7
God ai Israerɨhündɨ 144,000 nindou ranaheimbo sürü pamareandürɨ
1 Muŋguambo ranɨ-moatükunɨ ranai refehayambo-yoane, asu ro hoeirɨheandane, sünambeahɨndɨ nendɨ yimbuyimbu ranai hɨfɨ muŋguambo yimbuyimbu ranɨ hɨmboranɨ-kɨmɨ waranɨründümo manɨŋgomo. Ranɨyomo asu yimbuyimbu werɨ ra kɨkɨhɨründümo warambe manɨŋgomo. Rananɨmbo asu werɨ ranai ŋgɨrɨ mamɨ ai-amboanɨ hɨfɨ ranɨh-ane, sɨrɨwara ambe-ane, hoe-ane asu nɨmɨ ranɨwam-ane ra ŋgɨrɨ werɨndo yahomo houmbo.
2-3 Ranɨyahɨ asu ro hoeirɨhinane, sünambeahɨndɨ nendɨ mamɨ ranai hüfɨhamɨndɨ süfuanɨpoedɨ God yaŋgɨrɨ nüŋgumbündɨ-mayo sürü pare-randeimbɨ semündü haya masüfu. Asu ranɨyu sünambeahɨndɨ nendɨ yimbuyimbu-memo sapo God ŋgɨnɨndɨ masagapura hɨfɨ asu sɨrɨwara moaruwai-mbofembo-memo ranahamumbo puküna mɨŋgɨyu hoafɨyuhü yahuya, “Awi se hɨfɨ, sɨrɨwara, asu nɨmɨ napo ranahambo nɨmai yowanɨ moaruwaimbo-fepoanɨ. Ŋga yɨhoefɨ Godɨndɨ ratüpurɨyei-rɨhündeimbɨ ranaheimbo ahei gɨrɨbodɨ hamɨndɨwamɨ sürü pare-randeimbɨnambo pandɨhundan-anɨmbo, se ranɨ moatükunɨ moaruwaimbo-ndundɨ,” mehu.
4 Nindou ranaheifihɨ sürü apaiaro ra hɨmboyahane, 144,000-mayo. Nindou ranai ana 12 mamɨsɨrɨ Israerɨhündɨ-yei asu ai mamamɨ mamɨsɨrɨ ranambeahɨndɨ 12,000-yei.
5 Sudandɨ sɨrambeahɨndɨ 12,000,
Rubenɨndɨ 12,000,
Gadɨndɨ 12,000,
6 Asandɨ 12,000,
Naptarindɨ 12,000,
Manasendɨ 12,000,
7 Simionɨndɨ 12,000,
Rifaindɨ 12,000,
Isakarɨndɨ 12,000,
8 Seburunɨndɨ 12,000,
Sosepɨndɨ 12,000
asu Bensaminɨndɨ 12,000.
Ranɨ nindou ranaheimboyo God ai wand-anei yahu sürü pamareandɨ.
Nindou Afɨndɨ ai Godɨmbo hohoanɨmoyeihɨ aboed-ani sei arɨhündɨ
9 Ranɨ-moatükunɨ ranai refehayambo-yoane, asu asükaiya hoeirɨheandane, nindou afɨndɨ hamɨndɨ ranai manɨmboei asu ranaheimbo ŋgɨrɨ mamai amboa tapuindürɨ. Nindou ranai ana muŋguambo hɨfɨhündɨ, muŋguambo sɨrɨ, muŋguambo fi-hoearɨ, asu muŋguambo hoafümbɨ-yei manɨmboei. Ai Godɨndɨ nɨmarɨfondɨ Sipsip Nɨmorɨ-mayu ranahandɨ haŋgɨfoanɨ-yei kɨfohɨ hoearɨ yihuruyei mburɨhü asu hɨhɨfɨ-hɨhɨfɨyeihɨ mbeyemü waramberɨhümündi hehi burɨmayei.
10 Ai puküna hoafɨyeihɨ seiya,
“Yɨhoefɨ God ai adükarɨ bogorɨndɨ nɨmarɨ-fondɨwamɨ amaru
asu Sipsip Nɨmorɨ-dɨbo yɨhoefɨmbo aboedambo-rɨneamunɨ arɨnandɨ,”
masei.
11 Sünambeahɨndɨ nendɨ muŋguambo ai bogorɨ nindou-yomo asu yaŋgɨrɨ noŋgoweimbɨ moatükunɨ yimbuyimbu-mayei ranɨyei ai Godɨndɨ nɨmarɨ-fondɨ ranahambo wakɨrɨhi hehi burɨmayei. Ranɨyei asu ai Godɨndɨ nɨmarɨ-fondɨ ranɨ haŋgɨfoanɨ pütapɨyei amoyareimbo Godɨmbo hohoanɨmo-rɨhorühɨ aboed-ani masahündo.
12 Ai seiya,
“Anɨhond-ane!
Yɨhoefɨ God ranahambo hoafɨyefɨhüya,
‘Ai hɨmboamupui-randeimbɨ,
aboedɨ fɨfɨreandeimbɨ,
ndürɨ adükarümbɨ,
asu hɨfandɨmbo ŋgɨnɨndeimb-ani.
Koadürümbo koadürümbo ahambo hɨhɨfɨndɨhurühɨ aboed-ani,’ mbɨsefɨmboane,”
masei.
13 Ranɨyo asu boagɨrɨ mamɨ ai wambo hoafɨyundɨrühɨ yahuya, “Nindou dɨdɨyei hoandarɨ hoearɨ kɨfohɨ ra güdɨmarɨhinda? Ai nahanɨ-poedɨyeia?” mehu.
14 Ro sɨmborɨ hoafɨyahɨndowohü sahɨya, “Ape, se fɨfɨrarowandɨ,” masahɨ.
Ai yahuya, “Nindou ranai tɨŋɨrɨfoyo asu asübusɨ afɨndɨ ranambeahɨndɨ aboedambo tükümehindɨ.
Ai Sipsip Nɨmorɨndɨ horambe ahei hoandarɨ hoearɨ boboemarɨ-hünda kɨfohɨmayo.
15 Ranɨmbo-hündamboane, ai Godɨndɨ nɨmarɨ-fondɨ haŋgɨfoanɨ anɨmboei.
Ai ahandɨ worambe nɨmbɨ-nɨmbɨsi ratüpurɨyei arɨhündɨ.
16 Ai ŋgɨrɨ asükaindei wembombondei asu amɨndanɨŋo-mbondei.
Hüfɨhamɨndɨ ranai ŋgɨrɨ aheimbo tagɨndandürɨ,
asu hüfü amboa ŋgɨrɨ tagɨndandürɨ.
17 Nɨmboe sapo sipsip nɨmorɨ adükarɨ bogorɨndɨ nɨmarɨ-fondɨ mbusümondühɨ anüŋgu
ai ahei hɨfandɨrandürɨ-randeimbɨ-ndümbui.
Ai aheimbo ndemündündürɨ ŋgu yaŋgɨrɨ nɨŋgombo hoe sowahɨ tükündahimboyei.
Asu God ai ahei hɨmboar-ambeahɨndɨ aranɨhɨmboaho gedüherümbui,”
mehu.