rro
'Abi'uai Apa'uana Mahamahana
The New Testament in the Waima Language, Central Province, PAPUA NEW GUINEA
The Bible Society of Papua New Guinea
ISBN: 9980 63 939 3
263P-2002—2,578 copies
Puka Wairana
Puka neiana ‘'Abi'uai Apa'uana Mahamahana’ hanona Tirama ena 'abi aba wa'i baha 'akinai Auba Robe Tirama ena maearima ebaraonanakia ba tererena. Popounai tererena hanona Helene maeanai tererena ba muriai tea'i banaina maea haeai haeai ai tererena. Bariu neiana hanona aba ia'i banaina Waima maeanai. Waima maeana teona mai tehinana maearimakia hanona ikoinai 12,000 'abana, ia hanona Bereina District ai temiaho, Central Province aonai.
2 Timoteo 3.16 ai Paulo e'abi etibaha,
“Puka Robena 'abikia ikoikiai hanona Tirama Aubana ena baraibarai ai tererenakia, ba ekia aka hanona teapa'ua ki'a baha, weiakiai 'abi tohana kahabamarere aina, katebaraona beronaka, katebaka'a beronaka, mai mauri berona kateba'iobinaka weianai kahamiaho. Ua buonai Puka robena 'abina kehore maearima Tirama ena aka tibabaina haukia keba'oru harainakia aka namokia ikoikiai katebabainakia.”
Ai tanuatae Puka neiana kotuabi aonai, 'abi weiana “Tirama ena aka tibabaina haukia keba'oru harainakia aka namokia ikoikiai katebabainakia.” hauna oi 'eumuai keao.
Puka Neiana Aonai
Puka neiana hanona Iesu Keriso pouna namona. Kotuabina hanona ko'iobina, maearima hanona Tirama kipokia katebahamomo mue. Neiana hanona puka hamona, iamo Iesu ena iuhubeau haukia baika mai a'ikakauma haukia tehore puka haha tererenakia. Ua buonai puka neiana aonai hanona puka ikoinai harau rua 'abaihau hamomo (27) temiaho, ba aokiai hanona Tirama Nahuna Iesu Keriso robana teahuna. Ihau tabakiai puka neiakia tererenakia hanona puka ahakiai a'i temiaho. Aotipa haukia tiraona Iesu eao kupa murinai hanona ena maearima tehore puka neiakia tererenakia. Mareko ena rererere hanona emai 'uai ba murihaina hanona Ioane 'euna.
'Uainai maearima weiakia puka neiana 'abikia tererenakia hanona puka iro'ana bita mai paipana bita hanona a'i tererenakia, haeamona puka 'arana 'abikia papakia hanona a'i tererenakia. Bariumo muriai hanona maearima tehore puka iro'ana mai paipana bita hanona tererenakia haeamona puka 'arana 'abikia papakia abomo tererenakia ena poki hanona tuabi tuabi iba'aba'abana paunai.
Puka kori'uaikia bani aokiai puka 'arakia 'abikia papakia baika ba'akiai hanona puka baika atakia haeamona iro'akia mai paipakia abomo tererenakia. Neiana anina hanona 'ori ihobona puka weiakia aokiai kotabu ahina. Puka ha ha ia'i ramanakiai hanona ‘Puka aona irerena 'abina’ tererenakia, weiakia hanona puka robakia teahunakia, mai ba'akiai hanona ‘Puka paipana apa'uakia’ tererenakia.
Pou namona tererena haukia ekia rererere aokiai hanona rani bo'ona puka 'ai'aina 'abikia baika abomo tererenakia. Ua buonai puka neiana aonai 'abi'abi uahomakia hanona papana tabairu totonakia aona tainai tarerenakia. Ua tarere aihonakia pokina hanona wai tuabi tuabi haumi katoihana hanona beronaimo kato'iobina, weiana hanona puka 'ai'aina 'abikia. Ihobona maearima ekia hui tererenakia haukia abomo papana tabairu totonakia aona tainai tarerenakia.
