20
ܡܬܠܐ ܕܦܠܚ̈ܐ ܘܟܪܡܐ
1 ”ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐܢܵܫܵܐ ܡܵܪܵܐ ܕܒܲܝܬܵܐ ܕܦܠܝܼܛ ܠܹܗ ܒܩܲܝܕܵܡܬܵܐ ܓ̰ܲܠܕܹܐ ܠܸܕܒ݂ܵܩܵܐ ܦܵܥ̈ܠܹܐ ܩܵܐ ܟܲܪܡܹܗ.
2 ”ܡ̣ܢ ܒܵܬܪ ܕܩܛܝܼܥ ܠܹܗ ܥܲܡ ܦܵܥ̈ܠܹܐ ܕܝܼܢܵܪܵܐ ܒܝܵܘܡܵܐ، ܫܘܼܕܪܵܝ ܠܹܗ ܕܦܵܠܚܝܼ ܓܵܘ ܟܲܪܡܹܗ.
3 ”ܘܦܠܝܼܛ ܠܹܗ ܡܸܢܕܪܸܫ ܒܣܵܥܲܬ ܕܬܫܲܥ ܕܩܲܝܕܵܡܬܵܐ، ܘܚܙܹܐ ܠܹܗ ܐܚܹܪ̈ܢܹܐ ܟܸܠܝܹܐ ܒܫܘܼܩܵܐ ܒܲܛܝܼܠܹ̈ܐ.
4 ”ܐܡܝܼܪܹܗ ܐܸܠܵܝܗܝ: ’ܙܹܠ݇ܡܘܼܢ ܐܘܼܦ ܐܲܚܬܘܿܢ ܘܦܠܘܿܚܘܼܢ ܓܵܘ ܟܲܪܡܝܼ، ܘܡܸܢܕܝܼ ܕܘܵܠܹܐ ܝܠܹܗ ܒܸܬ ܦܵܪܥܹܢܵܘܟ݂ܘܿܢ.‘ ܘܐܙܝܼܠܔ ܠܗܘܿܢ.
5 ”ܦܠܝܼܛ ܠܹܗ ܡܸܢܕܪܸܫ ܒܣܵܥܲܬ ܕܬܪܸܥܣܲܪ، ܘܒܣܵܥܲܬ ܕܬܠܵܬ ܡ̣ܢ ܒܵܬܪ ܟܵܘܸܬܪܵܐ، ܘܥܒ݂ܝܼܕ ܠܹܗ ܗܵܕܵܐ.
6 ”ܘܡܐܲܝܟ݂ ܣܵܥܲܬ ܕܚܲܡܸܫ ܡ̣ܢ ܒܵܬܪ ܟܵܘܸܬܪܵܐ، ܦܠܝܼܛ ܠܹܗ ܡܸܢܕܪܸܫ ܘܚܙܹܐ ܠܹܗ ܦܵܥ̈ܠܹܐ ܐܚܹܪ̈ܢܹܐ ܟܸܠܝܹܐ ܒܲܛܝܼܠܹ̈ܐ، ܘܐܡܝܼܪܹܗ ܐܸܠܵܝܗܝ: ’ܩܵܡܘܿܕܝܼ ܟܸܠܝܹܐ ܝܬܘܿܢ ܠܲܐܟ݂ܵܐ ܒܲܛܝܼܠܹ̈ܐ ܟܠܹܗ ܝܵܘܡܵܐ؟‘
7 ”ܘܐܵܢܝܼ ܓ̰ܘܼܘܸܒ ܠܗܘܿܢ ܐܸܠܹܗ: ’ܣܵܒܵܒ ܐܢܵܫܵܐ ܠܵܐ ܩܵܡ ܡܲܦܠܸܚ ܠܲܢ.‘ ܐܡܝܼܪܹܗ ܐܸܠܵܝܗܝ: ’ܙܹܠ݇ܡܘܼܢ ܘܦܠܘܿܚܘܼܢ ܓܵܘ ܟܲܪܡܝܼ، ܘܡܸܢܕܝܼ ܕܘܵܠܹܐ ܝܠܹܗ ܒܸܬ ܩܲܒܠܝܼܬܘܿܢ.‘
8 ”ܟܲܕ ܗܘܹܐ ܠܹܗ ܪܲܡܫܵܐ، ܐܡܝܼܪܹܗ ܡܵܪܵܐ ܕܟܲܪܡܵܐ ܠܪܲܒ ܒܲܝܬܹܗ: ’ܩܪܝܼ ܠܦܵܥ̈ܠܹܐ، ܘܦܪܹܥ ܠܹܗ ܗܵܩܵܝܗܝ. ܫܲܪܝܼ ܡ̣ܢ ܐܚܵܪ̈ܵܝܹܐ ܘܗܲܠܔ ܩܲܕܡܵܝܹ̈ܐ.‘
9 ”ܘܐܬܹܐ ܠܗܘܿܢ ܐܵܢܝܼ ܕܫܘܼܪܝܹܐ ܝܗܘܵܘ ܡ̣ܢ ܣܵܥܲܬ ܕܚܲܡܸܫ ܕܒܵܬܪ ܟܵܘܸܬܪܵܐ، ܘܫܩܝܼܠܔ ܠܹܗ ܟܠܔ ܚܲܕ ܡܸܢܵܝܗܝ ܚܲܕ ܕܝܼܢܵܪܵܐ.
