mti
Gae Mataiwa
The New Testament in the Maiwa language of Papua New Guinea
Nupela Testamen long tokples Maiwa long Niugini
 
 
Gae Mataiwa
The New Testament in the Maiwa language of Papua New Guinea
[mti]
 
Translation by Wycliffe Bible Translators
 
© 2011 Wycliffe Bible Translators, Inc.
 
Print publication 2011 by Bible League International
 
Web version
2014, Wycliffe
http://www.Wycliffe.org
 
http://pngscriptures.org
 
http://www.ScriptureEarth.org
 
This translation is made available to you under the terms of the Creative Commons license (Attribution-Noncommercial-No Derivative Works).
http://creativecommons.org/licenses/by-nc-nd/4.0
Your are free to share — to copy, distribute and transmit the text under the following conditions:
• Attribution. You must attribute the work to Wycliffe Bible Translators (but not in any way that suggests that they endorse you or your use of the work).
• Noncommercial. You may not use this work for commercial purposes.
• No Derivative Works. You may not alter, transform, or build upon this work.
• In addition, you have permission to port the text to different file formats, as long as you don’t change any of the text or punctuation of the Bible.
Notice — For any reuse or distribution, you must make clear to others the license terms of this work.
 
Tok Orait
Dispela Buk Baibel i kam wantaim tok orait na lo bilong Creative Commons Attribution-Noncommercial-No Derivative Works license. Em i tok olsem yu ken givim kopi long narepela manmeri. Yu ken wokim kopi na givim long husat i laikim. Tasol, yu mas tok klia dispela samting i kam long http://tokplesbaibel.org. Yu no ken kisim mani na salim dispela. Yu mas givim nating. Na tu, yu no ken senisim Tok.
Ol piksa i kam wantim ol Baibel na narapela buk i stap long dispela sait i gat tok orait long usim wantaim dispela samting tasol. Sapos yu laik narapela tok orait, yu mas askim husat i papa bilong copyright long dispela ol piksa.
Sapos yu laik stretim samting i no orait long dispela tok orait, stretim tok, salim Buk Baibel, o tainim Tok bilong God long nupela tok ples, yu ken askim mipela.
Olgeta tok orait na lo long tok ples English i stap long http://creativecommons.org/licenses/by-nc-nd/3.0/legalcode.
Sapos yu gat askim long dispela, plis askim mipela.
Gae Mataiwa
 
