2
Santingꞌa Nan Nidzun da Utup Utup
1 Da bitsintaꞌ agu, wafis i nan da ampan natsungꞌ nan nidzun rururungan.
2 Wautus garam tsiraꞌ tsiraꞌ i mpada tayangꞌ nanggan mpadan i anungꞌ yusa ampapan, da uwayantan bini da rururungan mpada tayangꞌ runggan i nanggan santan nangan, da maran arida nidzun i ampan, da muarutsa nidzun, da muntida babampafan i gubuꞌ bini da maisan.
3 Da wautus sagat tsiraꞌ tsiraꞌ nabinigi i tsanganda runggan sib i nanggan mpadan da yungan rima bingan tsiraꞌ da Anutu, da anungꞌ nida nan barungantsang, ma anungꞌ nangan da mpui ngkiangan suda wain gin u, da bitsintaꞌ nasantingꞌ sanab bini angu.
4 I sanab bida nigi da ribarangan isangꞌ i santingꞌa sagat faꞌ faꞌ i sanab maran arida i gan gabun rusan da narun rusan bini,
5 da uwayant bini mpada tayangꞌ runggan i nanggan santan nangan, da atsungꞌa sanab dzidziwandan ruta wangun sapan, da maran furan gan guman nangan mingꞌa gan ungaran da gubuꞌ santan, da nanga bini angu i rib santan, da atangꞌa warangꞌ i gabunggan. Natsungꞌ sanab bida nigi i mangan anungꞌ nida nan maisan i Anutu nan gan u.
6 Da wafai nan i garam rinifaꞌ nabinigi i uwayant bini mpada tayangꞌ runggan i nanggan santan nangan.
7 U nanggam bini nangan santan nasu sanab ribarangan atsungꞌa gin. U nan gam fisa gin da wafisin ruta wangunggam santan da wayung wayab in da anungꞌ rima umpur i Anutu nan gan u.
8 Wafis i nan nidzun rururungan i ampan mangan anungꞌ tsanganda asub in u. I bida nigi da rib rima ipiap i agi bungꞌ asau nan maisan wasi i nida yaba i agi, da rinin bungꞌ amiaꞌ.
9 Wafai i nan i mamaꞌ gum utaꞌ i atangꞌa warangꞌ i gan garam gudzunggan i nanggan santan nangan bida ani: nanga i nugun tsiaꞌan, da anungꞌ dzanga i nan rutin
10 ma wayada i nanggan, da bitsintaꞌ sanaban nasantingꞌ nabi garam gudzunggan isangꞌ i rima nam santan i banginggan i mpada tayangꞌ gin. Ribarangan nanang nabinigi i ampan tsanganda i nanggan mpadan da maran aridan i ringanta i Anutu, aru rima agi sib, nan gan.
11 I wain ibiani, Anutu maraampi gan iba kupis ruan wasi da isangꞌ i rima garam santan sib.
12 Da yutus agi i rima barungꞌ da sanab maisan da nam wangun akatsan intap ani gan, da atsungꞌa uwayant bini i mpada tayangꞌ runggangꞌ, da atsungꞌa sanab rururungan da mararam sangꞌa Anutu maran arida gin da gubuꞌ agi mpada intap ani.
13 Da agi nanang nabinigi da gubuꞌ aru agi rumpada rima marangꞌ i gubuꞌ nugun tsiaꞌan agi Anutu gangꞌ tsiraꞌ Yisus Kristus, Garam rima agi sib, tipa badan da kupisa runggan wasi ruta rini gira gan da puatsadan gan da binganggan tsiraꞌ.
14 Arangan irim runggan rai i uda agi sinungꞌ nam maisan da nanga agi wangunggangꞌ sapan i agi suda Arangan garaman rururungan da wangun fripan i nanga nam bini angu.
15 Ibinigi da wafis i nan santan igi da warim garam muarutsan sib i muntida babampafan da wasantingꞌ i gan nanggan maisan wasi. Wanang nam santan igi ruta nampang da bingan Anutu riman da agu. Da anungꞌ nangan da garam manga rasuda u nan gam ma rima barun da agu u.