Ri carta xutzꞌibꞌaj ri Judas
1
Ri Judas kuya pan rutzil kiwach ri hermanos
1 Riꞌin in Judas, in aj chak re ri Qanimajawal Jesucristo yey in uchaqꞌ ri Jacobo. Kantzꞌibꞌaj pan waꞌ wa carta chike ri esikꞌim ruma ri Qaqaw Dios, ri e kꞌo chupa ri rutzil ukꞌuꞌx Rire y echajital ruma ri Qanimajawal Jesucristo.
2 Ekꞌu ri Dios chunimarisaj na pawiꞌ alaq ri kꞌaxnaꞌbꞌal ukꞌuꞌx junam rukꞌ ri utzil uchomal y ri rutzil ukꞌuꞌx.
Ri eyaktajinaq chirij ri Qꞌijsaq re ri Dios
(2 P. 2:1-17)
3 Alaq nu hermanos, lik nurayim kintzꞌibꞌan pan che alaq chwi ri kolobꞌetajik yaꞌtal chiqe riꞌoj chinima qonoje; pero woꞌora kunaꞌ nukꞌuꞌx lik chirajawaxik kampixabꞌaj alaq chaꞌ kachuqꞌubꞌej ibꞌ alaq chupa ri Qꞌijsaq re ri Dios y na kaya ta kꞌu alaq luwar riꞌ che junoq kuyoj ri saqil kꞌutunik yaꞌtal xa jumul che rutinamit ri Dios.
4 Ma e kꞌo jujun achijabꞌ ebꞌokinaq chixoꞌl alaq, xa kewam ri itzel naꞌoj kꞌo kukꞌ. Yey ojertan riꞌ tzꞌibꞌital chi lo chupa Ruchꞌaꞌtem ri Dios, rike eyaꞌtal chi chuxeꞌ ri qꞌatbꞌal tzij re ri Dios. Ekꞌu waꞌ waꞌchijabꞌ itzel kiwachlibꞌal, kaketzꞌabꞌej uwach ri unimal rutzil ukꞌuꞌx ri Dios rukꞌ ri kibꞌinik kisilabꞌik na chom taj. Yey kakibꞌiꞌij na qatzij taj xew ri Qanimajawal Jesucristo e Qajawal y taqal kꞌu che kataqan paqawiꞌ.
5 Lik kuaj kankuxtaj che alaq ri etaꞌam chi ralaq: Ri Dios Qajawxel xebꞌukolobꞌej rutinamit echiriꞌ xebꞌeresaj lo chupa ri tinamit Egipto; na rukꞌ ta kꞌu riꞌ, chikixoꞌl ri xebꞌukolobꞌej e kꞌo ri xusach kiwach ruma na xkikoj ta utzij.
6 Yey e kꞌo ángeles na xekubꞌiꞌ ta rukꞌ ri taqanik xuya ri Dios pakiqꞌabꞌ, ma xkaj kakꞌojiꞌ más kiwach. Ruma kꞌu riꞌ, xkesaj kibꞌ puqꞌabꞌ ri Qaqaw y jekꞌulaꞌ xkiya kan ri saqil kikꞌolibꞌal chilaꞌ chikaj. Yey ruma kꞌu waꞌ, ri Dios ebꞌukꞌolom pa utum qꞌequꞌm, kopon na runimal uqꞌijol echiriꞌ kuqꞌat tzij pakiwiꞌ; y eyaꞌtal kꞌu riꞌ pa karena, na jinta kitzoqpitajik bꞌi.
7 Jekꞌulaꞌ ri tinamit Sodoma y Gomorra junam kukꞌ taq ri tinamit e kꞌo lo chikinaqaj, xkikꞌam lo qꞌatbꞌal tzij pakiwiꞌ ruma xkiya kibꞌ chupa ri chꞌulilaj mak, ri lik na ubꞌe taj. Wa kebꞌ tinamit e kꞌutubꞌal re ri qꞌatbꞌal tzij, ma e xkikꞌul ri kꞌaxkꞌobꞌik re ri aqꞌ na kachup ta chik.
