13
Yisu Yadzuꞌ Riban Atsungꞌa Gin Fagan
1 Gubuꞌ mararam tsiraꞌ Angira Atupa Sib iba su uts i waꞌan, da Yisu isruꞌ gin i gubuꞌ Arangan tanginda intap ani rai da fadan da Ramanggan inang i waꞌan. Da maran yari i gan ampanggan mpada intap ani iba isangꞌ aruani, da isantingꞌ nanggan rima wangunggan da ribigi nidzun angu iyus ifawaꞌ i gan ampapan.
2 Ribarangan iga nam da idziang, da Sadang iraꞌ i Saimon Iskariot narunggan Yudas wangunggan sib i rima Yisu fada garam ipiap banginggan.
3 Yisu irarab sib i Raman itangin nam santan angu iyab Arangan banginggan. Da isruꞌ gin impruꞌ ibi Arangan iba imingꞌ Anutu gin da bungꞌ atip afan da Anutu.
4 Ibinigi da Arangan itiri nam gadan igi rai da yuriꞌ iyab da igruꞌ gan ngarukui gan manaꞌ da iyu taur da iraingꞌ i gan tupuatiapan.
5 Ida iyats mpui iruꞌ ibang da yadzuꞌ riban atsungꞌa Arangan fagan gin, da itias i taur aru Aranga raingꞌan ugu.
6 Runang ibinigi da ibawaꞌ da Saimon Petrus. Da Petrus ini da Arangan ibiani, “Nifutsarif, u ni adzuꞌa dzi fagangꞌ?”
7 Yisu ini arangan nan gan mungaꞌ ibiani, “Nam dzi nangan, da u anungꞌ isruꞌ gin da aruani, da bampan aga da agu bungꞌ asruꞌ gin.”
8 Da Petrus ini binaꞌ, “Imaꞌ angu! U anungꞌ isangꞌ adzuꞌa dzi fagangꞌ u.”
Da Yisu ini binaꞌ, “Bida dzi mamida adzuꞌa agu fagam, da agu wasangꞌ i suda dzi gangꞌ u.”
9 Da Saimon Petrus ini binaꞌ, “Nifutsarif, bida nigi da u anungꞌ adzuꞌa dzi fagangꞌ angu u; wadzuꞌ dzi bangingꞌ da gudzungꞌ nampruꞌ nabinigi.”
10 Yisu itip ini arangan nifunggan mungaꞌ ibiani, “Garam mangan yiꞌa mpui sib da rinin santan sapan da anungꞌ isangꞌ tipa yiꞌan u, bungꞌ adzuꞌ i fagan angu. Da agam isap sib wa, da bitsintaꞌ anungꞌ agam santan u.”
11 I Yisu isruꞌ gin sib i manga arigi bungꞌ arim Arangan nafa garam ipiap banginggan. Ibinigi da ini binaꞌ, “Anungꞌ agam santan isap u.”
12 Gubuꞌ Arangan adzuꞌa riban fagan sib da itip yatsuf ngarukui gan da ifa tip impa iruꞌ mumai gan mpada gin. Da igut i ribarangan ini binaꞌ, “Agam isruꞌ i nam dzi nanga i agam igi wainggan?
13 Agam ifaringꞌ dzi Kidungwaga da Nifutsarif, da agam ini nan rururungan i dzi arangan aruani.
14 Da agam Nifutsarifam da Kidungwaga gam yadzuꞌ agam fagam sib, da wanang nabinigi angu i adzuꞌa rufagam bida nigi.
15 Dzi santingꞌ sanab da agam isu nam raman i agam nanga bida dzi nangan da agam.
16 Dzi nani nan nidzun bingan da agam! Mamaꞌ gum anungꞌ iyus garaman tsiraꞌ u, ma garam rima sisingꞌ ibinigi anungꞌ iyus garam aru tanginda badan ugu u, imaꞌ.
17 Agam irarab nam igi sib, da bida agam nangan da nugum watsiaꞌ angu gin i Anutu bungꞌ afinti agam in.
18 Dzi wani agam sib angu u, imaꞌ. Dzi sruꞌ i garam dzi runggangꞌ piriangꞌan. Da bitsintaꞌ nan kakaran ani nasu nidzun nabiani, ‘Garam ruta dzi mpruꞌa ruangꞌ gada nam irim ipiap i dzi.’
19 Dzi ni nan igi da agam mungꞌ, da bampan aga da bungꞌ asu nidzun. Da waꞌa suda nidzun da agam bungꞌ amuaruts i Dzi Mpa Ibi Arigi Angu.
