21
Yisu Itip Iwaꞌ da Riban Atsungꞌa Gin 7 Tapuda Ubing
1 Gubuꞌ fain ifa sib raiyi da Yisu itip iwaꞌ da riban atsungꞌa gin imingꞌ mpui fuꞌ tsiraꞌ Taibirias (nida Galili gin). Arangan iwaꞌ da ribarangan ibiani.
2 Saimon Petrus, Tomas (nida Didimas in) da Natanail mingꞌa gamp Kana mingꞌa Galili, da Sebedi narun rusan iruꞌ impruꞌ da Yisu riban atsungꞌa gin iruꞌ impa impruꞌ ruan.
3 Saimon Petrus ini da gan fain igi ibiani, “Dzi ni fada i uda yafas.”
Da ribarangan ini binaꞌ, “Da aga binigi ini ruta agu fadan.” Ibinigi da ribarangan iyu madzung da ifan. Da bitsintaꞌ ribarangan wayu yafas mangan da idziang arigi u.
4 Pisa maratait santan da Yisu imunti magamangꞌ ringan, da riban atsungꞌa gin wadzidziwan ibi Arangan igi u.
5 Arangan inuꞌ ribarangan ifan ini binaꞌ, “Yaꞌ raingꞌ ruas! Agam iyu yafas fain, ma imaꞌ?”
Da ribarangan inuꞌ ba ini binaꞌ, “Imaꞌ angu.”
6 Da Arangan ini binaꞌ, “Watip watapu ubing gam waruꞌ nabi madzung marafaingꞌ bangim bini gam da agam bungꞌ ayu yafas faingꞌ.” Da gubuꞌ ribarangan nanga bida nigi, da iyu yafas ampi bingan angu da yuntap i ubing itsiri.
7 Da garam atsungꞌa gin aru Yisu maran arida gin ugu ini da Petrus, “Nifutsarif aga!” Gubuꞌ Petrus ringanta i nan arangan nida bida, “Nifutsarif aga,” da arangan itsirif ngarukui gan i ritan (i arangan anungꞌ yatsuf ngarukui ampi bingan u) da yatup iruꞌ mpui da imap ifa tsaraꞌ.
8 Riban atsungꞌa gin fain rumpa madzung igi iba da yuntap i ubing fungꞌa i yafas igi ifa nam tsaraꞌ. I anungꞌ imingꞌ guntiꞌ i mpui ringan u, ibi 100 mita angu.
9 Gubuꞌ ribarangan bawaꞌa tsaraꞌ sib da itsangan dzaf urun yafas bits mingꞌa gin da bret fain.
10 Yisu ini da ribarangan, “Agam wayu yafas faingꞌ agam bungꞌ udan naba.”
11 Ibinigi da Saimon Petrus itip iyab madzung da yuntap i ubing yafas fungꞌa gin igi iyab tsaraꞌ. Ubing igi fungꞌ i yafas tsiraꞌ tsiraꞌ 153. Yafas igi ampi bingan da bitsintaꞌ ubing igi anungꞌ intap ruan u.
12 Yisu ini da ribarangan, “Agam waba ga nam.” Da riban atsungꞌa gin igi mangan rinin anungꞌ iyaba i guta gin bida, “Agu wai igi?” Imaꞌ. I ribarangan isruꞌ i Arangan Nifutsarif.
13 Yisu ifa yu bret da yafas igi da irim da ribarangan igan.
14 Nigi bi Yisu iwaꞌ da riban atsungꞌa gin isangꞌ iruꞌ da bits sib da gubuꞌ aru Arangan muntida marataꞌ sib ugu.
Yisu Ini da Petrus i Mpada Tayangꞌ Arangan Dumpa Gan
15 Gubuꞌ ribarangan gada nam sib da Yisu igut i Petrus ini binaꞌ, “Saimon, Yowanis narunggan, u maram yari nidzun angu i dzi iyus rib santan ani nanggan maran arida i dzi, a?”
Da arangan ini, “Hai, Nifutsarif, U sruꞌ gin ibi dzi marangꞌ yari i Agu.”
Da Yisu ini, “Da warim nam gadan da dzi dumpa gangꞌ narun narun.”
16 Da Yisu itip igut i arangan isu iruꞌrun ini binaꞌ, “Saimon, Yowanis narunggan, u maram yari nidzun angu i dzi, ma imaꞌ?”
Da arangan ini, “Hai, Nifutsarif, U sruꞌ gin ibi dzi marangꞌ yari i Agu.”
Da Yisu ini, “Da wampa tayangꞌ dzi dumpa gangꞌ.”
17 Yisu itip igut i arangan isu iruꞌ da bits ini binaꞌ, “Saimon, Yowanis narunggan, u maram yari i dzi, ma imaꞌ?”
Petrus wangun ibarabin i Yisu nan gan guta i arangan suda iruꞌ da bits nida binaꞌ, “U maram yari i dzi, ma imaꞌ?” Da Saimon ini arangan nifunggan mungaꞌ ibiani, “Nifutsarif, U sruꞌ i nam sib angu, da U sruꞌ gin i dzi marangꞌ yari i Agu.”
Da Yisu ini, “Warim nam gadan da dzi dumpa gangꞌ.
18 Dzi ni nida nan nidzun da agu, gubuꞌ u rungꞌ suda garam rinifaꞌ da u runggam idzur gam ritam da u yung yatsung maranggam furan. Da bitsintaꞌ gubuꞌ agu fufidan da u bungꞌ atatu banginggam da garam mangan bungꞌ adzur u ritam da nayu agu nafa mumai u buginda i fada gin.”
19 Yisu ini nan igi i santingꞌa Petrus sanaban mampa gin wasi i arangan rima bingan tsiraꞌ da Anutu gin. Ida Yisu ini rutin ibiani, “Watsungꞌ dzi.”
20 Petrus itaningꞌ da itsanga garam aru Yisu maran arida gin ugu atsungꞌa ribarangan badan. Arangan garam aru impapa fada uts da Yisu nugun da gubuꞌ gada nam maran fura Angira Atupa Sib da guta gin nida binaꞌ, “Nifutsarif, mangan nigi bungꞌ arim Agu nafa garam ipiap banginggan?”
21 Gubuꞌ Petrus tsanganda arangan da igut i Yisu ini binaꞌ, “Nifutsarif, bida anungꞌ i garam igi?”
22 Yisu ini arangan nan gan mungaꞌ ibiani, “Bida dzi nida i arangan mpada sangꞌa dzi tipa badan, da u maram ifur ibianungꞌ, nigi bungꞌ asu u nanggam? Da agu, watsungꞌ dzi.”
23 Ibinigi da nan amas arigi idzarang wasaꞌ i rib muarutsan ibi garaman atsungꞌa gin arigi wasangꞌ i mampan u. Da bitsintaꞌ Yisu wani ibi arangan wasangꞌ i mampan u, imaꞌ. Arangan ini, “Bida dzi nida i arangan mpada sangꞌa dzi tipa badan, da u maram ifur ibianungꞌ, nigi bungꞌ asu u nanggam?”
24 Nigi Yisu garaman atsungꞌa gin aru kakaran da nida nan ani wasi da aruani. Aga sruꞌ gin ibi nan gan nida wasi igi nan nidzun bingan.
25 Yisu inang nam mara maran fain ampi bingan angu. Da bida akara nam santan igi bitsintaꞌ bitsintaꞌ ruꞌan, da dzi marangꞌ ifur ibi mumai wasaꞌ mangan bungꞌ amaꞌ namingꞌ intap santan ani i rima papiar santan igi gin.