Umum
Gae Mataiwa me Baiboru tobiyag tenewa gae Oren Maiwa gumbe. Mame me iyayapan 1,400 gae mumawa. Mu at Rabaraba apa Papua New Guinea danave wakeeme.
Baiboru Mataiwa teya, bairawan 2,000 mina onanane. Namuiren gae Grii k gumbe teya, ivi at ubeube danave gae obiren gumbe iyayapan tobiyag teya. Gare gae OrenMaiwa gumbe tetu.
Gae Grii k gumbe Baiboru Mataiwa teya igiyawa mu kuiyabariwa yumateba ge gambenwa yumateba den teya. Megara ivi iyayapan upiba me yumateba ge gambenwa teya. Me nu waita numpe gae tatevit autan oya. Meoya nu mame tobiyak tetanwa danave kuiyabariwa ge gambenwa yumateba tetu. Me mina, Gae Grii k Baiboru danave kuiya kusi me den wakene, megara ivi iyayapan upiba kuiya kusi teya. Me waita numpe gae natawa taibe anotanwa oya. Meoya nu kuiya kusi gaibu mame tobiyak tetanwa danave tetu.
Gae Mataiwa danave, nu God ge god tetu. God me God natawa, sira god me ugauga god meumawa. Me mina, Guwawa ge guwawa wakeya. Guwawa me Guwawa Iyakaisiyapama, sira guwawa me guwawa upiba. Mamunwa me Mamunwa God, megara mamunwa me nu mamanaiwa mu God onan.
Baiboru me God gaiyawa. God iyayapan obiren gumbo gae meuma nunne. Nu gae numawa gumbe tobiyak tetune. Nu anotumat etewa ye Baiboru mame basiyag God gaibu wakeigimiya.
Iyayapan obiren baigan gumbe waita nuniya tobiyak tetuwa oya. God ge iyayapan gumbo nu gaun kokavit nonunmagawa gumbe vete. God waribiya meuma ye guniyap evedni wakeigimpe.
Tobiyak Tetan Igiyawa - March 2011
MATIU
Gae Oraiwa Matiu Tenewa
Iesu Isimurawaiwa Mu Yaiyawa
1
1 ✡Gen 22:18; 1Kr 17:11 Ebraam usiwa, Devid usiwa Iesu Keriso, Iesu Keriso isimurawaiwa mu yaiyawa tenewa:
2 Ebraam me Aisak baraune,
Aisak me Jekob baraune,
Jekob me Juda ge me tatawaiwa teyamne,
3 ✡Gen 38:29-30; Rut 4:18-22 Juda me Tama gumbe Peres ge Seira teyamne,
Peres me Esuron baraune,
Esuron me Ram baraune,
4 Ram me Aminadab baraune,
Aminadab me Nason baraune,
Nason me Sarumon baraune,
5 ✡Rut 4:13-17 Sarumon me Reab gumbe Boas baraune,
Boas me Ruti gumbe Obed baraune,
Obed me Jesi baraune,
6 ✡2Sm 12:24 Jesi me kin Devid baraune,
Devid me Urayas biviwa gumbe Soromon baraune,
7 Soromon me Reoboam baraune,
Reoboam me Abaija baraune,
Abaija me Eisa baraune,
8 Eisa me Josiyapat baraune,
Josiyapat me Jeoram baraune,
Jeoram me Ujaiya baraune,
9 Ujaiya me Jotam baraune,
Jotam me Eias baraune,
Eias me Ejekaiya baraune,
10 Ejekaiya me Manase baraune,
Manase me Amon baraune,
Amon me Josaiya baraune,
11 ✡2Ki 22:1–24:20; 2Kr 36:10; Jer 27:20 me kumiwa Babiron amog wakeya, Josaiya me Jekonaiya ge tatawaiwa teyamne.
12 ✡Esr 3:2 Namu Babiron amog wakeya,
ivi Jekonaiya me Searutieru baraune,
Searutieru me Jerubaberu baraune,
13 Jerubaberu me Abaiud baraune,
Abaiud me Eraiyakim baraune,
Eraiyakim me Eijo baraune,
14 Eijo me Jeidok baraune,
Jeidok me Eikim baraune,
Eikim me Eraiud baraune,
15 Eraiud me Erieija baraune,
Erieija me Matan baraune,
Matan me Jekob baraune,
16 sira Jekob me Meri memawa Josep baraune, Iesu mu waya Keriso me Meri gumbe yaine.
17 Meoya Ebraam gumbe onke Devid gumbe uwanewa, mu kum muma kumiwa undag 14. Devid gumbe onke Babiron amog wakeyawa kumiwa uwane, mu kum muma kumiwa undag 14. Sira Babiron amog wakeyawa kumiwa onke Keriso gumbe uwanewa, mu kum muma kumiwa undag 14.
Iesu Keriso Yainewa Kumiwa
18 ✡Ruk 1:27,35 Mame me Iesu Keriso aninin yaig onnewa. Me inawa Meri Josep gaibu yapapara aya, sira mu memgebip oya amareme kumiwa apa, Guwawa Iyakaisiyapama gumbe me bugane. 19 Megara Josep taibe me kwetan den anone, kuiyawa me apan da oraimina, meoya me imidanave me guwave kwepe aipe.
20 Megara Josep mameib yaug anoiviwa, Ayapan aneya meuma uyavi gumbe uwag dig wane, Josep, Devid usiwa, Meri biyugwa aug gwe aga a den a, kuiyawa me kikiyan gumbewa Guwawa Iyakaisiyapama gumbe wanedne. 21 ✡Ruk 1:31; 2:21 Me urapan yaipe, sira ge iviwa ug Iesu yua, kuiyawa me iyayapan meuma kukaeba emewa waita mumpe.
