10
Ri ángel kꞌo ralko jubꞌotaj wuj puqꞌabꞌ
1 Tekꞌuchiriꞌ, xinwilo echiriꞌ jun chik ángel lik kꞌo uchuqꞌabꞌ xqaj lo chilaꞌ chikaj yey sututal rij rukꞌ sutzꞌ y chwi rujolom kꞌo lo jun arco iris. Ekꞌu rupalaj lik kawonik jelaꞌ pachaꞌ ri qꞌij yey taq ri raqan lik kawonik pachaꞌ jutaq repaj aqꞌ.
2 Puqꞌabꞌ kꞌo ralko jubꞌotaj wuj y waꞌ jaqatal uwach. Xutakꞌabꞌaꞌ kꞌu ri raqan uwikiqꞌabꞌ chwi ri mar y ri raqan mox xutakꞌabꞌaꞌ chwi ruwachulew.
3 Lik ko xsikꞌinik pachaꞌ ri roqꞌej juna koj. Yey echiriꞌ xsikꞌinik, xtataj wuqubꞌ qulaj pachaꞌ uchꞌawibꞌal jabꞌ, lik kajininik xeꞌek.
4 Echiriꞌ xjinin ri wuqubꞌ uchꞌawibꞌal jabꞌ, riꞌin e riꞌ kantzꞌibꞌaj ri xinto; pero xinta Jun xchꞌaw lo chilaꞌ chikaj, jewaꞌ xubꞌiꞌij chwe: «Riꞌat xa chakꞌolo pawanimaꞌ taq ri xkibꞌiꞌij wa wuqubꞌ uchꞌawibꞌal jabꞌ y matzꞌibꞌaj» xchaꞌ.
5 Yey ri ángel takꞌal rukꞌ jun raqan chwi ri mar y jun chwi ruwachulew, xuyak ruqꞌabꞌ chikaj
6 y xujikibꞌaꞌ kꞌu uwach pubꞌiꞌ ri Jun ri na jinta utaqexik rukꞌaslemal, ri ꞌanayom re ruwa kaj rukꞌ ronoje taq ri kꞌo chwach, ruwachulew rukꞌ ronoje taq ri kꞌo chwach y ri mar rukꞌ ronoje taq ri kꞌo chupa, jewaꞌ xubꞌiꞌij: «Ri Dios na kamayin ta chi che uꞌanik ri uchꞌobꞌom loq.
7 Ma chupa kꞌu riꞌ ri qꞌij echiriꞌ ruwuq ángel kujeq uchꞌawisaxik rutrompeta, ri Dios e kuꞌana ri uchꞌobꞌom loq y jelaꞌ kaqꞌalajin ronoje rubꞌiꞌim lo chike ri raj chak e qꞌalajisanelabꞌ» xchaꞌ.
Ri Juan kutij ri ralko jubꞌotaj wuj
8 Ekꞌu ri Jun chꞌaꞌtinaq lo wukꞌ chilaꞌ chikaj, je tanchi waꞌ xubꞌiꞌij chwe: «Jat, jaꞌkꞌama ri ralko jubꞌotaj wuj kirom uwach yey kꞌo puqꞌabꞌ ri ángel, ri takꞌal rukꞌ jun raqan chwi ri mar y jun chwi ruwachulew» xchaꞌ.
9 Xinꞌek kꞌu riꞌin rukꞌ ri ángel y xintzꞌonoj che kuya ri ralko jubꞌotaj wuj chwe. Ekꞌu rire xubꞌiꞌij chwe: «Jiꞌ, chakꞌamaꞌ y chatija bꞌi. Ekꞌuchiriꞌ kꞌo chi pachiꞌ lik kiꞌ kanaꞌo pachaꞌ ruwaꞌal kabꞌ, pero echiriꞌ atijom chubꞌi lik kuꞌan kꞌa chupa rapa» xcha chwe.
10 Riꞌin xinkꞌam kꞌu ri ralko jubꞌotaj wuj kꞌo puqꞌabꞌ ri ángel y xintij bꞌi. Ekꞌuchiriꞌ kꞌo chi pa nuchiꞌ, lik kiꞌ jelaꞌ pachaꞌ ruwaꞌal kabꞌ; pero echiriꞌ nutijom chubꞌi, lik xuꞌana kꞌa chupa ri nupa.
11 Y ri Jun xchꞌaw lo chwe chilaꞌ chikaj, jewaꞌ xubꞌiꞌij chwe: «Lik chirajawaxik kaꞌan tanchi qꞌalajisanik puwi ri kakikꞌulumaj rukꞌiyal taq tinamit, rukꞌiyal kiwach taq ri tikawex che rukꞌiyal uwach chꞌaꞌtemal y rukꞌiyal aj taqanelabꞌ e kꞌo che ruwachulew» xcha chwe.