Puka paipana 'abikia baika hanona maka nahomakia [ ] aokiai tarerenakia, pokina 'abi weiakia hanona rererere 'uaikia aokiai a'i temiaho iamo bariumo muriai, ihau bo'ona aba teao aonai tererenakia. Abomo 'abi baika maka nahomakia ( ) aokiai hanona popounai Helene maeanai a'i tererenakia 'abikia iamo bariumo muriai ai kipomai tarerenakia pokina 'abi anina oi heremuai katabawaira tina haraina paunai.
Puka neiana murinai kapena aonai hanona puka neiana aonai ‘'Abi anikia’ baika tarerenakia. Neiakia hanona Iuda maearimakia ekia hoahoa mai kupukia 'aba'abakia ekia hoahoa weia ko'iobi harainakia obokia kobo paunai tarerenakia.
Weiana murinai hanona ‘'Abi kahatabu ahinakia 'ekakia’ koihanakia. Weiana aonai hanona puka 'arana 'abikia baika, ba 'ara 'abikia ha ha ba'akiai hanona puka baika atakia haeamona iro'akia mai paipakia abomo. Puka weiakia aokia koihanakia hanona barai barai 'abikia puka 'arana 'abina robana teahuna.
Pou Namona
MATAIO
Ererena Hauna
Puka Aona Irerena 'Abina
Pou namona neiana aonai hanona Mataio netibaha, Iesu ehore Tirama ena 'abi'uai weiana aba 'uainai ena maearima Isaraela haukia herekiai ebabaina hauna ebatoha haraina, 'abi'uai weiana Tirama kehore hau ha keuhuna kemai maearima kebamaurinakia. Pou namona neiana hanona Iuda haukia weiakia baiatakiai Iesu emiaho haukia 'eukiai mo aha'i, ia hanopaka maikoina ekia pou namona.
Mataio hanona Iesu neia hanopakai emiaho aonai, herenai taba terama haukia ehina pou harainakia. Ena rama raninai eaomo teahu 'arina raninai, ba 'ariai emikiri mue mai ena maearima ehabonakia 'ubi eao.
Mataio taba apa'uana robaha eahuna hanona Tirama ena obia aiarana, weiana Iesu hanona pouna ehina haraina.
Puka neiana iba'iobi paipana ima aonai, (1) Oeo ahanai bamarere 'abikia, weiakia Tirama ena obia aiarana aonai katemiaho haukia ekia hoahoa mai ekia babai (5—7); (2) Iesu i'abana haukia aka aeahomakia katebabainakia haukia robakia (10); (3) Tirama ena obia aiarana 'abikia ibabataikia (13); (4) Weiakia i'abana haukia tohakia timarere haukia ekia hoahoa mai ekia babai aea katehoma (18); mai (5) Taba weiakia hanopaka puanai katerama haukia (24—25).
Puka Paipana Apa'uakia
a. Iesu Keriso ena kuputori mai ena rama (1:1—2:23)
b. Ioane ba'uere robe hauna ena aka (3:1-12)
c. Iesu ena 'uere robe mai baihobo (3:13—4:11)
d. Iesu ena aka maearima herekiai Galilea aonai (4:12—18:35)
e. Galilea eaomo Ierusalema (19:1—20:34)
f. Hui orena Ierusalema herenai mai aonai (21:1—27:66)
g. Obiapaka ena mikiri mue mai ena waira tina (28:1-20)
Iesu Keriso Ena Rama Kupu Torina.
1
(Lk 3.23-38)
1 Iesu Keriso ena rama kupu torina Aberahamo mai Davida bibirakiai emai.
2 Aberahamo ehore Isako ebaramana,
Isako ehore Iakobo ebaramana,
Iakobo ehore Iuda uaho'abana kipokia ebaramanakia.
3 Iuda ehore Perese mai Sera ebaramanakia, hinakia hanona Tamar,
Perese ehore Hesarona ebaramana,
Hesarona ehore Ram ebaramana.
4 Ram ehore Aminadab ebaramana,
Aminadab ehore Nasona ebaramana,
Nasona ehore Salmon ebaramana.
5 Salmon ehore Boa ebaramana, hinana hanona Rahab rama haeai babi'ena.
Boa ehore Obeda ebaramana, hinana hanona Ruta rama haeai babi'ena.
Obeda ehore Iese ebaramana.
