4
Ruꞌanik kaqetaꞌmaj we juna kꞌutunik petinaq rukꞌ ri Dios
1 Hermanos, lik e kꞌi ri qꞌalajisanelabꞌ xa e sokosoꞌnel ebꞌenaq pa taq ri tinamit che ruwachulew re kakiꞌan kꞌutunik. E uwariꞌche makoj alaq ruchꞌaꞌtem junoq xew ruma kubꞌiꞌij kꞌo uqꞌalajisam lo ri Ruxlabꞌixel ri Dios che. Ri ꞌana alaq e lik chꞌobꞌo alaq we wa kubꞌiꞌij paqatzij wi re ri Dios.
2 ¿Suꞌanik kaqetaꞌmaj we rukꞌutunik junoq petinaq rukꞌ ri Ruxlabꞌixel ri Dios? Petinaq rukꞌ ri Dios we e kujikibꞌaꞌ waꞌ: «Ri Jesucristo e Ruchaꞌoꞌn lo ri Dios yey xuꞌan achi echiriꞌ xkꞌun che ruwachulew.»
3 Noꞌj we junwi ri kubꞌiꞌij, qꞌalaj kꞌu riꞌ rukꞌutunik na rukꞌ ta ri Dios petinaq wi, ma e petinaq rukꞌ ri jun kabꞌiꞌx “anticristo” che; waꞌ e ri tom chi alaq kakꞌunik yey woꞌora kachakun chi ne che ruwachulew.
4 Alaq walkꞌoꞌal chupa rubꞌiꞌ ri Dios, ralaq alaq re ri Dios y chꞌijom chi alaq kichuqꞌabꞌ waꞌ wa qꞌalajisanelabꞌ xa e sokosoꞌnel; ma ri Uxlabꞌixel kꞌo ukꞌ ralaq más kꞌo uchuqꞌabꞌ chwa ri jun kꞌo che ruwachulew.
5 Ma rike xa e re ruwachulew, e uwariꞌche xa re ruwachulew ri kakikꞌutu; yey taq kꞌu ri winaq re ruwachulew e lik kakitaqej ri kikꞌutunik rike.
6 Pero riꞌoj oj re ri Dios, yey ri ketaꞌam uwach ri Dios e kakitaqej ri qakꞌutunik riꞌoj, noꞌj taq ri na e ta re ri Dios na kakitaqej ta ri qakꞌutunik riꞌoj. Jelaꞌ kꞌu riꞌ kaqetaꞌmaj we juna kꞌutunik petinaq rukꞌ ri Uxlabꞌixel re ri Qꞌijsaq o petinaq rukꞌ ri jun xa sokosoꞌnel.
Ri Dios e aj rutzil kꞌuꞌxaj
7 Hermanos, lik chirajawaxik wi kꞌax qanaꞌa qibꞌ chiqawach, ma ri rutzil kꞌuꞌxaj rukꞌ ri Dios kape wi. E junoq kꞌo rutzil kꞌuꞌxaj rukꞌ, riꞌ alaxinaq pa rubꞌiꞌ ri Dios yey retaꞌam uwach ri Dios;
8 noꞌj e junoq na jinta rutzil kꞌuꞌxaj rukꞌ, riꞌ na retaꞌam ta uwach ri Dios, ma ri Dios e aj rutzil kꞌuꞌxaj.
9 Ri rutzil ukꞌuꞌx ri Dios xqꞌalajinik echiriꞌ xutaq lo che ruwachulew ri lik xew Ukꞌajol riꞌ, chaꞌ ruma Rire kakꞌojiꞌ qakꞌaslemal.
10 Ri saqil rutzil kꞌuꞌxaj kaqꞌalajinik na ruma ta e riꞌoj ri kꞌax xojnaꞌw re ri Dios, ma e Rire ri kꞌax xnaꞌw qe riꞌoj nabꞌe y xutaq lo Rukꞌajol chaꞌ koluꞌyaꞌa ribꞌ paqakꞌaxel re tojbꞌal ri qamak.
11 Hermanos, ri Dios xuꞌan waꞌ, kꞌutubꞌal re ri rutzil ukꞌuꞌx chiqe; ruma kꞌu riꞌ chirajawaxik riꞌoj kꞌax qanaꞌa qibꞌ chiqawach.
12 Na jinta junoq iliyom uwach ri Dios; pero we kꞌax kaqanaꞌ qibꞌ chiqawach, riꞌ kaqꞌalajinik jeqel ri Dios pa qanimaꞌ y pa saqil wi kꞌo ri rutzil ukꞌuꞌx Rire pa qanimaꞌ.
13 Kaqetaꞌmaj kꞌu riꞌ, oj kꞌo puqꞌabꞌ ri Dios yey Rire jeqel pa qanimaꞌ, ma Rire uyaꞌom ri Ruxlabꞌixel chiqe.
14 Yey riꞌoj qilom y kaqaqꞌalajisaj ri xuꞌan ri Qaqaw: Rire xutaq lo Rukꞌajol re kebꞌukolobꞌej konoje ri tikawex.
15 E junoq kuqꞌalajisaj: «Ri Jesús e Ukꞌajol ri Dios», riꞌ jeqel ri Dios pa ranimaꞌ yey rire kꞌo puqꞌabꞌ ri Dios.
16 Riꞌoj qetaꞌam y qakojom ri Dios lik kꞌax kojunaꞌo. Ri Dios e aj rutzil kꞌuꞌxaj; ekꞌu junoq kꞌo ri rutzil kꞌuꞌxaj pa ranimaꞌ, riꞌ kꞌo puqꞌabꞌ ri Dios yey ri Dios jeqel pa ranimaꞌ rire.
17 We ri rutzil ukꞌuꞌx ri Dios pa saqil wi kꞌo pa qanimaꞌ, riꞌ lik kubꞌul qakꞌuꞌx y na kaqaxiꞌij ta qibꞌ chwa ruqꞌijol ri qꞌatbꞌal tzij, ma jelaꞌ pachaꞌ rubꞌinik ri Jesús, jekꞌulaꞌ kojbꞌin riꞌoj wara che ruwachulew.
18 We ri rutzil ukꞌuꞌx ri Dios kꞌo pa qanimaꞌ, na jinta kaqaxiꞌij qibꞌ che, ma ri saqil rutzil ukꞌuꞌx ri Dios karesaj ri xiꞌin ibꞌ chiqe. Pero we junoq kuxiꞌij ribꞌ, e ruma kunaꞌo kape qꞌatbꞌal tzij puwiꞌ. E uwariꞌche we junoq kꞌa kuxiꞌij ribꞌ, riꞌ kꞌamajaꞌ kumaj usukꞌ pa saqil wi ri rutzil ukꞌuꞌx ri Dios.
19 Riꞌoj kꞌax kaqanaꞌ ri Dios ma e Rire kꞌax xnaꞌw qe riꞌoj nabꞌe.
20 We kꞌo junoq kubꞌiꞌij: «Riꞌin kꞌax kannaꞌ ri Dios,» yey tzel karil ri ratz-uchaqꞌ, riꞌ xa aj raqꞌul. Ma e junoq na kꞌax ta kunaꞌ ri ratz-uchaqꞌ ri karil uwach, ¿suꞌanik kꞌu riꞌ kꞌax kunaꞌ ri Dios ri na rilom ta uwach?
21 E ri Dios yaꞌyom waꞌ wa taqanik chiqe: «E junoq kꞌax kunaꞌ ri Dios, lik chirajawaxik kꞌax chebꞌunaꞌa ri ratz-uchaqꞌ.»