9
Yisu Itangin Aposel 12 Ifan
(Matiu 10:5-15; Markus 6:6-13)
1-2 Gubuꞌ Yisu nuꞌa riban 12 igi mpruꞌan, da Arangan irim nampang rutin da itangin ribarangan ifa ruta nan ragadan i daruda marapayam maisan rai i garam da nanga rini gingꞌan mara maran dauman da fisa i sisingꞌ bini Anutu nanggan mpada tayangꞌ gan garaman.
3 Da Yisu ini da ribarangan, “Gubuꞌ agam nida yunga fadan, da anungꞌ uda nam fain u — itip yunga gin, ma tayap farangꞌa nam in, ma nam gadan, ma moni, ma anungꞌ uda ngarukui iruꞌ u.
4 Ungar idzuwai agam fawaꞌa gin da mpada gin, da wampai arigi nasangꞌ agam tanginda gamp igi rai.
5 Da bida garam santan mamida uda agam yaban, da gubuꞌ agam tanginda gamp igi rai da watias faga ngaruntsuafam igi rai, i santingꞌa Anutu nugu tsakia gan.”
6 Ibinigi da ribarangan ifa gamp gamp da ifis i sisingꞌ bini da inang garam rinin gingꞌan idaum.
Yowanis Ruruba Garam Nanggan Mampan
(Matiu 14:1-12; Markus 6:14-29)
7 Da Herot, garam gudzun Galili, iringanti i nam santan waꞌan igi sisingꞌ gan da arangan iyu uwayant ampi bingan gin. I rib fain ini ibiani, “Yowanis Ruruba Garam mampan ugu itip yuriꞌ,”
8 da garam fain ini, “Profet Eliya ibawaꞌ,” da faingꞌ ini, “Mani profet ruas ratar ugu mangan itip imunti marataꞌ.”
9 Da Herot ini, “Dzi saf Yowanis wan utap da bitsintaꞌ garam idzuwai igi aru dzi ringanta i nan gan ani?” Da arangan intsaꞌ i waꞌan da Arangan.
Yisu Irim Nam Gadan da Garam 5,000
(Matiu 14:13-21; Markus 6:30-44; Yowanis 6:1-13)
10 Gubuꞌ aposel ruas batipa waꞌa sib, da ifis i nam ribarangan nangan ugu santan da Yisu. Ida Yisu iyu ribarangan angu da impruꞌ ruan fada gamp manga nida Betsaida gin.
11 Da bitsintaꞌ ampi tsiraꞌ isruꞌ i Yisu gan fada gin igi sib da yatsungꞌ Arangan. Da Yisu yis yaring gin, da ifis i Anutu nanggan mpada tayangꞌ gan garaman da ribarangan, da itip garam rinin gingꞌan iwaꞌ bini.
12 Nam inuf sib da aposel 12 igi iba da Yisu da ini da Arangan, “Wani da ampi ani nadzarang nafa gamp uts uts mingꞌa ani i sauda nam gadan da mumai gan gingꞌa gin. I agi mpa nam manaꞌ nam gadan maꞌa gin.”
13 Da Yisu ini nan mungaꞌ, “Agam runggam warim nam gadan rutin.”
Da ribarangan itip ini, “Aga yu bret isiꞌ 5 da yafas iruꞌ angu, da bida agai nida rima nam gadan da ribani, da agai nafa baim nam asangꞌ ampi tsiraꞌ bingan ani!”
14 (I garam ampi igi garam runggan isangꞌ 5,000.)
Da Yisu ini da riban atsungꞌa gin, “Wani da ribarangan 50 nampruꞌ ruan nampai nasangꞌ utup utup.”
15 Yisu riban atsungꞌa gin inang ibinigi da garam santan impai iruꞌ.
16 Da Yisu iyu bret 5 da yafas iruꞌ igi, da idantang iyab gunungun da yugin i nam igi da ibrang. Ida Arangan irim da riban atsungꞌa gin i faban da garam santan.
17 Da ribarangan igan da isuf wasi, da nam gadan pupumuts fain rumingꞌan, da intsungꞌ da ifarangꞌ basket 12 da ifungꞌ.
Petrus Ini Yisu Garam Idzuwai
(Matiu 16:13-20; Markus 8:27-30)
18 Gubuꞌ mangan da Yisu irut riban atsungꞌa gin angu impai da Arangan runtaꞌ yugin, da Arangan igut i ribarangan, “Amaꞌ, ampan santan ugu ini dzi mangan?”
19 Da ribarangan ini, “Rib fain ini Yowanis Ruruba Garam, da rib fain ini Eliya, da fain rungꞌ ini, ‘Mani profet ratar ugu mangan igi itip imunti marataꞌ.’ ”
20 Da Yisu igut i ribarangan, “Da agam? Agam ibuni manga i dzi?”
Da Petrus ini, “Agu Garam Anutu Ragada mungꞌ i rima garaman sib.”
