15
1 Ekꞌu riꞌoj ri jikil qakꞌuꞌx chwach ri Dios, lik chirajawaxik wi keqatoꞌ ri hermanos na lik ta jikil kikꞌuꞌx chwach ri Dios, ri kꞌamajaꞌ kakimaj usukꞌ chi utz saꞌ ri karaj ri Dios chike. Ma na utz taj we xew e kaqaꞌan ri kukꞌul qakꞌuꞌx riꞌoj yey na kojok ta kꞌu il che ri kajawax chike rike.
2 Chiqajujunal riꞌoj e qaꞌana ri kukꞌul kikꞌuꞌx ri jujun chik hermanos we waꞌ e toꞌbꞌal re ri kikꞌaslem chwach ri Dios.
3 Ma ri Cristo na xuꞌan tane ri kukꞌul ukꞌuꞌx Rire. Ri xukꞌulumaj e jelaꞌ pachaꞌ ri tzꞌibꞌital kan chupa Ruchꞌaꞌtem ri Dios echiriꞌ ri Cristo jewaꞌ xubꞌiꞌij che ri Dios:
Ri kꞌaxlaj chꞌaꞌtem xel lo chikichiꞌ ri winaq chiꞌij la, Qaqaw,
panuwiꞌ riꞌin xtzaq wi Sal. 69:9
xchaꞌ.
4 Ma ronoje ri xtzꞌibꞌax kan ojertan chupa Ruchꞌaꞌtem ri Dios, xtzꞌibꞌaxik re kojupixabꞌaj y kunimarisaj qakꞌuꞌx, chaꞌ jelaꞌ rukꞌ unimal qakꞌuꞌx kaqoyꞌej janipa ri bꞌiꞌtisinik xuꞌan ri Dios chiqe chupa Ruchꞌaꞌtem.
5 Ekꞌu ri Dios, ri aj yaꞌl unimal kꞌuꞌxaj y ri kunimarisaj qakꞌuꞌx, chuꞌana che alaq xa jun kꞌuꞌx alaq jelaꞌ pachaꞌ ri xukꞌut kan ri Qanimajawal Jesucristo.
6 Jekꞌulaꞌ, echiriꞌ uꞌanom chi xa jun kꞌuꞌx alaq, junam kayak alaq uqꞌij ri Dios, Ruqaw ri Qanimajawal Jesucristo.
Ri Utzilaj Tzij re chinima ronoje
7 E uwariꞌche, hermanos, jelaꞌ pachaꞌ ri Cristo xukꞌul alaq, jekꞌulaꞌ kꞌulu ibꞌ ralaq rukꞌ rutzil kꞌuꞌxaj chiwach alaq re yakbꞌal uqꞌij ri Dios.
8 Kambꞌiꞌij kꞌu che alaq, e ri Cristo Jesús xoluꞌana toꞌbꞌel qe riꞌoj ri qakojom ri retalil re circuncisión chaꞌ koluꞌkꞌutu ri Qꞌijsaq re ri Dios chiqawach y rukꞌ waꞌ xujikibꞌaꞌ uwach, lik e kuꞌana janipa rubꞌiꞌtisinik ri Dios uꞌanom chike ri qatiꞌ-qamam ojertan.
9 Xkꞌun nenareꞌ chaꞌ taq ri tinamit na e ta aj judiꞌabꞌ kakiyak uqꞌij ri Dios ruma ri rutzil ukꞌuꞌx chike rike, jelaꞌ pachaꞌ tzꞌibꞌital kan chupa Ruchꞌaꞌtem ri Dios:
Kanyak na kꞌu qꞌij la
y kambꞌixoj ri bꞌiꞌ la
chikixoꞌl taq ri tinamit na e ta aj judiꞌabꞌ. 2 S. 22:50; Sal. 18:49
10 Y je tanchi waꞌ xubꞌiꞌij:
Ralaq ri na alaq ta aj judiꞌabꞌ,
lik kiꞌkota alaq junam kukꞌ rutinamit ri Dios. Dt. 32:43
11 Y jumul chik xubꞌiꞌij:
Onoje alaq che rukꞌiyal kiwach taq ri tikawex
che ruwachulew,
bꞌixoj alaq rubꞌiꞌ ri Dios,
yey lik yakbꞌej alaq uqꞌij Rire. Sal. 117:1
12 Yey jenewaꞌ xubꞌiꞌij ri qꞌalajisanel Isaías:
Kayaktaj na lo ri Jun ralkꞌoꞌal kan ri Isaí,
ri kakꞌun loq re kataqan pakiwi rukꞌiyal kiwach
taq ri tikawex che ruwachulew.