20 Nan nidzun bingan dzi nani da agam, manga isa yaring i dzi garamangꞌ tanginda fadan, da yis yaring i dzi. Da manga isa yaring i dzi, da yis yaring i Aru tanginda dzi badan ugu ibinigi.”
Yisu Intuang Gan Garaman Rima Ipiap i Arangan Wasi
(Matiu 26:20-25; Markus 14:17-21; Lukas 22:21-23)
21 Yisu ini nan igi sib da wangun ibarabin nidzun angu da ini, “Dzi nani nan nidzun bingan da agam! Agamam bits bungꞌ arim dzi nafa garam ipiap banginggan.”
22 Ini ibinigi, da gan garaman atsungꞌa gin imami ruan angu i mangan nigi bungꞌ arim ipiap i Arangan, da intrung maran i ruan ifa iba.
23 Da gan garaman atsungꞌa gin mangan aru Arangan maran arida gin yusan ugu impa uts rutin.
24 Da Saimon Petrus iraꞌ i maran da garam arigi da ini binaꞌ, “Wagut i Yisu i mangan nigi.”
25 Ibinigi da garam igi impap uts angu ifan da Yisu nugun da igutin ini binaꞌ, “Nifutsarif, u buni mangan nigi?”
26 Yisu ini arangan nifunggan mungaꞌ ibiani, “Garam dzi tuguda bret mungaꞌ ruꞌa mpuaꞌ da rima rutin, da garam arangan arigi.” Da itugu bret igi da irim da Yudas, Saimon Iskariot narunggan.
27 Aru Yudas uda bret igi sib, da Sadang yatangꞌ i arangan. Da Yisu ini da arangan ibiani, “Nam agu nida nangan da wanang sung angu.”
28 Rib ruta Yisu mpruꞌa ruan gada nam igi anungꞌ isruꞌ i nan wain Yisu nidan igi u.
29 Yudas igi garam mpada tayangꞌ ribarangan moni gan, ibinigi da gan fain ibuni Yisu nida rutin i fa uda nam ribarangan sauda runggan gin i gubuꞌ mararam tsiraꞌ igi, ma rima nam da garam sauda runggan.
30 Gubuꞌ aru Yudas uda bret mungaꞌ igi sib, da sung angu da itangin ribigi rai da iwaꞌ ifan da nam idziang.
Nan Faidagin Faꞌ
31 Gubuꞌ Yudas fada sib da Yisu ini ibiani, “Garam Narunggan gubuꞌ gan uda bingan tsiraꞌ arangan aruani, da Anutu bungꞌ ayu bingan tsira i Garam Narunggan.
32 Da bida Anutu uda bingan tsiraꞌ i Arangan, da Anutu runggan bungꞌ arim bingan tsiraꞌ da Garam Narunggan, da bungꞌ anang sung angu.
33 Dzi narungꞌ rusangꞌ, pas angu da dzi wasangꞌ i rungꞌ ruta agam mpadan u. Agam bungꞌ asau dzi. Nan dzi nidan da garam Yuda ugu da dzi ni da agam da aruani. Gamp dzi fada gin, da agam anungꞌ isangꞌ fawaꞌa gin.
34 Da aruani da dzi tangin nan faidagin faꞌ mangan da agam ibiani: Maram wari i runggam ntuaꞌ nabi dzi marangꞌ arida i agam. Ibinigi da agam maram wari i runggam ntuaꞌ.
35 Bida agam maram arida i runggam ntuaꞌ da garam sib angu bungꞌ asruꞌ gin nabi dzi ribangꞌ atsungꞌa dzi agam.”
Yisu Ini Petrus Nan Gan Tungꞌa Gin Wasi
(Matiu 26:31-35; Markus 14:27-31; Lukas 22:31-34; Yowanis 13:36-38)
36 Saimon Petrus igut i Arangan ini binaꞌ, “Nifutsarif, U buni fada anungꞌ?”
Da Yisu ini nan mungaꞌ ibiani, “Sanab dzi fadagin da u wasangꞌ atsungꞌa gin badan u. Da bitsintaꞌ bampan aga da u bungꞌ amus atsungꞌa gin.”
37 Petrus itip igutin ini binaꞌ, “Nifutsarif! Ibubianungꞌ da dzi mamida atsungꞌa agu da aruani? Dzi bungꞌ arim runggangꞌ rai i rima agu sib.”
38 Yisu itip ini arangan nifunggan mungaꞌ ibiani, “U bungꞌ asangꞌ i rima runggam rai i dzi, a? Dzi nani nan nidzun da agu, rai da tatariꞌ musa kakarakan, da agu bungꞌ atungꞌ maram i dzi nasangꞌ iruꞌ da bits.”