10 ”ܐܝܼܢܵܐ ܐܝܼܡܲܢ ܕܐܬܹܐ ܠܗܘܿܢ ܐܵܢܝܼ ܩܲܕܡܵܝܹ̈ܐ، ܚܫܝܼܒ݂ ܠܗܘܿܢ ܒܸܬ ܩܲܒܠܝܼ ܗܘܵܘ ܗܵܩܵܐ ܙܵܘܕܵܐ. ܐܝܼܢܵܐ ܐܘܼܦ ܐܵܢܝܼ ܫܩܝܼܠܔ ܠܗܘܿܢ ܟܠܔ ܡܸܢܵܝܗܝ ܚܲܕ ܕܝܼܢܵܪܵܐ.
11 ”ܘܟܲܕ ܫܩܝܼܠܔ ܠܗܘܿܢ، ܛܘܼܪܛܸܡ ܠܗܘܿܢ ܥܲܠܔ ܡܵܪܵܐ ܕܒܲܝܬܵܐ.
12 ”ܘܐܡܝܼܪܗܘܿܢ: ’ܐܲܢܹܐ ܐܚܵܪ̈ܵܝܹܐ ܦܠܝܼܚ ܠܗܘܿܢ ܚܕܵܐ ܣܵܥܲܬ ܘܚܘܼܫܒܸܢܵܝ ܠܘܼܟ݂ ܡܐܲܝܟ݂ ܕܝܼܲܢ، ܐܲܚܢܲܢ ܕܛܥܝܼܢܲܢ ܝܘܼܩܪܵܐ ܕܝܵܘܡܵܐ ܘܚܸܡܹܗ.‘
13 ”ܓ̰ܘܼܘܸܒ ܠܹܗ ܡܵܪܵܐ ܕܟܲܪܡܵܐ ܠܚܲܕ ܡܸܢܵܝܗܝ ܘܐܡܝܼܪܹܗ: ’ܚܲܒ݂ܪܝܼ، ܠܹܐ ܝܘܸܢ ܒܸܥܒ݂ܵܕܵܐ ܓܢܵܗܵܐ ܒܝܼܘܼܟ݂. ܠܹܐ ܝܗܘܵܐ ܒܕܝܼܢܵܪܵܐ ܩܛܝܼܥ ܠܘܼܟ݂ ܥܲܡܝܼ؟
14 ” ’ܫܩܘܿܠܔ ܗܵܩܘܼܟ݂ ܘܙܹܠܔ݇. ܒܵܥܹܝܢ ܕܝܵܗܒܹܢ ܠܐܵܗܵܐ ܐܚܵܪܵܝܵܐ ܡܐܲܝܟ݂ ܕܝܘܼܗܒܹܠܔ ܠܝܼ ܐܸܠܘܼܟ݂.