6 Iese ehore Obia 'arana Davida ebaramana.
Davida ehore Solomon ebaramana, ia hinana hanona 'uainai Uria atawana.
7 Solomon ehore Rehoboam ebaramana,
Rehoboam ehore Abia ebaramana,
Abia ehore Asa ebaramana.
8 Asa ehore Iehosabat ebaramana,
Iehosabat ehore Ioram ebaramana,
Ioram ehore Usia ebaramana.
9 Usia ehore Iotam ebaramana,
Iotam ehore Ahasa ebaramana,
Ahasa ehore Hesekia ebaramana.
10 Hesekia ehore Manase ebaramana,
Manase ehore Amon ebaramana,
Amon ehore Iosia ebaramana.
11 Iosia ehore Iekonia mai uaho'abana ebaramanakia,
rani weianai Babulono haukia tehore Isaraela haukia tea'inakia teaoainakia ekia hanopakai.
12 Baika teaoainakia Babulono murinai Iekonia ehore Sealtiel ebaramana, Sealtiel ehore Serubabel ebaramana.
13 Serubabel ehore Abiud ebaramana,
Abiud ehore Eliakima ebaramana,
Eliakima ehore Asoro ebaramana.
14 Asoro ehore Sadok ebaramana,
Sadok ehore Akim ebaramana,
Akim ehore Eliud ebaramana.
15 Eliud ehore Eleasara ebaramana,
Eleasara ehore Matan ebaramana,
Matan ehore Iakobo ebaramana.
16 Iakobo ehore Iosefa ebaramana.
Iosefa atawana Maria ehore Iesu ebaramana, maearima atana teaparina Keriso*(16) 'Ao “Mesia” bamauri hauna.
17 Weiana Aberahamo ai eao Davida herenai hanona uru harau haea bani, Davida herenai eaomo teaoainakia Babulono raninai hanona uru harau haea bani, haeamona teaoainakia Babulono murinai eaomo Keriso herenai hanona uru harau haea bani.
Iesu Keriso Ena Rama.
(Lk 2.1-7)
18 Iesu Keriso aea erama aiho hauna pouna hanona neiana. Hinana Maria hanona te'abi'uai aina Iosefa keatawana. Ia a'i tebahamomo baha aonai e'iobina Auba Robe hiabunai miori ha ea'ina. 19 Iosefa hanona aka bero hauna, a'i enuatae Maria kebahaumaeana to'u wairakiai buonai, enuatae 'abi'uai weiana bunianai kea'i ki'ana. 20 Raona weiana niraonana aonai, Obiapaka ena Aneru nibiai herenai ewaira tina e'abi etibaha, “Iosefa Davida 'aba'abana e, Maria iatawana a'i kota'uaina, pokina Auba Robe hiabunai miori weiana ea'ina. 21 Ia hanona miori ha kebaramana, atana katoaparina Iesu, pokina ia hanona ena maearima ekia ki'ai kebamaurinakia.”
22 Hoa neiana erama hanona Obiapaka ena mahabanai hauna herenai e'abi hauna nibatohana.
23 “Uaho rari ha kepuma miori ha
kebaramana,
atana kateaparina Emanuela.”
Isa 7.14
Anina hanona ‘Tirama aika herekai’.
24 Iosefa eno'a murinai, Obiapaka ena Aneru e'abi ihobona ebabaina Maria eatawana. 25 Ia terarua a'i tenoti oioi 'apua eaomo Maria miori ebaramana. Iosefa miori atana eaparina Iesu.
Aotipa Haukia Taetana Tainai Temai.
2
1 Heroda Obia 'arana Iuda eobia aina raninai, Iesu hanona Iuda aonai Betelehemai erama. Rani weianai aotipa haukia taetana taina hanopaka haeai ai temai Ierusalema teao, 2 ba tebakai bakai tetibaha, “Iuda ekia Obia 'arana erama miorina hanona ae'eai? Ia ena bihiu taetana tainai taihana buonai tamai katakuti aina”. 3 Heroda Obia 'arana 'abi weiana eona raninai nuana etae, mai Ierusalema ai maearima ikoinai abomo nuakia etae. 4 Ia ehore Iuda ekia robe haukia apa'uakia mai rauhubu poki haukia ikoikiai eaparinakia ebakainakia etibaha, “Keriso hanona ae'eai kerama?” 5 Ia ena 'abi tebamuena tetibaha, “Iuda Betelehema aonai. Mahabanai hauna ṉa erere aihona.
