17
Nanga Nan Utusa i Ruan Suda Nidzun
1 Gubuꞌ Abram udzufan waꞌa 99 sib, da Yawe iwaꞌ da arangan da ini da arangan ini binaꞌ, “Dzi Anutu Garam Nampang Wain. Watangꞌ warangꞌ i dzi nidzun angu da wayung sanab rururungan namingꞌ dzi maranggangꞌ.
2 Dzi bungꞌ audzu nan gangꞌ utusa i ruan gin namingꞌ wasaꞌ i dzi da agu da nautus u yanginggam nawaꞌ nasisungꞌ.”
3 Abram iringant i Anutu nan gan igi da yidzaꞌ faga gudzun da itauf maran iruꞌ intap, da Anutu ini da arangan ibiani,
4 “Dzi Anutu nan gangꞌ udzudan mpruꞌan da agu ibiani, u bungꞌ asu garam wain wain ampi bingan tafanggan.
5 Da u bingangam wasangꞌ i rungꞌ faringꞌa bida Abram u (ibi ‘raman da bingan tsiraꞌ’), imaꞌ. Da bungꞌ afaringꞌ nabi Abraham (ibi ‘ampi bingan ramanggan’), i dzi rim agu isu garam wain wain ampi bingan tafanggan.
6 Dzi bungꞌ autus u yanginggam nawaꞌ nasisung nasu utup ampi bingan da utup king bungꞌ awaꞌ namingꞌ agu gin nabinigi.
7 Dzi bungꞌ atangin nan gangꞌ utusa i ruan mingꞌa ntingan namunti wasaꞌ i dzi da agu da gam yangin rusam taptap. Da dzi bungꞌ asu agu da gam yangin rusam Anutu gan.
8 Intap Kanan santan aru agu mpada gin suda marawampua ani da dzi bungꞌ atangin nasu agu da tafam rusam gan nanting, da dzi bungꞌ asu ribarangan Anutu gan.”
Sanab Safa Rini Ubit Isu Nan Utusa i Ruan Gin Maranggan
9 Da Anutu ini da Abraham ibiani, “Agu wampa tayangꞌ dzi nan gangꞌ utusa i ruan gin, agu da yangin rusam taptap nabinigi.
10-11 Da nan utusa i ruan gin igi sanaban ibiani: Agu da garam sib angu ruta agu mpadan nasaf riniubit, da nasu bir i santingꞌa nan utusa i ruan gin namingꞌ wasaꞌ i dzi da agu.
12-13 Aruani da fada sangꞌa u yanginggam taptap, mamaꞌ marub sib angu gubuꞌ gan suda 8 sib, da nasaf i riniubit. Agu da narum rusam da sagat gum narun rusan da garam gum u uda mingꞌa rib fain da rima nam ntsuman gin sib angu nasaf riniubit nasu bir namingꞌ nanting.
14 Bida garam mangan mamida safa riniubit da arangan yis dzi nan gangꞌ utusa i ruan gin udziꞌ da gan garaman nasiat arangan rai.”
15 Da Anutu itip ini da Abraham ibiani, “Anungꞌ rungꞌ faringꞌa fininggam binganggan Sarai u. Imaꞌ. Aruani da wafaringꞌ arangan binganggan Sara.
16 Dzi bungꞌ afinti arangan da bungꞌ arim u narunggam marub. Hai, dzi bungꞌ afinti arangan da bungꞌ asu garam wain wain rinanggan, da garam wain wain king gan bungꞌ awaꞌ namingꞌ arangan gin.”
17 Abraham itauf maran iruꞌ intap da irubungꞌ da ini i unggan angu, “Mai! Isangꞌ garam fufi udzufan waꞌa 100 sib rima narun? Da isangꞌ Sara rima mamaꞌ narun da gan udzufan sangꞌa 90?”
18 Da Abraham ini da Anutu ini binaꞌ, “O Anutu Yawe, dzi marangꞌ ifur i Ismail i suda wain i u nan gam ragadan da fintidan igi.”
19 Da bitsintaꞌ Anutu ini binaꞌ, “Imaꞌ. U fininggam Sara bungꞌ arim agu narunggam marub, da u bungꞌ afaringꞌ arangan binganggan Isak (wainggan ‘irubungꞌ’). Dzi bungꞌ autus i nan gangꞌ utusa i ruan gin nampruꞌ da arangan da gan yanginggan taptap da bungꞌ amingꞌ ratar nanting angu.
20 Da mingꞌa Ismail da dzi ringant i u nan gam nidan sib, da nan nidzun, dzi bungꞌ afinti arangan da narim mamaꞌ narun ampi bingan da arangan, gan tafan rusan bungꞌ awaꞌ nayus angu. Da arangan bungꞌ asu raman i garam gudzun 12 da dzi bungꞌ anang arangan utupan nawaꞌ garam utup tsiraꞌ bingan.
21 Da bitsintaꞌ dzi bungꞌ autus i nan gangꞌ utusa i ruan gin da Isak, mamaꞌ narun Sara bungꞌ arim da gubuꞌ bida aruani da udzuf mangan aga.”
22 Gubuꞌ Anutu ntsupa nan gan nidan da Abraham, da itangin arangan rai da ifan.
23-27 Mingꞌa gubuꞌ arigi, da Abraham iyu narunggan Ismail impruꞌ da gan garam guman da mamaꞌ marub santan ruta arangan mpadan— rib apingꞌa mingꞌa arangan utupan da rib rima nam ntsuman gin— da isaf ribarangan riniubit ibi Anutu nidan da arangan ugu. Da isaf Abraham impruꞌ ibinigi. Gubuꞌ arigi da Abraham udzufan isangꞌ 99, da narunggan Ismail gan isangꞌ 13.