15 ” ’ܠܲܝܬ ܠܝܼ ܗܵܩܘܼܬܵܐ ܕܥܵܒ݂ܕܹܢ ܒܡܸܢܕܝܼ ܕܓܵܢܝܼ ܐܲܝܟ݂ ܕܒܵܣܡܵܐ ܠܝܼ؟ ܝܲܢ ܒܲܚܘܼܠܹܐ ܝܘܸܬ ܒܝܼܝܼ ܣܵܒܵܒ ܛܵܒ݂ܵܐ ܝܘܸܢ؟‘
16 ”ܗܵܕܟ݂ܵܐ، ܐܚܵܪ̈ܵܝܹܐ ܒܸܬ ܗܵܘܝܼ ܩܲܕܡܵܝܹ̈ܐ، ܘܩܲܕܡܵܝܹ̈ܐ ܐܚܵܪ̈ܵܝܹܐ؛ ܣܵܒܵܒ ܪܵܒܵܐ ܝܢܵܐ ܟ̰ܝܼܕܹܐ ܘܒܵܨܘܿܪܹ̈ܐ ܝܢܵܐ ܓܘܼܒܝܹܐ.“
ܓܗܐ ܐܚܪܬܐ ܝܫܘܥ ܡܚܒܘܪܐ ܒܘܬ ܡܘܬܗ
ܡܪܩܘܣ 10:32-34؛ ܠܘܩܐ 18:31-34
17 ܟܲܕ ܒܹܐܣܵܩܵܐ ܝܗܘܵܐ ܝܼܫܘܿܥ ܠܐܘܿܪܸܫܠܸܡ، ܩܸܪܝܵܝ ܠܹܗ ܬܲܠܡܝܼܕܘܼ̈ܗܝ ܠܚܲܕ ܓܹܒܵܐ ܒܢܲܦ̮ܫܵܝܗܝ ܘܐܡܝܼܪܹܗ ܐܸܠܵܝܗܝ:
18 ”ܐܵܕܝܼܵܐ ܒܹܐܣܵܩܵܐ ܝܘܲܚ ܠܐܘܿܪܸܫܠܸܡ، ܘܒܪܘܿܢܵܐ ܕܐܢܵܫܵܐ ܒܸܬ ܦܵܐܹܫ ܣܘܼܦܝܵܐ ܠܓܘܼܪ̈ܵܢܹܐ ܕܟܵܗ̈ܢܹܐ ܘܠܣܵܦܪܹ̈ܐ، ܘܒܸܬ ܕܵܝܢܝܼ ܠܹܗ ܠܡܵܘܬܵܐ.
19 ”ܘܒܸܬ ܣܲܦܝܼ ܠܹܗ ܠܐܸܡܘܵܬܹ̈ܐ ܕܡܲܣܚܸܪܝܼ ܒܝܼܹܗ، ܘܡܵܚܝܼ ܠܹܗ ܒܫܵܘܛܹ̈ܐ ܘܡܵܚܝܼ ܠܹܗ ܠܙܩܝܼܦܵܐ، ܘܒܝܵܘܡܵܐ ܕܬܠܵܬܵܐ ܒܸܬ ܩܵܐܹܡ.“
ܒܥܘܬܐ ܕܝܡܐ ܕܒܢܘܢ̈ܐ ܕܙܒ݂ܕܝ
ܡܪܩܘܣ 10:35-45
20 ܗ̇ܝܓܵܗ ܐܬܹܐ ܠܵܗ̇ ܠܟܸܣܠܹܗ ܝܸܡܵܐ ܕܒܢܘܿܢܹ̈ܐ ܕܙܲܒ݂ܕܲܝ ܥܲܡ ܒܢܘܿܢܘܼ̈ܗ̇، ܘܣܓ݂ܝܼܕ ܠܵܗ̇ ܐܸܠܹܗ، ܘܛܠܝܼܒ ܠܵܗ̇ ܡܸܢܹܗ ܚܕܵܐ ܒܵܥܘܼܬܵܐ.