8 Yey ri achijabꞌ ebꞌokinaq chixoꞌl alaq, tobꞌ lik kitom chi puwi ri qꞌatbꞌal tzij re ri Dios pakiwi raj makibꞌ ojertan, na rukꞌ ta kꞌu riꞌ, ketajin che uꞌanik ri na utz taj yey kakibꞌiꞌij, pa wachikꞌ ri Dios uqꞌalajisam chike utz ri kakiꞌano. Kaketzelaj rukꞌ mak ri kicuerpo, na kakaj taj kꞌo junoq kataqan pakiwiꞌ tobꞌ ne e ri Dios y tzel kechꞌaꞌt chikij taq ri lik kꞌo kiwach chilaꞌ chikaj.
9 Noꞌj ri Arcángel Miguel, tobꞌ ne lik kꞌo uwach, na jinta juna chꞌaꞌtem re qꞌatbꞌal tzij xubꞌiꞌij che ritzel winaq echiriꞌ kachꞌoꞌjin rukꞌ puwi rucuerpo ri Moisés. Na xuꞌan ta kꞌu aj qꞌatal tzij che ribꞌ ma xew jewaꞌ xubꞌiꞌij che: «E ri Dios Qajawxel kaqꞌaten e la» xchaꞌ
10 Noꞌj waꞌ waꞌchijabꞌ keyoqꞌon ne chirij ronoje taq ri na ketaꞌam taj; yey xa pa ke wi kakiꞌan ri kirayibꞌal jelaꞌ pachaꞌ kakiꞌan rawaj na kakichꞌobꞌ ta ri kakiꞌano. Ruma kꞌu waꞌ, kitukel kakikꞌam lo qꞌatbꞌal tzij pakiwiꞌ.
11 ¡Lik toqꞌoꞌ kꞌu kiwach rike! Ma e kakiꞌan pachaꞌ ri xuꞌan ri Caín. Yey kiꞌanom ri na utz taj ruma ri kirayibꞌal che ri bꞌeyomalil, jelaꞌ pachaꞌ xuꞌan ri Balaam. Yey kekam ne kꞌu riꞌ ruma ri kititzꞌitikil jelaꞌ pachaꞌ ri xukꞌulumaj ri Coré.
12 Waꞌ waꞌchijabꞌ ebꞌokinaq chixoꞌl alaq lik e aj yaꞌl kꞌix che alaq chupa taq ri chomilaj nimaqꞌij pa kamol wi ibꞌ alaq re kakꞌut ri kꞌaxnaꞌbꞌal kꞌuꞌxaj chiwach alaq. Ma na jinta xiꞌin ibꞌ kukꞌ chwach ri Dios y na kekꞌix tane che ri kakiꞌano, ma xew e kebꞌok il chikibꞌil kibꞌ. Rike e jelaꞌ pachaꞌ sutzꞌ kakꞌam lo ruma ri tew; xa kikꞌowik y na jinta jabꞌ rukꞌaꞌam loq. Yey e pachaꞌ taq ri cheꞌ na kakiya ta kijiqꞌobꞌalil chupa ruqꞌijol; lik echaqijinaq y ruma kꞌu riꞌ kꞌotom kꞌu bꞌi ri katzꞌayaq.
13 Waꞌ waꞌchijabꞌ e jelaꞌ pachaꞌ ri mar echiriꞌ lik kꞌo royowal, kapuluwan uwiꞌ y kurojij lo ri chꞌul kꞌo chupa. Jekꞌulaꞌ, waꞌ waꞌchijabꞌ e kakikꞌut taq ri kꞌixbꞌal uwach kakiꞌano. Yey e jelaꞌ pachaꞌ taq chꞌumil kisachom ri kibꞌe, ma kakiꞌan che kibꞌ e aj kꞌamal wach ke rutinamit ri Dios, tobꞌ ne e rike ri e sachinaq. Ruma kꞌu ri kakiꞌano, ri Dios uqꞌatom chi tzij pakiwiꞌ chaꞌ na jinta utaqexik kebꞌeꞌkꞌola pa utum qꞌequꞌm.