6 ‘Oi Betelehema,
Iuda hanona aonai,
Iuda ṯeiha 'inina aiarakia
baiatakiai oi hanona
a'i oko'iko'i ki'a baha,
pokina oi heremuai
poki hauna ha kemai
ia hanona e'u Isaraela
maearimakia ke'uai ainakia
mamoe i'imana hauna 'abana.’ ”
Mik 5.2
7 Ua buonai Heroda aotipa haukia eapari buninakia ebakainakia ke'iobi haraina rani tabana tohanai hanona bihiu weiana ewaira tina. 8 Euhunakia kateao Betelehema e'abi etibaha, “Katoao miori 'oru'oruna weiana katotabu haraina. Katotabu ahina hanona katoba'iobina'u, ba au abomo kaeao ia kakuti aina.”
9 Aotipa haukia Heroda obia 'arana aiana teona murinai teka'a, taearai teao aonai bihiu weiana taetana tainai teihana hauna e'uai ainakia eaomo miori nemiaho 'ekanai hanona e'oro. 10 Bihiu weiana teihana raninai aokia enamo banaina.
11 Itu weiana aonai tetoto hanona miori hinana Maria ohi teihanakia ba tekaipehu miori tekuti aina. Murinai obia 'abana iberuberu bena tabakia gold, muramura timina orimona, mai muramura taburana hauani katetarona hauna tetara 'aunakia teberuberu bena. 12 Ba nibiai Tirama eharabunakia a'i katemue Heroda herena, weiana taeara haeai tekana temue teao ekia hanopaka.
Iesu Te'uru aina Aikupito Teao.
13 Aotipa haukia teka'a murikiai Obiapaka ena aneru nibiai Iosefa herenai ewaira tina e'abi etibaha, “Momikiri miori hinana ohi moba ka'anakia mo'uru ainakia moao Aigupito. Weia katomiaho keaomo au kahina beni'o, pokina Heroda hanona aba miori ketabuna keahu 'arina.” 14 Epua, Iosefa emikiri miori hinana ohi ebaka'anakia rabi weianai teka'a teao Aikupito, 15 weia temiaho keaomo Heroda ke'ari. Weiana Obiapaka ena mahabanai hauna pinanai ehinana hauna ibatohana,
“Au Aikupito ai
Naha'u apari ahina.”
Hos 11.1
16 Heroda e'iobina aotipa haukia a'i katemue herena, weiana aona eopuere ki'a, aotipa haukia ebakainakia ranina eraonana ihobonai 'abi ebaibeni ena huari haukia Betelehema mai aiara herenai haukia aokiai miori ikoinai ihaukia rua mai ba'ai haukia teahu'arinakia. 17 Rani weianai mahabanai hauna Ieremia ehinana 'abina hanona etohana,
18 “Aia ha Rama ai teona
hai mai aoko'o rarina 'akina,
Rahela nahuna nihai ainakia,
ia aona katebakirona hanona
a'i nenuatae
pokina ikoinai aba te'ari ore.”
Ier 31.15
Aikupitoai Temue aina Nasareta Teao.
19 Heroda e'ari murinai Aigupito ai Obiapaka ena aneru Iosefa herenai nibiai ewaira tina, 20 e'abi etibaha, “Momikiri miori hinana ohi moba ka'anakia katomue Isaraela hanonai, weiakia miori kateahu 'arina haukia hanona aba te'ari”. 21 Ba Iosefa emikiri miori hinana ohi ebaka'anakia teao Isaraela.
22 Ia Akelao hamana Heroda 'ekana ea'ina Iuda neiha 'inina 'uruna eona raninai, keao hanona eta'u. Ba nibiai ba'iobi ea'ina ekabanai eao Galilea. 23 Ia teao aiara ha atana Nasareta wa'a temiaho, weiana hanona mahabanai haukia tehinana 'abina etohana, ‘Ia hanona kateaparina Nasareta hauna.’
Text info
rro