24
Yisu Tipa Muntida Marataꞌ
(Matiu 28:1-8; Markus 16:1-8; Yowanis 20:1-10)
1 Gubuꞌ miamun Suntai tataꞌ maratait, da sagat sagat iyu nam rini gaunt tipa ruan gin sib ifa tauf bampun.
2 Ribarangan itsangan ibi tauf tsiraꞌ tsunginda tauf bampun gin ugu anungꞌ rumingꞌ u. Irimpingꞌ gin sib iwaꞌ manaꞌ.
3 Da gubuꞌ ribarangan atangꞌa fadan da isau Nifutsarif Yisu rini uriatsan.
4 Da ribarangan maran rung fura nan yusa yaba i nam igi, da sung angu garam iruꞌ ngarukui gan dzadzaniangan imunti impruꞌ da ribarangan.
5 Da sagat igi irat da itauf maran iruꞌ intap. Da garam iruꞌ igi ini da ribarangan ibiani, “Ibianungꞌ da agam isau garam marantaꞌan imingꞌ garam mampan gampan?
6 Arangan anungꞌ impai ani u; Arangan imunti marataꞌ sib! Agam maram wafur nan Arangan nidan da agam, da gubuꞌ rungꞌ ruta agam mpada mingꞌa Galili ugu:
7 ‘Bungꞌ atangin Garam Narunggan nafa garam asub banginggan, da nais Arangan nayab gai mpara i ruan, da gubuꞌ suda iruꞌ da bits da bungꞌ atip namunti marataꞌ.’ ”
8 Ida ribarangan maran ifur Yisu nan gan nidan.
9 Gubuꞌ ribarangan tipa bada sinungꞌ tauf bampun, da ifis i nam santan waꞌa mingꞌa nigi da rib 11 ugu impruꞌ da rib fain.
10 Sagat ruas nida nan da aposel ruas igi ibiani: Maria Magadala, Yowana, da Maria Dzems rinanggan, da sagat fain ruta ribarangan.
11 Da bitsintaꞌ ribigi itsanga nan sagat sagat nidan igi ibi nan brabruꞌan, da anungꞌ imuaruts ribarangan u.
12 Da bitsintaꞌ Petrus yuriꞌ iyab da irunt ifa tauf bampun. Da idzuangꞌ iruꞌ da yarangꞌ yatangꞌ da itsanga bruꞌ maragamp utaꞌ runggan rungꞌ ufuma ruan. Da arangan itip ifa gan arun ruta maran furan ampi bingan i nam waꞌan igi.
Yisu Isantingꞌ Runggan Imingꞌ Sanab Fada Imaus
(Markus 16:12-13)
13 Gubuꞌ arigi da Yisu garaman atsungꞌa gin iruꞌ iyung ifa gamp nida Imaus imingꞌ rungꞌ guntiꞌ i Yerusalem isangꞌ 7 mail.
14 Tuas arangan ini nan da ruan ifa iba i nam santan waꞌan mingꞌa nigi.
15 Gubuꞌ rungꞌ nida nan da ruan, da Yisu runggan ibawaꞌ da iyung impruꞌ da tuas arangan.
16 Da bitsintaꞌ Anutu inang da ribarangan wafaringꞌ Arangan u.
17 Da Arangan igut i ribarangan, “Agam ifis i nan idzuwai igi da yudzungꞌ da ruam iyus in imingꞌ sanab?”
Da tuas arangan imunti untras ruta maran gagaingꞌan.
18 Ribarangan mangan nida Kerofas in igut i Arangan, “Mani u runtaꞌ angu imingꞌ wasaꞌ i rib bada Yerusalem da agu anungꞌ isruꞌ i nam idzuwai waꞌan da gubuꞌ iruꞌ fada sib ugu?”
19 Da Yisu ini, “Nam idzuwai igi?”
Da ribarangan ini, “Nam idzuwai waꞌan da Yisu, garam Nasaret, Arangan profet da ini nan da inang nam maran mangan ruta nampang imingꞌ Anutu da garam gar santan maranggan.
20-21 Da aga rim marangꞌ i Arangan aru nigi iba i uda garam Israil sinungꞌ gabman Rom banginggan. Da bitsintaꞌ garam pumuꞌa Anutu wain gudzun rusan da aga garam gudzunggangꞌ impung Arangan, da itangin ifa gabman Rom banginggan da ini Arangan mampan da yis iyab gai mpara i ruan. Da gubuꞌ iruꞌ da bits ifa sib i nam igi.
22 Da nan fain ibiani, aga sagat rusangꞌ fain inang aga runt fafun ibiani, tataꞌ maratait aruani da ifa tauf bampun
23 da isau Aranga rini uriatsan, da itip iba da ini da agai i ribarangan itsanga angira iruꞌrun, da angira ini, ‘Arangan imunti marataꞌ sib.’
24 Da aga gangꞌ fain ifa tauf bampun da itsanga nam ibi sagat ruas nidan, da anungꞌ itsanga Arangan u.”
25 Ida Yisu ini da ribarangan, “Agam uwayantam imaꞌ da agam wangum ibabampaf da anungꞌ imuaruts nan profet nidan ugu!
26 Ibianungꞌ? Mani agam wasruꞌ gin ibi Kristus, Garam Anutu ragadan, nayu barabin ani sib raiyi da namus fada mumai gan tsarifan da uda bingan tsiraꞌ gin?”
