12
Yawe Inuꞌ Abram i Atsungꞌa Arangan
1 Yawe ini da Abram ibiani, “Watangin gam intapam, da ribam, da ramanggam utupan rai, da wauriꞌ wafa intap dzi nida santingꞌa agu gin.
2 “Dzi bungꞌ afinti agu da nanang u yanginggam nawaꞌ nasu utup tsiraꞌ mangan.
Dzi bungꞌ anang u binganggam nasu tsiraꞌ,
da agu bungꞌ asu sanab i maraampi.
3 Dzi bungꞌ afinti garam uda agu yaban,
da bida manga pupuarapan da agu
da dzi bungꞌ arim barabin maisan i mungaꞌ gan rutin.
Da mingꞌa agu da dzi bungꞌ afinti garam intap utup utup santan.”
4-5 Abram udzufan waꞌa 75 sib da itangin gamp Haran rai isangꞌ Yawe nan gan nida rutin ugu. Da iyu fininggan Sarai da rainggan Haran narunggan Lot da nam bunumpan da garam guman santan uda mingꞌa Haran ugu, da irut impruꞌ ruan ifa intap Kanan.
Gubuꞌ ribarangan waꞌa intap Kanan sib,
6 da Abram iyung itsuar intap igi ifan isangꞌ waꞌa gai tsiraꞌ mingꞌa mumai mararam binganggan More mingꞌa gamp Sekem. Da mingꞌa gubuꞌ arigi da garam Kanan mpada intap igi rungꞌ impai,
7 da bitsintaꞌ Yawe iwaꞌ da Abram da ini da arangan ibiani, “Dzi bungꞌ arim intap aruani da u yanginggam.” Ibinigi da Abram yantungꞌ tauf isu mumai mararam tsarada nam da Yawe gin, i mingꞌa nigi da Yawe iwaꞌ da arangan.
8 Raiyi da Abram itip intsungꞌ ifa mamai fain mingꞌa gubuꞌ yaban mingꞌa Betel da yari ungar apu rini gangan i nigi imingꞌ wasaꞌ i gamp Betel da Ai. Gamp Betel imingꞌ gubuꞌ ruꞌan da Ai imingꞌ gubuꞌ yaban. Da mingꞌa nigi da arangan itip yantungꞌ tauf isu mumai mararam tsarada nam in da iyugin da nifun itsaf Yawe.
9 Impa nigi raiyi da itip yuriꞌ impa wasaꞌ wasaꞌ ifan isangꞌ waꞌa intap Negeb, mingꞌa bida fiꞌ.
Abram Intsungꞌ Ifa Idzip
10 Raiyi da gubuꞌ fus tsiraꞌ nam gadan maringꞌa sib iwaꞌ imingꞌ Kanan. Ibinigi da Abram yuriꞌ da itip intsungꞌ ifa intap Idzip i mpadan nigi pas angu.
11 Nanga i atangꞌa intap Idzip da arangan ini da fininggan Sarai ibiani, “Waringantin! U sagat mara rifirif bingan iyus.
12 Da bida gubuꞌ agi atangꞌa gamp Idzip da garam Idzip tsanganda agu da bungꞌ ayafi un i agu, da bungꞌ ani nabiani, ‘Arangan fininggan igi,’ da bungꞌ ais dzi maragab funub da nagantsi agu.
13 Ibinigi da wani nabiani, ‘Dzi nafunggangꞌ igi,’ da ribarangan wasangꞌ isa dzi funub u; i agu angu da bungꞌ agantsi dzi da dzi bungꞌ ampa bini.”
14 Gubuꞌ Abram waꞌa gamp Idzip da garam Idzip itsanga Sarai sagat mara rifirif bini bingan.
15 Da garam gifa gum tsiraꞌ mingꞌa king maranggan itsanga Sarai da itsauꞌ i arangan da king, ibinigi da king ini da ribarangan ifa yu Sarai iba tangin i king ungaran i suda i fininggan mangan.
16 King imagangꞌ Abram bini iyab i Sarai da irim nam ntsuman bida ani: dumpa da nuning da makau da dongki da kamir impruꞌ da garam gum da sagat gum.
17 Da bitsintaꞌ Yawe itangin nam rinin gingꞌan mara maran maisan iwaꞌ da king da gan utupan da rib santan mpada i gan ungaran, i wain iyu Abram fininggan sinungꞌ.
18 Ibinigi da king yaga Abram iba munti i maranggan da ini, “Ibianungꞌ da u iyuꞌ dzi? U sangꞌ nida nan wasi da dzi i u fininggam Sarai, ma?
19 Wain idzuwai da u ni arangan u nafunggam da dzi yu arangan isu dzi fininggangꞌ? U fininggam aruani! Wau ya warut wafan!”
20 King yaga gan garaman i wata Abram rai mpruꞌan da fininggan da nanggan santan angu da tanginda Idzip da tipa fada gan arun.