablo giti Onésimo Jesucristo gerua gau ulia.
Pablo chada ai degangu Filemón alin Filemón ta gbagda Onésimo giti, Onésimo me nge kare, Onésimo Jesucristo gerua gau ulia. Chada ai giti Pablo Filemón ta gbu Filemón mo ta dbadale no Onésimo ole Onésimo gai ngwange no naskuni mo ullage me lle boanga ama alin allabi agwa ma no mo ta gbe Onésimo ole mo daballanu kare Jesucristo giti. Chada ai giti Pablo Filemón ta gbu Onésimo agedu me no ama dollale talla mlienga me tañachuge dare Onésimo agedu me no giti. Pablo Onésimo kagu naskuni una Colosage Onésimo mauña Filemón kle toi ngwadige chada ai dbe Filemón alin.
1
Pablo gbi kage chada giti Filemón alin
1 Cha Pablo chada ai degange ba alin Filemón:
Ba cha skatemanalla no no ba cha chudaboanga Jesucristo gerua traganga kwian ole. Aini cha kle skage Jesucristo gerua dbe giti cha chada ai degange ba alin ule che daballa Jesucristo giti Timoteo ole. 2 Cha gdabonate gbi kage kwian ulita Jesucristo gerua gaba ulia alin kle mo lite ba ullage, kaire agwe ene cha gbi kage che ibotea Jesucristo giti kada Apia alin kaire che daballa Jesucristo giti kada Arquipo alin, Arquipo ama lle boanga Jesucristo alin ba boke cha chudaboanga no Jesucristo gerua giti. 3 Cha takalin che Ñenua Chube kaire che Chugagwalla Jesucristo age no ba alin kaire nga suga no gbe ba tale.
Nga suga no Pablodi Filemón giti
4-5 Chage chku uñale ba kle che Chugagwalla Jesucristo gai dage tañachuge ulia ama ñage age no ba alin kaire ba no Jesucristo ole kaire ba no kwian ulita Jesucristo gerua ganga ole. Malen cha gerule Chube ole gire diali cha tachke bage kaire cha gerule ba giti: “Chube, noare ba Filemón ta gbu age no ba takalin kare. 6 Cha gerule ba ole, ba ama ta gbe ba gerua Jesucristo giti kete dare kwian na gdaite kaire kairege, ene be suge trate mo tale amage Jesucristo giti ba diali kle age no cha ulita alin.” Cha kle gerule ene Chube ole ba giti. 7 Filemón, chadi nga suga noare ba giti ba kle mo ta dbe no diali daba ulita ole, daba Jesucristo gerua ganga ta olire gire ba kle daba e ta gbe nga suga no ole.
Pablo takalin Filemón lle boanga ama alin kada Onésimo gai ngwange no naskuni mo ullage
8 Nga suga noare chadi ba giti agwa cha geru tragakalin gbaite ba ole. Cha Jesucristo gerua ketanga malen cha ñage ba ta gbe ba agedale giti. 9-10 Cha kwian juma nege cha kle skage Jesucristo gerua dbe giti. Cha no no ba ole, cha gerule ba ole ta no giti lle boanga ba alin Onésimo giti. Cha Jesucristo gerua tragu Onésimo ole gire Onésimo Jesucristo gerua gau ulia, nege ama cha kirolla kare Jesucristo giti ama Jesucristo gerua gau ulia aini cha kle skage ngwadi.
11 Jondege Onésimo lle boanga ba alin ama agedu me no ba ole agwa nege gwangerugudba Onésimo ta me nge kare, nege ama ñage chege che gdabonate chudaboanga no no Jesucristo gerua giti, ama ta jwlitedu nege ama kle mo ta dbe no Jesucristo ole. 12 Cha Onésimo kageni naskuni ba ngwadi cha takalin ba ama gai ngwange no ba cha gai ngwange kare. 13 Cha kle aini skage Jesucristo gerua dbe giti cha tañachugu ma no cha Onésimo gaida aini ba kle cha ole kare cha tañachugu Onésimo gai ba giti tangle. Agwa cha me ñage tañachuge cha ama gaida aini cha takalin kare ma no cha ama kageni ba ngwadi. 14 Cha me agekalin skwlenre bage, cha takalin geru Onésimo giti chkedale uñale bage ene cha takalin ba age ba takalin kare ba kle cha chudaboi giti, cha me kle ba kage, cha alin no ba age mau tale ba takalin kare cha alin. 15 Uñale chage chui gweale jo tanglege Onésimo kigedu ba ngeru jo siere ba ullage, chage suge e boidu ene, ene nege ama ñage jogeni toini ba ole chui diali dale alin, 16 me lle boanga alin allabi ba alin agwa ba ama gadale mo daballanu kare Jesucristo giti ba nodale ama ole, ene chege ma no ba alin. Cha no Onésimo ole kaire ba mo ta dbadale ma no ama ole, me tai dage amage mo chudaboanga kareni allabi agwa ba mo ta gbale no ama ole, ama ba daballanu Jesucristo giti.
17 Filemón, ba kle gerule ba kle cha gai mo daballale Jesucristo giti, ene kaire ba Onésimo gale ngwange no ba cha gai ngwange kare. 18 Cha gerule ba ole ba tañachuge Onésimo agedu gweale me no ba ole kaire jiske bage lle gweale giti, ba ñage lle e ñanalla kade chage cha be lle e ñanalla kete bage Onésimo giti. 19 Cha Pablo cha geru ai dege agali ba alin Filemón mo ko giti, cha gerule ulia ba ole Onésimo jiske bage lle gweale giti ba lle e ñanalla kade chage cha be kete bage ama giti. Kaire cha ba ta gbe chke ba kaire jiske chage ba Jesucristo gerua gau giti, cha giti ba Jesucristo gerua keruchugu ba Jesucristo gerua gau ulia. 20 Cha daballa Jesucristo giti Filemón, ba Jesucristo gerua gaba cha kare, cha takalin ba cha ta gbe suga no ole, ba cha chudaboadale age no Onésimo alin, ba Jesucristo gerua ganga no malen ba agedale no Onésimo alin.
21 Chage suge ba be age cha gerudu kare malen cha kle chada ai degange ba alin, kaire uñale chage ba be age ma no Onésimo alin cha geruduge. 22 Kaire agwe Filemón, ba nga gweale ba ngwadi gbengwa gbe biale cha ngwange. Uñale chage ba ulita Chubenu kle gerule Chube ole cha giti Chube kwian ta gbe cha skajwennga, ene cha ñage joge basale badige. Ba ulita kle gerule tanre ene Chube ole cha giti, malen uñale chage Chube be cha chudaboi ene cha be jogeni ba ngwadi gwageni ba ulitadi.
Pablo gbi jige bdagli chada ai giti Filemón alin
23 Che daballa Jesucristo giti kada Epafras kle cha ole ule skage Jesucristo gerua dbe giti ama gbi kage kaire ba alin. 24 Cha chudaboanga Jesucristo gerua traganga kada Marcos kaire Aristarco kaire Demas kaire Lucas ama ulita gbi kage ba alin.
25 Cha takalin che Chugagwalla Jesucristo age no ba alin ba manade no.
Geru ai ene ulita cha Pablo chada ai degangu ulita ba alin Filemón. Che kle meni.