21 Da Yisu ifai nan i ribarangan i anungꞌ nida nan igi wasi da rib fain u.
Yisu Ini Nanggan Mampan Wasi
(Matiu 16:21-28; Markus 8:31-38)
22 Da Arangan rungꞌ ini, “Garam Narunggan bungꞌ awaꞌ da barabin ampi bingan namingꞌ garam banginggan. Garam gudzun Israil, da garam pumuꞌa Anutu wain gudzun gan, da garam gudzupuꞌ i Nan Faidagin bungꞌ asiat Arangan rai da bungꞌ ais funub, da gubuꞌ suda iruꞌ da bits da Arangan bungꞌ amunti marataꞌ.”
23 Da Yisu ini da garam santan, “Bida manga nida atsungꞌa dzi da narim barun da wangunggan da maranggan furan, da gubuꞌ sib angu da nabuaringꞌ gai mpara i ruan gan da natsungꞌ dzi.
24 I garam maran fura i rima runggan sib i nanggan mpada bini mingꞌa intap ani, da bungꞌ arim ganunggan rai, da bitsintaꞌ garam rima runggan rai i dzi, da bungꞌ arim ganunggan sib.
25 I bida garam ufuma nam bunump santan intap ani, da rima ganunggan rai, da nigi naburim arangan sib nabianungꞌ?
26 Da bida manga rinin miaꞌa i dzi da nan gangꞌ, da dzi riningꞌ bungꞌ amiaꞌ gin da gubuꞌ dzi, Garam Narunggan, tipa badan da santingꞌa dzi da Ramangꞌ da angira mararam nanggangꞌ puatsadan wasi.
27 Dzi ni nan nidzun bingan da agam, rib fain rungꞌ muntida aruani bungꞌ atsanga Anutu nanggan mpada tayangꞌ gan garaman sib raiyi, ida namus mampan.”
Petrus, Yowanis, da Dzems Itsanga Yisu Nanggan Puatsadan
(Matiu 17:1-8; Markus 9:2-8)
28 Gubuꞌ bida 8 fada sib i nan Yisu nidan igi, da Arangan iyu Petrus, Yowanis, da Dzems iyab mamai i udagin.
29 Da gubuꞌ Arangan rungꞌ udagin da Arangan maran iwaꞌ maran mangan, da ngarukui gan iningining ibi tsuarip.
30 Da sung angu garam iruꞌ, Moses da Eliya, iwaꞌ da irut Yisu ini nan.
31 Rib iruꞌ igi imunti ruta nam puatsadan, da ini nan i Yisu nanggan mampan bungꞌ awaꞌ uts angu namingꞌ Yerusalem i sangꞌa Anutu nan gan ragada sib.
32 Petrus da rib ruta arangan igingꞌ marampruꞌ, da bitsintaꞌ gubuꞌ ribarangan maran taꞌan da itsanga Yisu nanggan puatsadan da rib iruꞌ muntidan mpruꞌan.
33 Da gubuꞌ Moses da Eliya nanga i tanginda Yisu rai, da Petrus ini da Yisu, “Tsiraꞌ, bini angu i aga ruta agam mpada ani; aga naraf marayawaꞌ iruꞌ da bits nasangꞌ agam — agu, da Moses, da Eliya.” (Petrus anungꞌ isruꞌ i nan gan nidan igi u.)
34 Gubuꞌ arangan rungꞌ nida nan da maraum iwaꞌ da ibuafir ribarangan sib, da gubuꞌ maraum nanga i buafiran da ribarangan irat.
35 Da nifun mangan iwaꞌ imingꞌ maraum wasaꞌ da ini, “Nani dzi Narunggangꞌ aru dzi ragadan ugu; waringant i Arangan.”
36 Gubuꞌ nifun nan igi waꞌa sib, da ribarangan itsanga Yisu runtaꞌ angu rungꞌ muntidan. Da ribarangan anungꞌ ifis i nam tsangandan igi wasi da rib fain isangꞌ gubuꞌ guntiꞌ bingan.
Yisu Idaru Marapayam Maisan Rai Sinungꞌ Mamaꞌ Marub Mangan
(Matiu 17:14-21; Markus 9:14-29)
37 Da maiꞌ mangan da ribarangan iruꞌ mamai iba, da ampi tsiraꞌ iwaꞌ da Yisu.
38 Da garam manga mingꞌa wasaꞌ i ampi tsiraꞌ igi inuꞌ, “Kidungwaga tsiraꞌ, dzi gampun runggangꞌ da agu i u tsanganda dzi narunggangꞌ marub. I dzi narunggangꞌ bitsintaꞌ arangan igi.
39 Marapayam maisan inang da iyantsang arangan da sung angu arangan iyaiꞌ tsiraꞌ. Da yuntsiang i arangan da nifu fufuat iwaꞌ i nifun. Maiꞌ maiꞌ da marapayam maisan igi yis arangan da iwaya nidzun angu da gubuꞌ ampi bingan da wasangꞌ i tirida arangan rai.
40 Dzi gampun runggangꞌ da u ribam atsungꞌa i agu i daruda marapayam maisan igi rai, da bitsintaꞌ ribarangan anungꞌ isangꞌ u.”
