1 Tane Abram enawa 99 wadeno Iawe God me mampe segalene diene wanase, “Ne ipa God Mukamukaua. E ne intanawo aitone mai pin ba wawu da bedeawo winepi, dia. 2 Ipawa ema baiwa ne sauana badowa e manawo itudina ita dewaepo e nosinosia uaraia segantopu.”

3 Abram imimpa emmisilene nitomaleidio God me diene wanase, 4 “Asisuitaa! Ne sauana e manawo dewasana: E ando dan daitada atanosiu segaita. 5 E dan daitada nosiu segaitaa baiwa tauma ne e eboa Abram*Ebo Abram Ibru aiawe ipawaida ipa mambu eboueboua. winedia ene leusane Abraam†Ebo Abraam Ibru aiawe ipawaida ipa dan daitada mambu. itudina.✡Rom 4.17 6 Ne e dewaepo nosinosia uarantopu ita do dan daitada e bedeawo segantopue warerentompa.

7 Ne sauana badowaida ne ita e nosinosia do manlawo itupo winakasalepi. Tane ne, e ita e nosinosia do Godila wananteapa.✡Luk 1.55 8 Ne Kanaan bolawa uduudu tauma osowe wainilana e ita e nosinosia do enalepa. Ita bola ema mo bolau wanalepio osowe wankasantopu ita ne mo Godiu wananteapa.”✡Aposel 7.5

9 God Abraam diene wanase, “Tane e ne sauana badowa wadaadoe ruawaitona ita ando e nosinosia saua sa ruawantompe waimompa. 10 E ema epe dewaite ne sauana wadaitudepi, e ita ne sawanambo. E ita e nosinosia mona uduudu ando muntompa ita mida e do wanlempa ete nonowa ideita dewasampa.✡Aposel 7.8; Rom 4.11 11 E ete nonowa dewawa dewasanuna sa ipa ne sauana badowa eueuwa ne ita e sawanambo ipawanasaitana. 12 Ete nonowa dewawa ema e nosinosia ando ita ando muntompa dewasampa. Oto mona muntopuo walama 8 wadepio eueuwa baiwa e ete nonowa dewawa dewasaa. Dewa ema e obana mampo ita nolaa dewalala obampu tane mo mida gimaramoia obampu do mampo deawaa dewasana. 13 Tane e bedelawoa muntompa ba apana mane mampe gimaramoilana ita e uduudu ete nonowa dewawa dewasanuna. Ita sa ipa ne sauana eueuwa e etela osowe winakasalepi. 14 Tane apana dainea ne sauana badowa eueuwa etepa osowe mai wineipona, apana sa ne sauana badowa ainpunden ita me awowa nambe wande.”

15 Ita God Abraam diene wanase, “E manainaa ebowa Sarai waiana ee Sara wana.‡Ebo ema nata Sarai, Sara Ibru aiawe ipawaida ipa warere anoopa. God Sarai ebowa sanaa wane ituna ipawaida ipa dan daitada inau. 16 Ne sauna euda Sara osowe itupo ita me oto mona gamosapi e baia. Ita do me dewasapo uwa daitada inau wanalepi, ita me bedewee mo warereu segantompa.”

17 Abraam imimpa emmisilene nitomalene ita nuawa bedewe oi wane insenase, “Apana enawa 100 wadena ambi oto wadepi? Ita Sara enawa 90 me oto wadepia rua, ba?” 18 Ita me God diene wanase, “Ne menanedia e sau euda Ismael osowe ituwo waimpa.”

19 Tane God wanase, “Sa dia, e manainaa Sara oto gamosapi e baia ita e me ebowa itua Aisak.§Ebo Aisak Ibru aiawe ipawaida ipa me oi wan. Tane ne sauana me mampe ita me damba bedewe muntompa do mampo itupo akasalepi. 20 Tane Ismael baiwa ne e iriria etana. Ita ne sau euda me osowe itupo obampa uaraia ita do nosinosiwa uaraia segantopu. Ita me warere uduudu 12 mambu wanalepi ita do me nosinosiwa bedewe uwa daitada segantopu. 21 Tane ne sauana Aisak mampe itupa. Ande winena rua imonepi enawa bedewe Sara oto gamosapi.” 22 Tane God Abraam nata gagalontone diasane aupe me ene odene alen.

23 Ita walama sa deawa bedewe Abraam otopa Ismael ita mida me duwa bedewe waimoia seda gamomoia ita seda isiwa da mane mampe gimaramodia otamone alen God wana rua ete nonowa dewawa dewasaiena. 24 Ita Abraam enawa 99 wadeno tauma ete nonowa dewawa dewasaiena. 25 Tane me otopa Ismael enawa ipa 13 waden. 26 Ita mo nata walama sa dea bedewe ete nonowa dewawa dewasaiena. 27 Tane seda mona uduudu, apana mona me dua bedewe wanwanlala ita nola dewalala mane mampe gimaramoia uduudu ete nonowa dewawa dewasaiena.