Yey rike kakubꞌiꞌ kikꞌuꞌx rukꞌ Rire Is. 11:10
xchaꞌ.
13 Ri Dios, ri kuya chiqe kakubꞌiꞌ pan qakꞌuꞌx rukꞌ Rire, chunojisaj ri animaꞌ alaq che ronoje kiꞌkotemal y utzil chomal ruma kubꞌul kꞌuꞌx alaq rukꞌ Rire, chaꞌ jelaꞌ lik kanimar kꞌuꞌx alaq che ri oyeꞌem alaq ruma ruchuqꞌabꞌ ri Santowilaj Ruxlabꞌixel ri Dios.
Ri Pablo yaꞌtal che kutzijoj ri Utzilaj Tzij chikixoꞌl ri na e ta aj Israel
14 Alaq nu hermanos, riꞌin lik wetaꞌam chi utz e lik kꞌo rutzil kꞌuꞌx y naꞌoj alaq y ruma kꞌu waꞌ utz kapixabꞌaj ibꞌ alaq chiwach alaq.
15 Na rukꞌ ta kꞌu riꞌ, na kanxiꞌij ta wibꞌ kintzꞌibꞌan pan che alaq, ma kꞌo ri kuaj kankuxtaj che alaq. Kanꞌan kꞌu waꞌ ruma ri unimal rutzil ukꞌuꞌx ri Dios yaꞌtal chwe
16 chaꞌ riꞌin kinuꞌana raj chak ri Qanimajawal Jesucristo chikixoꞌl rukꞌiyal kiwach taq ri tikawex che ruwachulew. Ekꞌu ri nuchak e kantzijoj ri Utzilaj Tzij re ri Dios chike rike, chaꞌ jelaꞌ kebꞌenuya chwach ri Dios pachaꞌ e jun qasaꞌn lik kukꞌul ukꞌuꞌx, ꞌanom chi chom che ruma ri Santowilaj Ruxlabꞌixel.
17 Ekꞌu lik kinkiꞌkot che ri nuchak kanꞌan chwach ri Dios ruma rutoꞌbꞌal ri Qanimajawal Jesucristo.
18 Ma na kinchꞌaꞌt tane puwi ri kanꞌan riꞌin, xew e kinchꞌaꞌt chwi ri uꞌanom ri Cristo wuma riꞌin; ma ruma ri nutzijom y nuꞌanom chikiwach rukꞌiyal kiwach taq ri tikawex, rike kebꞌuꞌana e aj kojol tzij chwach ri Dios.
19 Yey rukꞌ nimaq taq kꞌutubꞌal y rukꞌ nimaq taq chak xintzijoj ri Utzilaj Tzij re ri Cristo; y ri nuꞌanom e ruma ruchuqꞌabꞌ ri Ruxlabꞌixel ri Dios. Xinjeq kꞌu lo waꞌ Jerusalem, xinikꞌow lo pa taq jujun chik tinamit y xinopon kꞌa Ilíriko. Jekꞌulaꞌ wuma riꞌin xeꞌek utzijoxik ri Utzilaj Tzij che ronoje taq waꞌ wa luwar.
