☰ Miamun 19
19
Yawe Itangin Dzaf Tsiraꞌ Iruꞌ Iga Gamp Sodom da Gomora Sib
1 Da angira iruꞌ aru ruta Yawe da Abraham badan ugu iwaꞌ gamp Sodom da nam bingibungan. Gubuꞌ arigi da Lot impai mumai mpruꞌa ruan gin mingꞌa gamp igi muantsi gan atangꞌa gin. Lot iraꞌ i maran da itsangan angira iruꞌ igi da yuriꞌ ifan da yidzaꞌ fagan da itatapuangꞌ iruꞌ rib iruꞌ igi maran, 2 da yis yaring gin ini binaꞌ, “Agam garam tsiraꞌ iruꞌ igi, waba ani, dzi gaib runggangꞌ da agam i atangꞌa ba gam garam gumam dzi ungarangꞌ. Da adzuꞌa fagam da ruta dzi gingꞌan, da tataꞌ maratait da agam wayung sanabam da wafan.”
Da bitsintaꞌ rib iruꞌ igi ini da arangan ibiani, “Imaꞌ. Aga bungꞌ agingꞌ mumai mpruꞌa ruan gin ani.”
3 Da bitsintaꞌ Lot irim udzung nidzun da rib iruꞌ igi isangꞌ ruta mpruꞌa ruan fada arangan ungaran. Arangan itip nam gadan i rib iruꞌ igi, itai bret yist maꞌa gin da irim da ribarangan igan. 4 Suda uts i gingꞌan da garam rinifaꞌ da tsiraꞌ sib angu mingꞌa gamp Sodom iba munti itsuafiꞌ ungar igi sib. 5 Da inuꞌ Lot ini binaꞌ, “Lot! Garam iruꞌ bada ungaram da idziang aruani impai anungꞌ? Watangin ribarangan nawaꞌ ba da aga nararaꞌ gin.”
6 Lot itus muantsi da iwaꞌ ifan da itsungin sib 7 da ini da ribarangan santan ibiani, “Raingꞌ ruas, dzi gaib runggangꞌ da agam i anungꞌ nanga uwayant maisan igi u. 8 Agam itsangan. Dzi narungꞌ rusangꞌ aruf iruꞌ rumpai. Garam mangan wawaꞌ rutin u. Dzi natangin nawaꞌ biaꞌ da agam da wanang wabi agam maram furan. Da agam anungꞌ nanga nam mangan i garam iruꞌ ani u, i ribarangan isu dzi ampi gangꞌ da dzi nampa tayangꞌ gin.”
9 Garam Sodom iringant i nan arigi da ini binaꞌ, “Wafa manaꞌ i agai! Aga tus marangꞌ i agu garam gamp manga arigi da aruani da u ni nanga runggam bida garam raruda agai i gangꞌ uwayantangꞌ. Wafa manaꞌ i agai! I aga bungꞌ awaya agu nidzun angu nayus rib iruꞌ aga.” Ribarangan iyut Lot rai da yusu ruan ifa i branga muantsi. 10 Da bitsintaꞌ garam iruꞌ mpada ungar igi itus muantsi da idzungꞌ i Lot yatangꞌ ungar wasaꞌ da itsungin muantsi sib in. 11 Da inang garam santan rinifaꞌ da tsiraꞌ muntida muantsi manaꞌ igi maran imimin da isau muantsi wasi.
12 Garam iruꞌ igi ini da Lot ini binaꞌ, “Bida u narum rusam marub da finam ma bum rusam ma ribam fain mpada gamp ani mpruꞌan, da wani rutin i ribarangan uriꞌan da tanginda gamp ani rai, 13 i aga bungꞌ asiat gamp ani rai, i Yawe iringantin nam rangan ampi bingan i raruda garam gamp ani i nanggan maisan da itangin agai iba i siata rai.”
14 Ibinigi da Lot ifan da ini da garam iruꞌ ragada sib i uda i narun rusan finam iruꞌ ugu da ini binaꞌ, “Yawe ini siata gamp ani rai, ibinigi da agam wauriꞌ da wawaꞌ sinungꞌ gamp ani sung.” Da bitsintaꞌ bun rusan igi ibuni arangan nida nan umpur in.
15 Da maratait da angira yaga Lot ini ibiani, “Wauriꞌ sung! Wau fininggam da narum rusam finam iruꞌ igi da watangin gamp ani rai sung, i agam bungꞌ antsup nampruꞌ da garam gamp ani da gubuꞌ Yawe siata rai.” 16 Da bitsintaꞌ Lot wasu nugunugun i fadan u, ibinigi da angira impung ribarangan bangin da itaraꞌ iwaꞌ sinungꞌ gamp igi sung, i Yawe maran intuꞌ ribarangan. 17 Angira uda ribarangan waꞌa sib da gan mangan ini binaꞌ, “Agam wafa sung angu! Da anungꞌ tipa taningꞌan da raraba fada gamp aga u, ma mpada asap mangan mingꞌa bump ani u. Warunt sung angu nayab mamai aga i agam mantsup sib nampruꞌ i.”