21 ܒܘܼܩܸܪܹܗ ܡܸܢܘܼܗ̇ ܝܼܫܘܿܥ: ”ܡܘܼܕܝܼ ܒܵܥܝܲܬܝ؟“ ܘܓ̰ܘܼܘܸܒ ܠܵܗ̇ ܘܐܡܝܼܪܵܗ̇ ܐܸܠܹܗ: ”ܫܒ݂ܘܿܩ ܐܲܢܹܐ ܬܪܹܝ ܒܢܘܿܢܝܼ̈ ܝܵܬܒ݂ܝܼ ܥܲܡܘܼܟ݂ ܒܡܲܠܟܘܼܬܘܼܟ݂، ܚܲܕ ܡ̣ܢ ܝܲܡܝܼܢܘܼܟ݂ ܘܚܲܕ ܡ̣ܢ ܣܸܡܵܠܘܼܟ݂.“
22 ܓ̰ܘܼܘܸܒ ܠܹܗ ܝܼܫܘܿܥ ܘܐܡܝܼܪܹܗ ܐܸܠܘܼܗ̇: ”ܠܹܐ ܝܬܘܿܢ ܒܝܼܕܵܥܵܐ ܡܘܼܕܝܼ ܒܸܛܠܵܒܵܐ ܝܬܘܿܢ. ܡܵܨܹܝܬܘܿܢ ܫܵܬܹܝܬܘܿܢ ܡ̣ܢ ܟܵܣܵܐ ܕܐܵܢܵܐ ܗܕܝܼܪܵܐ ܝܘܸܢ ܠܸܫܬܵܝܹܗ، ܝܲܢ ܕܥܵܡܕܝܼܬܘܿܢ ܒܡܲܥܡܘܿܕܝܼܬܵܐ ܕܒܝܼܘܼܗ̇ ܦܵܝܫܹܢ ܥܡܝܼܕܵܐ؟“ ܘܐܵܢܝܼ ܐܡܝܼܪܗܘܿܢ: ”ܗܹܐ، ܟܹܐ ܡܵܨܲܚ.“
23 ܓ̰ܘܼܘܸܒ ܠܹܗ ܐܸܠܵܝܗܝ ܝܼܫܘܿܥ: ”ܡ̣ܢ ܟܵܣܝܼ ܗܲܪ ܒܸܬ ܫܵܬܹܝܬܘܿܢ، ܘܡܲܥܡܘܿܕܝܼܬܵܐ ܕܒܝܼܘܼܗ̇ ܦܵܝܫܹܢ ܥܡܝܼܕܵܐ ܒܸܬ ܥܵܡܕܝܼܬܘܿܢ. ܐܝܼܢܵܐ ܝܬܵܒ݂ܬܵܐ ܡ̣ܢ ܣܸܡܵܠܝܼ ܘܡ̣ܢ ܝܲܡܝܼܢܝܼ ܠܹܐ ܐܵܢܵܐ ܝܵܗܒܹܢܵܗ̇، ܐܸܠܵܐ ܒܸܬ ܦܵܝܫܵܐ ܝܘܼܗܒܹܠܬܵܐ ܠܐܵܢܝܼ ܕܗܘܼܕܸܪܬܵܐ ܝܠܵܗ̇ ܐܸܠܵܝܗܝ ܡ̣ܢ ܒܵܒܝܼ.“
24 ܟܲܕ ܫܡܝܼܥ ܠܗܘܿܢ ܥܸܣܪܵܐ ܬܲܠܡܝܼ̈ܕܹܐ، ܟܪܝܼܒ ܠܗܘܿܢ ܥܲܠܔ ܐܵܢܝܼ ܬܪܹܝ ܐܲܚܘܿܢܘܵܬܹ̈ܐ.
25 ܐܝܼܢܵܐ ܝܼܫܘܿܥ ܩܸܪܝܵܝ ܠܹܗ ܘܐܡܝܼܪܹܗ: ”ܟܹܐ ܝܵܕܥܝܼܬܘܿܢ ܕܓܘܼܪ̈ܵܢܹܐ ܕܐܸܡܘܵܬܹ̈ܐ ܡܵܪ̈ܵܘܵܬܵܝܗܝ ܝܢܵܐ، ܘܓܘܼܪ̈ܵܢܵܝܗܝ ܟܹܐ ܥܵܒ݂ܕܝܼ ܫܘܼܠܛܵܢܵܐ ܥܲܠܵܝܗܝ؟
26 ”ܐܝܼܢܵܐ ܐܵܗܵܐ ܡܸܢܕܝܼ ܠܵܐ ܗܵܘܹܐ ܓܵܘܵܘܟ݂ܘܿܢ، ܐܸܠܵܐ ܡ̇ܢ ܕܒܵܥܹܐ ܗܵܘܹܐ ܓܘܼܪܵܐ ܓܵܘܵܘܟ݂ܘܿܢ، ܗܵܘܹܐ ܥܵܒ݂ܕܵܢܵܐ ܕܚܸܠܡܲܬ ܐܸܠܵܘܟ݂ܘܿܢ.