20 Ekꞌu lik xinya wibꞌ che utzijoxik ri Utzilaj Tzij pa taq luwar pa na tzijom ta rubꞌiꞌ ri Cristo, chaꞌ jelaꞌ na xiꞌntika tubꞌi ri nuchak puwi uchak junoq chik,
21 jelaꞌ pachaꞌ ri tzꞌibꞌital kan chupa Ruchꞌaꞌtem ri Dios:
Ekꞌu ri tikawex na jinta kꞌo xtzijox chike puwi Rire,
kaketaꞌmaj na china Rire;
yey ri na kitom ta kꞌana puwi Rire,
kakimaj na usukꞌ ri katzijox chike Is. 52:15
kachaꞌ.
Ri Pablo karaj keꞌek Roma
22 E uwariꞌche, ukꞌiyal laj xuaj kiꞌnwila alaq, pero wa nuchak inuqꞌatem;
23 noꞌj woꞌora xinkꞌis uꞌanik waꞌ chupa taq wa luwar. Yey ukꞌiyal tan junabꞌ lik nurayim kiꞌnwila alaq;
24 ruma kꞌu riꞌ, lik nuchꞌobꞌom chik, echiriꞌ kanmaj bꞌi nubꞌe kinꞌek España, kinikꞌow ukꞌ alaq y jelaꞌ ajilam qꞌij kinkꞌojiꞌ pa kiꞌkotemal ukꞌ alaq. Ekꞌuchiriꞌ wilom chi wach alaq, utz kintoꞌ bꞌi alaq che ri nubꞌenam kꞌa España.
25 Pero woꞌora kinꞌek Jerusalem re kiꞌnjacha jun qasaꞌn toꞌbꞌal ke ri hermanos e kꞌo chilaꞌ;
26 ma ri hermanos e aj Macedonia, junam kukꞌ ri hermanos e aj Acaya, xkimol wa qasaꞌn ke taq ri hermanos e nibꞌaꞌibꞌ e kꞌo Jerusalem.
27 Ri na e ta aj judiꞌabꞌ lik pa kanimaꞌ xalax wi xkiꞌan waꞌ. Yey kꞌo ne kikꞌas karaj utzelexik kukꞌ ri hermanos e aj judiꞌabꞌ e kꞌo chilaꞌ, ma rike e xetzijon ri Utzilaj Tzij re ri Dios chikiwach. Ruma kꞌu laꞌ lik ubꞌe kekitoꞌ rukꞌ taq ri kajawax chike.
28 We xinutzin kan rukꞌ waꞌ y nuyaꞌom chi kan wa qasaꞌn pakiqꞌabꞌ ri hermanos e kꞌo Jerusalem, kꞌa ekꞌuchiriꞌ kanmaj bꞌi nubꞌe kinꞌek España y kinikꞌow kꞌu ukꞌ alaq.
29 Wetaꞌam kꞌu chi utz, we xinopon ukꞌ alaq, na xa ta jubꞌiqꞌ ri kankꞌul riꞌin junam ukꞌ alaq che ri rutzil ukꞌuꞌx ri Cristo paqawiꞌ.
30 Hermanos, ri Ruxlabꞌixel ri Dios uyaꞌom ri rutzil ukꞌuꞌx chiqe chaꞌ kꞌax kaqanaꞌ qibꞌ. Kantzꞌonoj kꞌu che alaq chupa rubꞌiꞌ ri Qanimajawal Jesucristo kintoꞌ alaq, e ꞌana alaq orar panuwiꞌ chwach ri Dios.
31 ꞌAna kꞌu alaq orar chaꞌ na kintzaq ta pakiqꞌabꞌ ri winaq e kꞌo Judea, ri eyakatajinaq chirij ri Qꞌijsaq; y ꞌana alaq orar chaꞌ ri hermanos e kꞌo Jerusalem kakikꞌul chi utz wa qasaꞌn.
32 ꞌAna ko alaq orar panuwiꞌ chaꞌ e chirij ri karaj ri Dios kinopon na ukꞌ alaq, y jekꞌulaꞌ rukꞌ kiꞌkotemal kineꞌuxlan chilaꞌ ukꞌ alaq.
33 Ekꞌu ri Dios, ri aj yaꞌl utzil chomal, kꞌola ukꞌ onoje alaq. Amén.