18 Da bitsintaꞌ Lot ini binaꞌ, “O dzi nifutsarifangꞌ. Dzi maragab wasangꞌ nanga bida u nidan igi u! 19 Agu nang nam maran aridan tsiraꞌ i rima gam garam gumam dzi sib, da bitsintaꞌ dzi wasangꞌ i fawaꞌa sung mamai aga u. Bida barabin igi waꞌan da bungꞌ asiat dzi rai namingꞌ sanab. 20 Watsanga gamp isiꞌ aru naga. Isangꞌ i dzi runta fada gin i rima runggangꞌ sib in? Gamp igi isiꞌ angu da bida u gantsidan da bungꞌ arim dzi maragab sib.”
21 Da angira ini, “Isangꞌ, dzi bungꞌ atus marangꞌ i agu i u nanga bida nigi da dzi wasangꞌ siata gamp u nifum gampan igi u. 22 Ariꞌ! Wafa sung angu, i dzi wasangꞌ nanga nam mangan nasangꞌ u waꞌan nigi.” (Lot ini gamp igi isiꞌ angu, i wain igi da garam ifaringꞌ gamp igi Tsoar, wainggan ibi ‘isiꞌ’ ma ‘nam utaꞌ angu’.)
23 Gubuꞌ Lot waꞌa gamp Tsoar da gubuꞌ ibarunt iyab. 24-25 Da Yawe itangin dzaf tauf bururungꞌan imui iruꞌ da iga gamp Sodom da Gomora sib impruꞌ da bump igi santan da garam gar da nam ntapan santan. 26 Da Lot fininggan atsungꞌa arangan itaningꞌ da imunti isu tauf sur.
27 Tataꞌ maratait mangan da Abraham yuriꞌ da itip ifa mumai aru muntidagin da ruta Yawe nida nan da ruan gin ugu. 28 Da irarab iruꞌ gamp Sodom da Gomora da bump santan iruꞌ da itsanga dugunt buaringꞌa ruan sangꞌa dugunt dzaf riman. 29 Gubuꞌ Anutu siata gamp santan mingꞌa bump sib da maran rufur Abraham i nan gan gutagin ugu da irim Lot sib i runta sinungꞌ gamp igi.
Lot da Narun Rusan
30 Lot irat i mpada Tsoar da iyu narun rusan finam iruꞌ ugu da iyab mamai da impa tauf bampun. 31 Gubuꞌ mangan mamaꞌ finam miamun igi ini da rainggan isiꞌ ibiani, “Agi ramanggangꞌ ifufi sib, da garam mangan wampai imingꞌ ani i uda agi u, bida garam gar sanaban uda ruan, imaꞌ. 32 Ibinigi da agi narim wain gurun da ramangꞌ anum da maran nadidirunt da agi sangꞌ i ruta arangan gingꞌan da arangan isangꞌ i rima mamaꞌ narun da agi da agi bungꞌ autus i gangꞌ yanginggangꞌ.” 33 Ibinigi da idziang arigi da ribarangan irim wain da raman inum da narun finam miamun yatangꞌ irut igingꞌ. Wain yis arangan funub angu da arangan wasruꞌ i nam idzuwai arangan narunggan miamun igi nanga i arangan u.
34 Pisa maiꞌ mangan da narun finam miamun ini da rain isiꞌ igi ibiani, “Idziang ugu da dzi rut ramangꞌ igingꞌ sib wa. Idziang aruani da agi natip narim wain da ramangꞌ nanum da agu sangꞌ i ruta gingꞌan bida dzi nangan da maiꞌ ugu, da agi sangꞌ i utusa gangꞌ yanginggangꞌ.” 35 Ibinigi da ribarangan itip irim wain da ramanggan inum da idziang arigi da narun finam isiꞌ yatangꞌ da irut raman igingꞌ. Wain yis raman funub angu ibi idziang maiꞌ mangan ugu da arangan wasruꞌ i nam idzuwai arangan narunggan finam isiꞌ igi nanga i arangan u.
36 I sanab narun ruas iruꞌ igi nangan bida nigi, da ribarangan iwangun i ramanggan Lot narunggan. 37 Narun finam miamun irim narun marub da ifaringꞌ i binganggan Moab. Moab isu garam Moab tafanggan rung faringꞌan da gubuꞌ aruani. 38 Da narun finam isiꞌ ibinigi irim narun marub da ifaringꞌ i binganggan Ben-Ami. Ben-Ami isu garam Amon tafanggan rungꞌ faringꞌan da gubuꞌ aruani.
☰