41 Da Yisu ini nan mungaꞌ, “Agam yangin gubuꞌ aruani, agam garam nanggam muarutsan maꞌan da mamida atsungꞌa sanab rururungan! Dzi rut agam impai gubuꞌ guntiꞌ bingan, da gubuꞌ idzuwai da agam muarutsan? Wayu narunggam igi naba.”
42 Gubuꞌ mamaꞌ igi yunga fadan da Yisu, da marapayam maisan itapu arangan iruꞌ intap da yuntsiang i arangan. Da bitsintaꞌ Yisu impiꞌ marapayam maisan i tirida mamaꞌ igi rai da rinin dauman, da itip itangin arangan ifa da ramanggan.
43 Da garam santan irunt fafun gin da maran ifur nan i Anutu nampanggan tsiraꞌ igi.
Yisu Itip Ini i Nanggan Mampan
(Matiu 17:22-23; Markus 9:30-32)
Gubuꞌ rib santan maran rufura nan i nam Yisu nangan da gubuꞌ santan, da Arangan ini da riban atsungꞌa gin ibiani,
44 “Agam warim ringam bini angu i nan dzi nidan da agam ani! Garam mangan bungꞌ arim Garam Narunggan nafa garam ipiap banginggan.”
45 Da bitsintaꞌ nan igi imingꞌ isu marapatiꞌ da ribarangan i anungꞌ sruꞌa i nan igi wainggan, da ribarangan irat i guta i Arangan.
Manga Bungꞌ Asu Miamun?
(Matiu 18:1-5; Markus 9:33-41)
46 Yisu riban atsungꞌa gin yudzungꞌ i nan da ruan i manga suda miamun i ribarangan.
47 Da Yisu isruꞌ i ribigi wangunggan rima udzungꞌ da ruan gin igi, da iyu mamaꞌ narun isiꞌ mangan iba munti isarimp Arangan.
48 Da Yisu ini da ribarangan, “Manga isa yaringꞌ i mamaꞌ narun mangan bida ani i atsungꞌa dzi, da yis yaringꞌ i dzi. Da manga isa yaringꞌ i dzi, da yis yaringꞌ i aru tanginda dzi badan ugu. I manga aru rasuda runggan wasaꞌ i agam santan da nigi isu miamun.”
49 Da Yowanis ini, “Tsiraꞌ, aga tsanga garam mangan isiat marapayam maisan i u binganggam, da aga ni da arangan i tanginda rai, i arangan anungꞌ irut agai yatsungꞌ agu u.”
50 Da Yisu ini, “Anungꞌ muntida sib in u, i garam mamida rima ipiap i agam da nigi su agamam mangan.”
Garam Samaria Anungꞌ Yis Yaring i Yisu
51 Gubuꞌ uda Yisu fada gunungun ibasu uts da Yisu irim uwayantan santan i fada Yerusalem.
52 Da Arangan itangin garam sisingꞌ imungꞌ da yatangꞌ Samaria gampan mangan i rima sisingꞌ i tipa ruan i Arangan.
53 Da bitsintaꞌ garam gamp mingꞌa nigi anungꞌ yis yaring i Arangan u, i wain, Arangan ini fada Yerusalem.
54 Gubuꞌ garaman atsungꞌa gin iruꞌ Dzems da Yowanis tsanganda nam igi da igut in, “Nifutsarif, u maram ifur i agai nuꞌa dzaf mingꞌa gunungun ruꞌa ba da gada rib arani?”
55 Da bitsintaꞌ Yisu itaningꞌ da impiꞌ ribarangan,
56 da ribarangan ifa gamp mangan.
Sanab Atsungꞌa Yisu
57 Gubuꞌ rungꞌ yunga sanab fadan, da garam mangan ini da Yisu, “Dzi bungꞌ atsungꞌ agu i sanabam idzuwai u yunga gin.”
58 Da Yisu ini nan mungaꞌ, “Iyam buman igingꞌ bampun gan, da apu dzufa maranguntung wagungꞌ irim gitan. Da bitsintaꞌ Garam Narunggan ungaran gingꞌa isa gudzunggan gin imaꞌ.”
59 Da Arangan itip ini ifa da garam mangan, “Watsungꞌ dzi.”
Da bitsintaꞌ garam igi itip ini nan mungaꞌ, “Nifutsarif, watangin dzi da dzi nampai nasangꞌ dzi dzufungꞌa ramanggangꞌ sib raiyi.”
60 Da Yisu ini da arangan, “Wanang da rib mampan narim garaman mampan, da bitsintaꞌ wafan da wafis i sisingꞌ Anutu nanggan mpada tayangꞌ gan garaman.”
61 Da garam mangan rungꞌ ini, “Nifutsarif, dzi bungꞌ atsungꞌ i agu, da bitsintaꞌ wanang da dzi natip afan da nasu nam pas da narata utupangꞌ bangin raiyi.”
62 Da Yisu ini, “Garam gifa nam makau dzungꞌa gin da safa intap da tida taningꞌa fada barun wadaum i nanga gum i Anutu nanggan mpada tayangꞌ gan garaman u.”