21
Sagat Yaruf Dangki Gan Riman
(Markus 12:41-44)
1 Gubuꞌ Yisu raꞌa i maran da itsanga garam ruta nam bunump fain rima dangki gan ruꞌa bugis dangki gan.
2 Da sagat yaruf sauda runggan mangan ibinigi irim moni narun iruꞌrun iruꞌ.
3 Da Yisu ini, “Dzi nani nan nidzun da agam, sagat yaruf sauda runggan aruani irim nam iyus rib fain aga.
4 Garam santan igi irim dangki gan imingꞌ nam bunumpan tsiraꞌ igi isangꞌ maran furan gan. Da bitsintaꞌ sagat sauda runggan ani rim nam bunumpan santan aru rima arangan sib in.”
Nam Santingꞌa Gubuꞌ Buntun
(Matiu 24:1-35; Markus 13:1-31)
5 Rib fain ini nan da ruan iyab i Ungar Mararam giradan i tauf grigriꞌan bini bini da nam rima suda dangki fadan da Anutu.
6 Da bitsintaꞌ Yisu ini, “Nam idzuwai agam tsangandan da aruani, da gubuꞌ mangan bungꞌ abawaꞌ da tauf mingꞌa raragun i ruan ani bungꞌ agruꞌ ruan sib.”
7 Da ribarangan ini, “Kidungwaga tsiraꞌ, gubuꞌ idzuwai da nam igi bungꞌ awaꞌ? Da nam idzuwai igi bungꞌ awaꞌ mungꞌ i santingꞌa nam igi gubuꞌ gan isu uts i waꞌan?”
8 Da Yisu ini, “Watsanga runggam sib i garam iyuꞌa nam. I garam ampi bingan bungꞌ aba i dzi binganggangꞌ da nani, ‘Dzi Arangan ani,’ ma ‘Gubuꞌ maran isu uts.’ Da anungꞌ atsungꞌa ribarangan u.
9 Gubuꞌ agam ringanta i nan i nam isa ruan tsiraꞌ waꞌan, da anungꞌ ratan u. Hai, nam igi bungꞌ awaꞌ mungꞌ raiyi, da bitsintaꞌ gubuꞌ buntun wasangꞌ i waꞌa sung u.”
10 Ida Arangan itip ini da ribarangan, “Garam intap manga bungꞌ auriꞌ da nais garam intap mangan, da king mangan bungꞌ auriꞌ da narut king mangan nais ruan.
11 Da nam maisan bida ani bungꞌ awaꞌ namingꞌ intap mara maran: tufuringꞌ, rinin gingꞌan tsiraꞌ tsiraꞌ fain da nam mangits tsiraꞌ, da nam ratan da nam santingꞌan bungꞌ awaꞌ namingꞌ maranguntung.
12 “Da bitsintaꞌ nam bida ani bungꞌ awaꞌ mungꞌ raiyi: garam bungꞌ ampung agam da narim tsakia da barabin da agam. Tuas arangan bungꞌ araru agam namingꞌ ungar mpruꞌa ruan gin da narim agam i karabus. Da nausu agam i muntida king da gabman tsiraꞌ maranggan i wain, agam yatsungꞌ i dzi.
13 Da nigi bungꞌ awaꞌ abi sanab agam nida dzi sisingꞌ bini gangꞌ wasi da santingꞌa agam nanggam muarutsan da ribarangan.
14 Da bitsintaꞌ anungꞌ maram fura i tipa nan mungꞌ i rima runggam sib i nida nan bida anungꞌ.
15 Dzi bungꞌ arim nan da mararuru da agam i agam ipiapam anungꞌ nida nan mungaꞌ da agam.
16 Da anungꞌ rib fain angu u, agam utupam ibinigi — ramanggam da rinanggam da raim rusam da rinum rusam — bungꞌ arim agam nafan da garam fain banginggan da nais agam fain funub.
17 I dzi angu da rib santan bungꞌ abugin agam.
18 Da bitsintaꞌ nam arigi mangan anungꞌ isangꞌ siata agam ganunggam rai, imaꞌ.
19 Agam buaringꞌa barabin da muntida babampaf in da agam bungꞌ awaꞌ da nam mpada ratar.
20 “Gubuꞌ agam tsanganda garam singaari muntida wafiꞌa Yerusalem da agam wasruꞌ gin nabi gubuꞌ siata gamp igi iba su uts.
