18
Ya Kaperdi Na Ili Na Babilonya
1 A ta kabalinan na kumanen a naitak ya takwan na anghel nga umakban ta lutak, te nagafu ta langit. A pake dakal hapa ya turay na te nadakaran ya lutaken gafu ta kalalaki na bari na en.
2 A sangaw a nagayag ta masikan:
“Awan na, awan na ya Ili na Babilonya nga kadakalan na ili.
Te nagbalin na ta pagyanan na anitu kiden,
ikid na ngamin kiden espiritu nga dulay, ikid na mamanuk nga magkan ta bilsag na nasi.
3 Pina-gang na Namaratu ya ili in
gafu ta sa pinagillaw na ya ngamin tolay
ta binarayang na pakikadallaw na en tekid,
a gafu ta pinagliwat na hapa ya magturay kiden ta pakikadallaw na tekid,
te pinagba-nang na hapa ya maglaku kiden gafu ta pagkaragāt na tolay kiden ta pakikadallaw na en tekid,”
kun na anghelen teyak.
4 A sangaw nadangag ku hapa ya takwan na maguhohug ta langitewan:
“Ikamuy nga tolay ku, umadayu kanan ta makikadallawina,
petta awemuy mekabkabat ta liwat na kidina ikid na pangpa-gang ku tentu,
5 te nahuttul na ya liwat na kiden abat ta langit,
a iparan na Namaratu ya pangpa-gang na tentu.
6 “Aran, ibalat muy na ya liwat na ili ina,
te atadan muy ta kuman na neatad na ta kadwan,
ammi doblen muy ya pangpa-gang muy tentu,
te ya dulayen nga nepenum na ta kadwan a masmasikan ya ipenum muy tentu.
7 Am anu ya kasikan na pagparayag na ikid na pagragsak na ta idi
a kuman en hapa ya iatad muy ta zigat na ikid na damdam na,
te kuga maparayag ya nonot na.
‘Anu hud ya burungan ku bakawa ari yak haman na babbay, a awek haman nabalu, te addu ya lālākik kiden,” kunna.
8 “A yen ta gulpe sangaw ya ngamin kiden zigat na,
te sa maggagindan ya bisin, ikid na pasi, ikid na damdam ta takday la na araw.
A maapang sangaw ta afuy, te masikan ya Namaratu nga mangpa-gang tentu,” kun na anghelen teyak.
9 A pake madamdam mantu sangaw ya ari kiden nga nangkadallaw tentu ikid na nakipagragsak tentu, te am maita da sangaw ya asok na ili en a pake makatangtangit kid na.
10 A umadayu kid hapa sangaw tentu nga makatangtangit, te yaga magburung kid sangaw ta mekabkabat kid hapa ta pangpa-gang na Namaratu ta ili en.
“Agayoy, agayoy, ta ili tamewan nga Babilonya. Piga la ya pangpa-gang na Namaratu tentu, pade awa malalaki na ili,” kunda sangaw.
11-13 A makatangtangit hapa sangaw ya maglaku kiden, te awan na sangaw ta gumātāng ta ilaku da nga balituk, ikid na pirak, ispot na batu, perlas, ga-gamit, bangog, kayu, tulang, baronsi, landuk, kanela, rikado, binarayang, denu, arena, baggat, baka, kalding, kabayu, lugan, yaga tolay para nga pagtagabun da.
14 (-)
15 Ta idi a nagba-nang kid ta ngamin kiden nelaku da ta tolay kiden ta ili na Babilonya, ammi sangaw gafu ta naperdin ya ili en a magyan kid la ta adayu nga makatangtangit, te yaga magburung kid hapa, te mekabkabat kid hapa ta pangpa-gang na Namaratu.
16 “Agayoy, agayoy, ta ili tamewan,
pade awa ispot paen ya pagbarawasi na tolay na kiden ta darag ikid na asul.
A ispot paen ya nesigal da kiden, ikid na aritut da kiden nga balituk ikid na perlas, ikid na mangina na batu.
17 A piga la ya kaperdi na ngamin pagba-nang na ikid na kalalaki na,” kunda sangaw.
A kumanen hapa sangaw ya damdam na itta kiden ta bapor da kiden ta bebay, ya kapitan da ikid na magtarabaku kiden kontodu ngamin makilugan,
18-19 te am maita da hapa sangaw ya asok na ili en ta adayu, a makatangtangit kid hapa sangaw gafu ta damdam da ta ili en.
“Agayoy, agayoy, ta ili tamewan.
Itta hud ya takwan na ili nga malalaki ta kumanewan?
Te intu paen ya nangalapan tam ta pagba-nang tam gafu ta karga na bapor tam kiden nga ginatang da.
A piga la ya kaperdi na in,” kunda sangaw.
20 Ammi ikamuy nga magyan ta langit a magayayat kanan, te pina-gang na Namaratu ya nakaliwat. Sa magayayat kanan, ikamuy tolay na Namaratu, ikid na ikamuy turin na ikid na paguhohugan na, te pina-gang nan ya dulayen babbay gafu ta iningwa na en tekamuy.
21 A sangaw itta ya masikan na anghel, a inakkat na ya dakal na batu ta kuman na kadakal na aggilingan, kapye na newarad ta bebay. A ya nebar na en hapa a
“Kumanin sangaw ya pa-gang na ili na Babilonya,
te medangkak sangaw ta lutak, a awan na sangaw.
(v 14) A awan na sangaw ya ngamin kiden karagatan na tolay na kiden,
te imawan na sangaw ya ngamin pagba-nang na ili in ikid na kalalaki na, a aweda sangaw metoli tentu.
22 Awan na sangaw ta sitang na gitara, ikid na tokar,
ikid na kansyon ta agyan na kalsada na kiden ikid na babali.
A awan na sangaw ta magtarabaku tentu,
ikid na mamadday ta gagangayen paddayan na tolay, a awan na sangaw ta magbayu.
23 A awan na sangaw ta hilag nga magpadakar tentu,
te awan na sangaw ta sitang na magayayat ta kuman na magboda.
Kumanin sangaw ya dumatang ta ili in, te ya maglaklaku kiden tentu ya nagbalin ta kuman na ari kiden ta paglelehutin,
a inayayyaw da ya tolay kiden gafu ta sistema na paglaku da.
24 A intu para liwat na ya pasi na tolay kiden na Namaratu,
ikid na aglavun na kiden, pase ngamin kiden napapasi ta lutakin,” kunna.