Pablo Nu Chada Degaba Tito Alin
Carta de Pablo a Tito
Pablo chada ai degangu kagale ama skatemanalla kada Tito alin, Tito Jesucristo gerua keruchugu Pablo giti gire ama Jesucristo gerua gau ulia. Tito chagedu ule Pablo ole Pablo chudaboi Jesucristo gerua dbe nga gwealege, bitaboke Pablo Tito kagu una Corintoge daba Chubenu una emu chudaboi Jesucristo gerua giti, kaire bitaite Pablo Tito jigu ngadrega bleske kada Cretage kwian Chubenu eni chudaboi kaire kwian gweale gai daba chugagwallale una kaire kairege nga Cretage.
Pablo chada ai degangu Tito alin kagale Titoge nga Cretage. Nga ege kwian tanre kledu chage geru me ulia dbe, kwian e gerudu ama kledu Chube gerua Jesucristo giti ulia dbe agwa me ene dale, ama me kledu chage geru ulia dbe ama kledu chage geru mau tale dbe kwiange. Chada ai giti Pablo Tito ta gbu kwian ene giti, kaire Pablo gerudu Tito ole Tito kwian nga Cretamu ta gbadale toi no trate me geru ngwale gai agwa diali Jesucristo gerua alin gai ulia. Kaire chada ai giti Pablo Tito ta gbu kwian tke tangle trate Jesucristo gerua giti.
1
Pablo gbi kage chada giti Tito alin
1 Cha Pablo chada ai degange ba alin Tito:
Cha kwian lle boanga Chube alin, cha kwian Jesucristo gerua ketanga. Chube nu kwian gaba Chube gerua gai ulia, Chube cha gau cha gbu kwian ene ta gbe Chube geruadi, Chube cha gbu kwian ene tke tangle Chube geruage, ene kwiange chke uñale ama chagedale mine Chube takalin kare, 2 kaire kwiange chke uñale chui be chke gire kwian Chubenu ulita be toi diali chui tangle Chube ngwadi Chube ole, kwian Chubenu ulita kle chui e manade. Ngeru ngeru Chube bebi nga dba ai ulita dodade Chube bebi kwian dodade gire Chube gerudu: “Kwian ulita bai cha gai ulia be toi diali chui tangle cha ole.” Chube gerudu ene, Chube me sodu, Chube gerule ulia diali. 3 Chube gerudu ngeru chku uñale chege chui gwealege Chube chui gbu kare. Chube che jwannga siere ama tale ama cha gau, ama mo gerua ketu chage gire ama cha kagu ama gerua trage kwian ole ulita. 4 Cha chada ai degange ba alin Tito, che boke Chubenu, cha kaire ba Chube gerua gau ulia mo tale, kaire ba cha alin ba salengwli cha kirolla kare. Cha takalin Chube che Ñenua kaire Jesucristo che jwannga siere ji chugege age me no gdale ama age no no ba alin ama ba ta gbe suga no diali.
Tito lle boi Chube alin nga kada Cretage
5 Tito, che kledu ule nga kweri kada Cretage, che lle bo ule Chube alin, lle gweale me chegu dodaba ulita no, malen cha ba jigu nga ege ba lle ulita boadale no, kaire ba kwian Chubenu chugagwalla gbadale una kaire kaire cha gerudu ba ole kare. 6 Kwian Chubenu chugagwalla ai kare gbadale: Kwian Chubenu chugagwalla chagedale no trate kwian ulita gwa giti, ene kwian me ñage gerule me no amadi. Ama toidale muinga gdaitre alin ole. Ama kirolla Chube gadale ulia, ama kirolla chagedale no trate, kirolla ñenua kerua gadale dage age ñenua gerule kare, ene kwian na me ñage gerule me no kirolladi. 7 Kwian Chubenu chugagwalla, ama kwian lle boanga Chube alin, malen noare kwian ene chage trate no kwian ulita gwa giti. Ama me mo gbadale ma no ma kweri daba nage. Ama me kwian ta skochienga. Ama mo ta gbe me lle gage janga me chage llale. Ama me kira batanga daba ole. Ama me tañachugadale igi gai lle giti ngwale daba ngeru. 8 Ama daba basanga gadale ngwange no mo ullage. Ama kwian agenga no diali, ama no age no ole. Ama me mo chugadale ngwadi age me no sidri. Ama chagedale no trate Chube takalin kare. Ama kwian no Chube gwa giti. Ama mo ta gbadale age no diali me mo chuge ngwadi age me no. 9 Ama geru jwandale no geru uliage, ama mo ta gbadale geru e ulia gai diali, ene ama ñage kwian ulita tke tangle ñage kwian kira gbe geru uliage, kaire ñage gerule no kwian ole kwian bai kle gerule me no geru ulia dollale ene kwian gerule geru ulia dollale me ñage gerule dare. Ba kwian ene kare ulita gai gbe daba Chubenu ulita chugagwallale una kaire kairege nga Cretage.
10 Kwian nga Cretamu ngle gerule me no geru ulia dollale, ama kwian me no me Chube gerua gai dage, ama geru ngwale alin trage daba ole daba anblite geru ngwaledi. Kaire kwian israelita tanre kle daba anblite, ama gerule kwian ulita mo kwara tkadalenga sidri ene kwian chege Chubenu. E me ulia, malen noare kwian Chube uñe no no chege kwian Chubenu chugagwallale ene chugagwalla e ñage kwian ulita tke tangle no geru uliage. 11 Kwian gerunga geru ulia dollale, ama kle age me no, ba me ama chuge ngwadi daba tke tangle dare geru ngwalege. Ama kwian u gbaite tke tangle geru ngwalege gire kwian ulita geru ngwale gai ulia gire kwian ulita u ege joge siere geru uliage. Kwian daba tkanga tangle age kwian tanre ole ene u kaire kairege, ama tañachuge kwian tke tangle ene geru ngwalege ene ama igi gai ngle tke tangle geru ngwale ñanale.
12 Kwian gdaite ta molen nga Cretage, ama gerudu agali mo bitalladi: “Kwian nga Cretamu ulita diali sole, ama age me no diali, ama ulita kianle, ama tañachuge bligda ngle alin gute.” 13 Kwian e ta molen gerudu ulia mo bitalladi, kwian nga Cretamu ulia kwian me no kwian ta molen gerudu kare, malen ba gerudale no trate kwian nga Cretamu ulita ole, ba gerule ama ole ama mo ta gbadale geru ulia alin gai me geru ngwale gai ulia. 14 Ama me kwian israelita gerua unsuialin dodaba mo tale gbadale gdadi, kaire ama me agedale kwian israelita gerua gerule kare, geru e me Chube gerua, geru e kwian israelita gerua, kwian israelita geru e dodadu mo chugadi, kwian me Chube gerua gai ulia, kwian israelita gerua kwian ene gbe siere Chube geruage.
15 Kwian bai ta no trate molen, diali ama tañachuge no ama age no Chube gwa giti. Kwian bai me Chube gerua gai ulia, ama ta me no, diali ama tañachuge me no ama age me no, amage me suge kle age ulita me no, ama tañachuge kle age no. 16 Ama gerule ama Chube uñe, gire ama age nganake, ama age me no Chube dollale. Kwian ene gerule alin allabi me age ama gerule kare. Ama kwian me no, ama me Chube gerua gai dage ama me age Chube takalin kare, ama age me no diali, ama me ñage age no sidri.