27 ”ܘܡ̇ܢ ܕܒܵܥܹܐ ܡܸܢܵܘܟ݂ܘܿܢ ܠܹܗܘܵܝܵܐ ܩܲܕܡܵܝܵܐ، ܗܵܘܹܐ ܐܸܠܵܘܟ݂ܘܿܢ ܥܲܒ݂ܕܵܐ.
28 ”ܕܵܐܟ݂ܝܼ ܕܒܪܘܿܢܵܐ ܕܐܢܵܫܵܐ ܠܵܐ ܐܬܹܐ ܠܹܗ ܕܦܵܐܹܫ ܥܒ݂ܝܼܕܵܐ ܚܸܠܡܲܬ ܡ̣ܢ ܐܢܵܫܹ̈ܐ، ܐܸܠܵܐ ܕܥܵܒܹܕ ܠܗܘܿܢ ܚܸܠܡܲܬ، ܘܝܵܗܒܹܠܔ ܓܵܢܹܗ ܦܘܼܪܩܵܢܵܐ ܡ̣ܢ ܓܹܒܵܐ ܕܪܵܒܵܐ.“
ܒܣܡܬܐ ܕܬܪܝ ܣܡܝ̈ܐ
ܡܪܩܘܣ 10:46-52؛ ܠܘܩܐ 18:35-43
29 ܟܲܕ ܒܸܦܠܵܛܵܐ ܝܗܘܵܐ ܝܼܫܘܿܥ ܡ̣ܢ ܐܝܼܪܝܼܚܘܿ، ܐܬܹܐ ܠܹܗ ܒܵܬܪܹܗ ܟܸܢܫܵܐ ܪܵܒܵܐ.
30 ܘܗܵܐ ܬܪܹܝ ܣܸܡܝܹ̈ܐ ܝܬܝܼܒܹܐ ܝܗܘܵܘ ܒܡܲܪܙܵܐ ܕܐܘܼܪܚܵܐ. ܐܝܼܡܲܢ ܕܫܡܝܼܥ ܠܗܘܿܢ ܕܝܼܫܘܿܥ ܒܸܥܒ݂ܵܪܵܐ ܝܗܘܵܐ ܡ̣ܢ ܬܵܡܵܐ، ܡܘܼܩܘܸܚ ܠܗܘܿܢ: ”ܡܵܪܲܢ، ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܲܢ!“
31 ܘܟܸܢܫܵܐ ܢܓ̰ܝܼܘ ܠܹܗ ܒܝܼܵܝܗܝ ܕܫܵܬܩܝܼ. ܐܝܼܢܵܐ ܐܵܢܝܼ ܒܘܼܫ ܙܵܘܕܵܐ ܡܘܼܩܘܸܚ ܠܗܘܿܢ: ”ܡܵܪܲܢ، ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܲܢ.“
32 ܘܟܠܹܐ ܠܹܗ ܝܼܫܘܿܥ ܘܩܸܪܝܵܝ ܠܹܗ ܠܟܸܣܠܹܗ ܘܐܡܝܼܪܹܗ: ”ܡܘܼܕܝܼ ܒܵܥܹܝܬܘܿܢ ܕܥܵܒ݂ܕܹܢ ܐܸܠܵܘܟ݂ܘܿܢ؟“
33 ܓ̰ܘܼܘܸܒ ܠܗܘܿܢ ܐܸܠܹܗ: ”ܡܵܪܲܢ، ܒܵܥܲܚ ܕܦܵܬܚܝܼ ܥܲܝܢܲܢ̈.“
34 ܘܪܘܼܚܸܡ ܠܹܗ ܥܲܠܵܝܗܝ ܝܼܫܘܿܥ، ܘܕܩܝܼܪܹܗ ܒܥܲܝ̈ܢܵܝܗܝ، ܘܗܲܪ ܒܗ̇ܝ ܥܕܵܢܵܐ ܚܙܹܐ ܠܗܘܿܢ، ܘܐܙܝܼܠܔ ܠܗܘܿܢ ܒܵܬܪܹܗ.