14 Pakiwi waꞌ waꞌchijabꞌ xchꞌaꞌt ri Enoc, ri uwuq lemaꞌj chwi ri Adán ri nabꞌe tikawex. Ruma kꞌu riꞌ, ri Ruxlabꞌixel ri Dios jewaꞌ xubꞌiꞌij: «¡Chiwilapeꞌ! Xinwilo echiriꞌ xpe ri Dios Qajawxel kukꞌ ukꞌiyal santowilaj ángeles.
15 Xkꞌunik re koluꞌqꞌata tzij pakiwi konoje ri winaq yey kebꞌuya pa kꞌaxkꞌobꞌik raj makibꞌ e titzꞌitaq ruma ronoje taq ri mak kiꞌanom y ruma ronoje taq ri kꞌaxlaj chꞌaꞌtem kibꞌiꞌim chirij ri Dios.»
16 Waꞌ waꞌchijabꞌ e kꞌo chixoꞌl alaq lik kewunwutik y keyajan che ronoje. Xew kakaj kakiꞌan taq ri kirayibꞌal y xew kakiyak kiqꞌij taq ri winaq chaꞌ jelaꞌ kꞌo kakesaj chike.
Kꞌisbꞌal pixabꞌanik kuya ri Judas
17 Pero ralaq hermanos, kꞌuna chikꞌuꞌx alaq ri kibꞌiꞌim kan ri e utaqoꞌn ri Qanimajawal Jesucristo.
18 Rike xkibꞌiꞌij che alaq: «Chupa taq rukꞌisbꞌal qꞌij keyaktaj lo winaq e chꞌaminel, e kakitaqej ri kirayibꞌal na chom ta uwach.»
19 Waꞌ wa winaq kakikoj retzelal kꞌuꞌx chikixoꞌl ri kikojom rubꞌiꞌ ri Dios re kakijach kipa. Ri kinaꞌoj rike xa e re ruwachulew ma na jinta ri Ruxlabꞌixel ri Dios kukꞌ.
20 Noꞌj ralaq hermanos, lik jikibꞌaꞌ kꞌuꞌx alaq che ri saqil kꞌutunik kꞌulum alaq y chꞌaꞌta alaq rukꞌ ri Dios ruma ri Santowilaj Ruxlabꞌixel.
21 Kꞌola kꞌu alaq chupa ri rutzil ukꞌuꞌx ri Dios. Choyeꞌej kꞌu alaq ruqꞌijol echiriꞌ ri Qanimajawal Jesucristo kuya che alaq ri kꞌaslemal na jinta utaqexik, kꞌutubꞌal re ri kꞌaxnaꞌbꞌal ukꞌuꞌx che alaq.
22 Chetoꞌo kꞌu alaq ri xa kebꞌ kipa kikojom ri Qꞌijsaq chaꞌ rike kakijikibꞌaꞌ kikꞌuꞌx chupa waꞌ.
23 Yey chike jujun chik, chetoꞌo alaq chaꞌ kekolobꞌetaj che ri aqꞌ re ri xibꞌalbꞌaꞌ, jelaꞌ pachaꞌ kajekꞌix pana junoq e riꞌ katzaq pa aqꞌ. Kꞌutu alaq ri relej kꞌuꞌx alaq chike ri lik e aj mak. Pero e lik chajij ibꞌ ralaq chaꞌ na kaꞌan ta e alaq ri mak kakiꞌan rike; e ꞌana alaq pachaꞌ ri kuꞌan junoq echiriꞌ na karaj taj kuchap juna kꞌul lik chꞌul.
Ri Judas kuyak uqꞌij ri Qaqaw Dios
24 Ri Dios lik kꞌo puqꞌabꞌ kutoꞌ alaq chaꞌ na katzaq ta alaq pa mak, chaꞌ jelaꞌ na jinta mak alaq. Ruma kꞌu riꞌ, lik kakiꞌkot alaq echiriꞌ ri Dios kuya alaq chwach Rire pa kꞌo wi ri unimal uchomalil chilaꞌ chikaj.
25 Xa jun ri Dios Qakolobꞌenel yey Rire kojukolobꞌej ruma ri Qanimajawal Jesucristo. Nimarisax kꞌu uqꞌij ri Dios waqꞌij ora y chiqawach apanoq, ma Rire saꞌchi ruchomalil y ruchuqꞌabꞌ, yey ronoje taqanik puqꞌabꞌ kꞌo wi. Amén.