22
God Abraam sumanaiwa wadaetasade
1 Tane ema aupe mo waimoio ena isiwa diantono God Abraam sumanaiwa wadaetasapia baiwa apasane wanase, “Abraam!”✡Ibru 11.17-19
Abraam sipoasane wanase, “Oa, ne ema.”
2 Ita God me diene wanase, “E otoa deaida Aisak nuawadawadasaiana banlee aita bola Moraia bedewe. Sape ne wadi euwaepo iwa osowe otoa bosae puloite sua.”
3 Ita imonemba tadinaida Abraam enenwisene donki imaasan ita ia tonapa isuen pulo itupie supia baiwa ita otene pue donki osowe itune ita me otopa Aisak banlene nolawa apanawa nata do antoiena bola God dienawo. 4 Mo antoio walama natadea dialeno Abraam pisiwane bola sa awa antoia nowadawo ewen. 5 Ita sape me nolawa apanawa diamone wanase, “E mape pue donki do wanlempo ne otona nata sisi ane God wadaposisate ete leuntate winta.”
6 Ita Abraam ia dimbua wadenposie otopa awanape ituno awanen tane me ia emawa ita isima do oteno antoiena. 7 Mo antoie into Aisak mamba waitarasane wanase, “Mako!”
Ita Abraam wanase, “Otona asisuedina wawo etapo.”
Aisak wanase, “Ia tonapa ita ia emawa mape winei tane pulontata moiawa bunawa naepe?”
8 Abraam sipoasane wanase, “Otona, God ando pulontata moiawa imaasapie nenepi.” Me epe wane ita mo antoiawo awodea antoiena.
9 Mo antoie bola sa umanawa God wanawo wimone Abraam pulolepia watawa dewasane osowe ia teamon. Ita me otopa Aisak wadenitue witapa ita wawa taumone ia tonapa auwene teamona osowe itun.✡Iems 2.21
10 Ita me isima wadene otopa empabolepona baiwaleidie. 11 Tane Iawe God enseliwa uboe diene wanase, “Abraam, Abraam!”
Ita Abraam sipoasane wanase, “Oa, ne ema.”
12 Ita Iawe God enseliwa me diene wanase, “Mai witaa oto osowe itua ba dewa da kadiwa me mampe dewasa, dia. Tauma ne atenten e God sawaitiana, sa baiwa e otoa deaida mai anatepona, dia.”
13 Ita Abraam pisiwane pue sip donawa ia bagoreno enedio ewen. Ita me otopa pulolepona ene alene pue sa bosane God mampe pulowa itune sun. 14 Sa baiwa Abraam bola sa ebowa ituna Iawe Iaira amona mamba. Walama sawo odene ita tauma apana wampase, “Iawe God wadiwa osowe me amonalepie nenepi.”
15 Tane Iawe God enseliwa uboe osowesane ema epe Abraam dien, 16 “Iawe God wanase,
‘E ne aiana etee ruaitene otoa mai anatepona baiwa ne sauana badowa neba ebonawo itudina, 17 ne sauna euda e osoawo itupe dewaepo dana uarantopu uba tampe kipora wisiasiawaia rua ita do owa nelawa rua segantopu.✡Ibru 6.13,14; 11.12 Ita mo emalawoau apanawa do onantopue otepue mampomopu. 18 Ita e nosinosia bedeuwoe apana uduudu tawo oso waimoia sau euda osouwo itupa, ipawa e ne aiana ruawaitena baiwa.’ ”✡Aposel 3.25
19 Ema aupe Abraam otopa nata antone nolawa apanawa mampo wimone ita awodea anton bola debama Beasibawo ita sape Abraam wankasalen.