22 Watavit propeta gumbe Ayapan dig wanewa natawa veniyatan oya, mame dividivi undag veniyane. 23 ✡Ais 7:14 Yauya, otau inipama kikiyan gumbe wakepe, sira urapan yaipe, sira mu iviwa ug me Emanueru yupe. (Me natawa God nu gunup.)
24 Josep kub gumbe wan yoine, sira Ayapan aneya meuma aninin wanewa me ane, sira biviwa aune. 25 ✡Ruk 2:21 Megara me gaibu den nag vinne, namu me urapan kikiyan baraune, sira me iviwa ug yune Iesu.
Ano Koukawa Igiyawa Amudau Onamiya
2
1 Iesu Betureem at Judia danave yainewa kumive, kin Erod kumiwa apa, ano koukawa igiyawa kum dauwaiviwa apa onam at Jerusarem uwaya, 2 ✡Nam 24:17 sira waya, Ud me Ju igiyawa kin muma atan oya yainewa ampa wakene? Kum dauwaiviwa apa nu marantun meuma yautu, meoya nu waddega wantan oya onantu.
3 Kin Erod mame anonewa, me anogugut aune, sira Jerusarem igiyawa mu gaibu anogugut auya. 4 Sira me pirisi koukawa ge Gwangwan toewanewan igiyawa undag munan auwane, meve dirum wane Keriso ampa yaine wag didnegiya? 5 Betureem at Judia apa garawa waya, Kuiyawa mame propeta wait tenewa:
6 ✡Mik 5:2; Jon 7:42 Ge Betureem, at piyu Juda apa,
Juda namuyoiyoi igiyawa danowo ge kusikarenwa da onan di:
kuiyawa namuyoiyoi abnawa ye guniyap uwape,
sira me iyayapan neuma Isuraeru amat a mumpe.
7 Meve kin Erod ano koukawa igiyawa munan guwave auwane, sira mu gumbo kum divi marantun me dauwane yaug anone. 8 Me mu temunne at Betureem amiya. Me mu gumbo wane, Aisiya sira ud kikiyan oya yaimoyai diuya. Me yauyawa, tatevit didnegiya anotna, meve ne gaibu aneg me waddega wantna.
9 Namu mu kin aninin wanewa anog amiya, yauya, mu marantun me kum dauwaiviwa apa yauyawa namuwon aiginke, at me ud kikiyan wakenewa apa tumag yoine. 10 Mu marantun yauyawa, mu degadega kokavit aya. 11 ✡Sam 72:10-15; Ais 60:6 Gwe dana unig amiyawa, mu kikiyan inawa Meri gaibu yawamiya. Sira mu me kwanowa poyag petat ag waddega aya. Meve mu dividivi oraimumu mumawa watapiya, sira mu puyo waniya: gooru ge tayawa oraiminawa ge gegura maaru.*Me iragi barautan oya geguraeba. 12 God uyavi gumbe dirum wane kin Erod gumbe den taig aisiya, meve at muma sira taig ebu ube amiya.
At Ejipt Apa Guwave Amiya
13 Mu taig amiyawa, yauya, Ayapan aneya meuma uyavi gumbe uwag Josep dine, Wan yoiya, arampuna ud ge inawa tama, sira yankwek at Ejipt a guwave aisiya, sira asime wakeya meve ne watna anoa, kuiyawa kin Erod ud yaug aug toinguttan oya aivi. 14 Meve me wan yoig ud ge inawa arampuna tam a guwave at Ejipt amiya, 15 ✡Ose 11:1 sira asimeve wakeya, meve kin Erod boane. Meoya propeta gumbe Ayapan wanewa natawa uwane. Ejipt apa ne utunwa auwana dauwag onne.
16 Kin Erod yaug anone ano koukawa igiyawa ugai waniya, meoya danawa piriwane, sira me dirumne urapan at Betureem apa wakeyawa undag gutpe, sira gwetoimu megiyave wakeyawa gaibu undag gutpe. Mu bairawan muma duwam ge ankwatavewa. Me bairawan me ano koukawa igiyawa gumbo yaug anone. 17 Me apa propeta Jeremaiya gumbe wanewa natawa uwane:
18 ✡Gen 35:19; Jer 31:15 At Rama apa iyayapan nouwa anoya, it aen,
Reiseru me usitainawa munan iruwaivi, me watmemeyamtanwa topayane,
kuiyawa mu den wakeya.
Josep Meri Iesu Sira Taig At Nasaret Amiya
19 Kin Erod boane, meve Ayapan aneya meuma uyavi danave Ejipt apa Josep uwag wane, 20 Wan yoiya, ud ge inawa tam at piyu Isuraeru aisiya, kuiyawa iyayapan mu ud inaiinai meuma autan ayawa wait boriruwaya.
21 Meve me wan yoig, ud ge inawa tam at piyu Isuraeru danave amiya. 22 Megara me anone Akeraius me mamawa kin Erod at meuma aune at Judia amaraivi, me asime aitanwa a ane. Uyavi danave God gwangwan dine, meve me at Gariri amiya, 23 ✡Ais 11:1; 53:2; Ruk 2:39; Jon 1:45 sira me gwetoimu me at iviwa Nasaret amog wakeya. Meve propeta gumbe wanewa natawa uwane: Iyayapan me Nasaret apan waya.
Text info
mti