27 Da Yisu idziwar i ribarangan i nan miamun santan Moses da profet ruas akara yaba i Arangan ugu.
28 Gubuꞌ ribarangan fa suda uts gamp fada gin igi da Yisu irib inang ibi rungꞌ fadan.
29 Da bitsintaꞌ ribarangan igaib runggan da irim udzungꞌ rutin, da ini, “Nam inuf wasi da gubuꞌ maran intsup, da warut aga nampai.” Ibinigi da Arangan yatangꞌ ifan i ruta ribarangan mpadan.
30 Gubuꞌ Arangan ruta ribarangan mpada i gada nam, da Arangan iyu bret da ifinti da ibrang da irim da ribarangan.
31 Ida rib iruꞌ igi maran intap ruan da isruꞌ i Arangan, da Yisu intsup utaꞌ angu imingꞌ ribarangan maran.
32 Tuas arangan ini nan da ruan ibiani, “Agi wangunggangꞌ iparatat i nan da gubuꞌ aru Arangan ruta agi nida nan da dziwara i nan akaran da agi mingꞌa sanab ugu!”
33 Da gubuꞌ maran arigi da tuas aranga yuriꞌ sung angu da itip ifa Yerusalem da iwaꞌ da rib 11 ruta rib fain mpruꞌa ruan igi.
34 Da ribigi ini da rib iruꞌ igi, “Nigi nan nidzun bingan, Nifutsarif imunti marataꞌ sib da iwaꞌ da Petrus.”
35 Ida rib iruꞌ igi ifis i nam idzuwai waꞌan da ribarangan mingꞌa sanab, da sruꞌa i Yisu da gubuꞌ aru Arangan branga bret.
Yisu Isantingꞌ Runggan Wasi da Riban Atsungꞌa Gin
(Matiu 28:16-20; Markus 16:14-18; Yowanis 20:19-23)
36 Gubuꞌ ribarangan rungꞌ nidan nan igi da ruan, da Yisu runggan iwaꞌ imunti wasaꞌ i ribarangan, da ini, “Nan nufan narut agam.”
37 Ribarangan santan irunt fafun da irat, i maran ifur ibi itsanga garam ganun.
38 Da Arangan ini da ribarangan, “Ibianungꞌ da agam irat da uwayant isu iruꞌ i nam agam tsangandan?
39 Watsangan dzi bangingꞌ da dzi fagangꞌ, i dzi arangan ani! Warim bangim i dzi da watsangan. Garam ganun anungꞌ isu nidzun da urungun ibi dzi aru agam tsangandan ani u.”
40 Gubuꞌ Arangan nida nan igi da isantingꞌ bangin da fagan da ribarangan.
41 Da ribarangan ruwamuaruts i wain nam nugun tsiaꞌan da maran fura nan isisungꞌ ribarangan, da Arangan igut in, “Agam nam gadan gam fain rumingꞌ i gadan?”
42 Da ribarangan irim yafas taidan mangan da Arangan,
43 da Arangan iyu da igan imingꞌ ribarangan maranggan.
44 Da Arangan ini da ribarangan, “Gubuꞌ dzi ruta agam mpadan ugu da dzi ni nan sib da agam: Nan sib angu akara yaba i dzi mingꞌa Moses nan gan faidagin da profet ruas da Mint Tsarifa Anutu Gin ugu nasu nidzun.”
45 Ida Arangan itus muantsi i ribarangan uwayantan i ribarangan sruꞌa i nan akaran wainggan.
46 Da ini da ribarangan, “Yakar nan ibiani, Kristus bungꞌ awaꞌ da nam tsakia da namamp, da gubuꞌ suda iruꞌ da bits, da namunti marataꞌ.
47 Da garam bungꞌ afis i Arangan bingangan nafan da garam utup santan, i garam parima i ruan, da Anutu siata i nanggan maisan rai. Bungꞌ ais fagan gin namingꞌ Yerusalem da nafan.
48 Agam wafis i nam santan agam tsangandan.
49 Waringantin, dzi bungꞌ atangin Arangan aru Ramangꞌ ragadan naba, da bitsintaꞌ agam wampai Yerusalem ani nasangꞌ nampang wagungꞌ yantsanga agam.”
Yisu Iyab Gunungun
(Markus 16:19-20; Aposel 1:9-11)
50 Da Yisu imungꞌ i riban atsungꞌa gin iwaꞌ ifa Betani da iraꞌ i bangin da ifinti ribarangan.
51 Gubuꞌ rungꞌ fintida ribarangan, da Anutu iyu Arangan sinungꞌ ribigi iyab gunungun.
52 Da ribarangan idzaꞌ fagan da itsarif Arangan da itip ifa Yerusalem ruta nugun tsiaꞌan tsiraꞌ.
53 Da gubuꞌ santan da ribarangan ifa Ungar Mararam da irim runggan santan i tsarifa Anutu.