53
1 Aisaia wane wanase, “Iawe God, mida no gagalomba amonantitana sumanaiwantoie waimoi?
E mida mampo mukaa sabamosaana?”✡Rom 10.16; Ion 12.38
2 Iawe God nolawa dewalala nitu inioauaraleidia rua oauara me danawe inilen,
ia wapa sala makowa bedewe winedie inileidia rua inilen.
Me mai inainamba ewaewa apana pokawaa euda no nuamba teinepia baiwa,
me mai euwa da no nuaunepio warorosata, dia.
3 No me ewadabuasate nibuasatana,
me ipa poka ita siga daitada etaetala apanawa,
no me adiananasatana,
ita mai wiwirawantepe apana eboeboua rua ituposisapona.
4 No insetanase me poka etedia sa ipa God me matangelasade meba kadiwa baiwa.
Tane sa ipa dia, no keromba ita pokamba daitada awanenauben.
Me no saimba osoweleno awanen.✡Matiu 8.17
5 No dewamba kadiwa baiwa me eneiena,
no dewamba kadiwa baiwa me epeiena;
me poka etena bedewee no wanwan euda obasa donsatana,
me epeiena kerowa bedewe no inanten.✡1 Pita 2.24
6 No uduudu sipsip rebaleidie inta banuleidia rua rebanten,
no deadea nuba intambointambo antite;
tane Iawe God no wawumba ita kadimba daitada matangelawa me osowe ituno awanene pokawa eten.✡1 Pita 2.25
7 Mo me dewasaieno poka rebarebaida eten,
me mai aiawa da wapona, dia,
tane nua aiaisiwa mampe sai sa awanen.
Mo sipsip bosapua apanawa mampe banleie antoia rua
banlene bosapua baiwa antoiena;✡Gagalo 5.6
sipsip bunawa imba totontoia apanawa danauwo onasia enedia rua,
me onawa apanawa danauwo daina di enedie.✡Aposel 8.32,33
8 Mo me wadanaitue antone mai dodomana asiasi kotusapona,
di wadane anton ita mai mida da me adiwelepe umanawa wapona, dia.
No kadiwamba baiwa me eine bosaiena.
9 Me mai apana da kadisapona,
me mai laga da wapona,✡1 Pita 2.22
tane me kadi dewalala bontone wineiawo dobontoiena,
me maura apanawa domba bedewe ituiena.
10 Mo me epaepabobosaieno poka etene nuapareidalena
sa ipa Iawe God insaisawalena rua segalen;
nola dewalala sa meba etepa amonalene pulo rua kadi baiwa ituna,
me damba uaralepia baiwa.
Me ando walama dauma wankasalepi,
ita me bedewee Iawe God insaisawa ipawanalepi.
11 Me poka etene nuaparelena ipawa ando itupio ewepie nuaeuwalepi,
me ando atenlepi me mai di poka etape nuaparelepona, dia.
Iawe God wadiase, “Ne nolana dewalala dodomana apana uara dewamopio dodomana segantopu, ipawa mo kadiu saiwa matangelawa awanepiaubepia mampe.
12 Ne me dewasapo eboeboua segalepi,
ita itupaposidepio apana eboeboua bedeuwolepi,
ipawa me inawawa amonalene bolena baiwa,
ita apana me ebowa waiena kadi dewalala apanawa da.✡Mak 15.28; Luk 22.37
Me kadi daitada dewalala kadiu matangelawa wadene,
ita mo baibu rauparilen.”