21 Ida rib mpada intap Yuda narunt sib nafa mamai, da rib mpada wasaꞌ i gamp Yerusalem igi nawaꞌ sib, da rib mpada manaꞌ i gamp igi anungꞌ tipa atangꞌa fadan u.
22 I gubuꞌ arigi da Anutu bungꞌ arim nam mungaꞌ natsungꞌ nan santan akaran ugu.
23 Da gubuꞌ arigi bungꞌ arim barabin nayus da sagat wangundan da sagat narun mitan. I barabin tsiraꞌ bungꞌ awaꞌ intap ani da Anutu bungꞌ ayats wangun sasusan ragun i garam Yuda ani.
24 Da garam singaari bungꞌ ais ribigi fain funub i bainat da nampung fain nasu garam karabus nafa intap santan. Da garam mingꞌa manaꞌ i utup Yuda bungꞌ arasu Yerusalem nasangꞌ garam manaꞌ igi gubuꞌ gan bantsupan.
25 “Da nam santingꞌan maran mangan bungꞌ awaꞌ i gubuꞌ da ukam da ngantam. Da mingꞌa intap da garam utup santan bungꞌ arat da uwayant bungꞌ arintsum ruan i uruts kungan da iyamiyam tsiraꞌ.
26 Maran bungꞌ afur nam nanga i waꞌa intap da bungꞌ arat da maran nadidirunt da namamp asub, i nam rini urun idzuwai mingꞌa maranguntung wagungꞌ bungꞌ audza i ruan.
27 Mingꞌa gubuꞌ arigi da ribarangan bungꞌ atsanga Garam Narunggan bada mingꞌa maraum wasaꞌ ruta nampang da nanggan dzidziwandan tsiraꞌ.
28 Gubuꞌ nam bida nigi bungꞌ waꞌan da wamunti wayab da anungꞌ ratan u, i gubuꞌ Anutu tipa uda agam iba su uts.”
29 Arangan ini nan raman ani, “Watsanga gai fik da gai santan aga.
30 Gubuꞌ gai yafan puꞌan da agam bungꞌ atsangan da wasruꞌgin nabi gubuꞌ rima maraburuab da nidzun waꞌan isu uts.
31 I sanab bida arigi angu da gubuꞌ agam tsanganda nam bida nigi waꞌan da wasruꞌgin nabiani, Anutu nanggan mpada tayangꞌ gan garaman iba su uts.
32 Dzi nani nan nidzun da agam nabiani, rib utup rungꞌ mpadan da gubuꞌ aruani fain rungꞌ bungꞌ ampai nasangꞌ nam santan igi waꞌan.
33 Gunungun da intap bungꞌ antsup sib, da bitsintaꞌ dzi nan gangꞌ bungꞌ amingꞌ ratar nanting.
Tsanganda Runggam Sib da Gubuꞌ Sib Angu
(Matiu 24:36-44; Markus 13:32-37)
34 “Watsanga runggam sib i agam anungꞌ numa mpui maradidirunt yusan da nanga sanab maisan da maram anungꞌ furan nan i nanggam mpada bini mingꞌa intap ani. I sanab bida nigi bungꞌ arim wangu barabin da agam, da gubuꞌ arigi bungꞌ awaꞌ da agam sung angu
35 nabi pungip mpunga apu. I gubuꞌ arigi bungꞌ awaꞌ da rib santan mpada mingꞌa intap da intap.
36 Ibinigi da gubuꞌ sib angu da agam watsanga runggam sib, da waugin i uda rini urun i waꞌa sinungꞌ nam santan nanga i waꞌan igi ida muntida Garam Narunggan maran.”
37 Gubuꞌ sib angu da Yisu ifis i nan imingꞌ Ungar Mararam, da idziang santan Arangan ifa mpai Mamai Oliv.
38 Da garam santan iba da tataꞌ maratait i ringanta i Arangan fisa i nan mingꞌa Ungar Mararam.