1 Tane Israel apanawa antoie bola apuapuwa Moab bedewe Ioadan esawa tampe saradountone waimoie. Ita bola debama Ieriko ipa Ioadan waiwa dauwo winede. 2 Tane Sipo otopa ebowa Balak Israelwa Amori apanawa onau enane aimoiena ewamon. 3 Israel apanawa ipa uaraia sa baiwa Moab apanawa mo ewamone saidantone uwauwabobonton. 4 Ita Moab apanawa antone Midia apanawa eiau mampo wane waienase, “Apana ema uaraia waimoia ando dewa uduudu mainimbo wineia kadimoputuwapi, mo pue kau antoie ina natuiantoia rua no kadineputuwapi.”

Tane walama sawo Sipo otopa Balak ipa Moab apanawa warereu wandie. 5 Sa baiwa me apana waaubamono gagalo wadane Beoa otopa ebowa Balaam✡2 Pita 2.15,16; Iud 1.11 mampe antoiena bola debama Petoa esa debama aleidia tampe Amawi apanawa tawou oso. Ita mo antone me dieiena me mampe alepi ita diane waienase, “Balak wana, ‘Apana Isibtiwae nomona, mo bola uduudu bedewainta wainatuwaiena ita ne tainawo do waimoi, 6 mo apana mukamukaua mai no ruamba, dia, sa baiwa e wine ne adinawoite mo osouwo saua kadiwa wae wadabuamoa. Ita ne mo nanaumope aimopa ita tanamopo bolana epue antopu. Ne ateina e apana osowe sau euda waiana sau euda me mampeleide, tane saua kadiwa waiana me osowe kadiwa ituiana.’ ”

7 Sa baiwa Midia ita Moab apanawa eiau mane wadane nomone antoiena Balaam malesasapuo Israel apanawa osouwo saua kadiwa wapia baiwa. Ita mo Balaam mampe wimone warere Balak gagalowa wana benemasaieno eten. 8 Ita me mo diamone wanase, “E ne do mape wainente ituntata ita e gagalo wadale wilena sipoa Iawe God dianepio rua dialepa.” Sa baiwa mo waimoie itunton.

9 Tane God Balaam mampe wisene waitarasane wanase, “Ema apana dainea e do wainilana?”

10 Balaam me sipoasane wanase, “Sipo otopa Balak Moab warerewa mo waaubamono gagalo ema epe wadane ne mainawo wimoiena. 11 Apana ema Isibtiwa waimoie nomone bola uduudu bedewe waine mo os uduudunton. E wine ne adinawoite saua kadiwa wae wadabuamoa. E epe dewaitawo ne mo onau enape nanaumope aimopa ita tanamopo bola ema epue nomopue antopu.”

12 Tane God Balaam diene wanase, “E mai mo do aitana, ne dan sa osouwo sau euda ituna sa baiwa e mai saua kadiwa wae mo osouwo itua, dia.”

13 Sa baiwa Balaam tadinaida enenwisene Balak gagalowa sipoa mo diamone wanase, “Iawe God ne dianena mai e do antata, dia, sa baiwa e eba leutane bolalawo aitana.”

14 Moab apanawa eiau epe etane leuntone antone Balak diane waienase, “Balaam no do mape wimpona dabualen.”

21 Sa baiwa Balaam tadinaida enenwisene a baiwa donkiwa imaasan ita Moab apanawa eiau do antoiena Balak mampe. 22 Tane God nuawa kadilen Balaam mampe ipawa me Moab apanawa eiau do Balak mampe antoia baiwa. Balaam nolawa apanawa nata do antoio Iawe God enseliwa wanaubeno alene me onawa enene intawa boden. 23 Tane mo antoie donki Iawe God enseliwa ona isimawa wadene into enedio ewen. Sa baiwa me inta eniene irai bedewe alen. Tane Balaam donki epen leusapono into wisepona baiwa. 24 Tane Iawe God enseliwa wain iraiwa nata gonaantona eneia sawanauwo inta kerauda oso enedie. 25 Ita donki ensel ewene irai gonaawa osowe udendoe Balaam wawa apisentutuden. Sa baiwa me osowe donki epen.

26 Tane Iawe God enseliwa rialene alene inta awopawa keraudida osowe enen, sape mai leute wita on ba sen deneuwe aitaa rua, dia. 27 Mape donki Iawe God enseliwa enedio ewene ita Balaam wawa atowe itulen. Tane me nuawa kadileno koinawa mampe donki epen.

28 Tauma Iawe God donki moawa wadenaubeno Balaam mampe wane wanase, “Ne dima e manawo dewasanakadisano baiwa walama natadea epaneana?”

29 Balaam me sipoasane wanase, “E ne dewaneana ewaewa abo apana oopa rua. Ne mainawo isima wineipono tauma ema e boepona.”

30 Tane donki Balaam diene wanase, “Ne ipa e donkiaida walama uduudu osonawo wainie leie, ita dewa inainamba ema rua ne bauta dewasana, ba?”

Tane me wanase, “Dia.”

31 Mape Iawe God Balaam emawa wadenaubeno ensel isima wadene enedio ewen. Sa baiwa me dunelene namba dogo osowe itun.

32 Tane Iawe God enseliwa me waitarasane wanase, “E dima baiwa donkia walama natadea epaana? Ne emanawo a ema e aitiana ipa kadiwa, sa baiwa ne onaa enane intaa bodedina. 33 E donkia ne ewanene baiwa leulena walamawa natadea. Tane me leu epono ne tauma ema boepona ita me epono inalepona.”

34 Balaam Iawe God enseliwa sipoasane wanase, “Ne kadiwa dewasana, ita do into ne baina ona eneiana mai atenteapona. Naita e ne ana ema ewone mai meneempa, ne ideita leuntape anteapa.”

35 Ita Iawe God enseliwa Balaam diene wanase, “E apanaa do aitana, tane dima ne dieepa rua os waa.” Sa baiwa me Balak apanawa debamau do anton.