12
Ena debamaia odena bedewe Noa otopa Sem damba bedewe Abram mulen.
Iawe God Abram apasan
1 Walama dea Iawe God Abram diene wanase, “Enawie tawoa, dana ita gombaa emoe ita bola ne waeuwaepo aie sape wana.✡Aposel 7.2,3; Ibru 11.8 2 Ita ne e dewaepo dana debamalepie uaralepi. Ita ne e dewaepo eboa debamalepi apana e saantopue wiwiraantopu ita e sau euda wadaana apana segaita. Ita e euda dewasana apana mampo.
3 Ita apana mida dewa euda e manawo dewasampa ne sau euda mo osouwo itupa.✡Galasia 3.8
Ita apana mida saua kadiwa e manawo wapua ne mo matangelamopa.
E eboawo apana uduudu tawo osowe waimoia ne euwana mo osouwolepi.”
4-5 Tane walama sawo Abram enawa 75 waden. Iawe God me diena rua me manainapa Sarai ita me wamba otopa Lot do bola debama Aran ene antoiena. Mo a baiwa nitu uduudu mo mampoa, pue ita do mo nolau dewala apanawa Aran bedewe waimoia do bola Kanaan bedewe anton.
Ita mo Kanaan bolawa enentudenawo wimone, 6 Abram ita me apanawa do nawane antone bola debama Sikem tampe bola More bedewe ia debama atowe saradounton. Walama sawo Kanaan apanawaida bola sa bedewe waimoie.*Tane bola Kanaan apanawa godiu lagawaau ia bumpe wadaposisampe wanwanla.
7 Ita Iawe God Abram mampe segalene wanase, “Ne bola ema Kanaan e nosinosia wanamopa.”✡Aposel 7.5; Galasia 3.16 Sa baiwa Abram wata dewasan pue pulolempe sumpaa baiwa, ipawa Iawe God me mampe segalen. 8 Ema aupe Abram alene wadi kerakera eneia bedeuwo bola debama Betel deneuwe ape wadene wain. Tane omo pamediawo Betel winede ita omo wiseidiawo sa ipa bola debama Ai winede. Sape me Iawe God wadaposisampaa watawa dewasane ita wadaposisan. 9 Ita ema aupe Abram wanriasalene aleidie bola Negeb bolawa bedewe wisen.
Abram Isibt bedewe aleide
10 Tane bola Kanaan bedewe omana debamaia segaleno baiwa Abram Isibtiwa alen walama kerauda os wampia baiwa. 11 Me Isibt bedewe odepia baiwaleidie manainapa Sarai diene wanase, “E i ewaewaa eudida. 12 Ita Isibt apanawa e eweepue wapuase, ‘Ema apa me manainapa, ita mo ne boneapue aupe e wadeepue mampoepu.’
13 Sa baiwa mo e dieempo waase, Me weanapa ne, mo epe etapue ne mainawo dewa euda dewasapue oniadewasaneapu ita mai boneapu.”
✡12:1: Aposel 7.2,3; Ibru 11.8
*12:6: Tane bola Kanaan apanawa godiu lagawaau ia bumpe wadaposisampe wanwanla.
✡12:7: Aposel 7.5; Galasia 3.16