ܣܸܦܪܵܐ ܚܡܝܼܫܵܝܵܐ
107
ܡܙܡܘܪ̈ܐ 107‐150
1 ܫܲܟܪܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ،
ܣܵܒܵܒ ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.
2 ܫܒ݂ܘܿܩ ܐܵܡܪܝܼ ܦܪ̈ܝܼܩܹܐ ܕܡܵܪܝܵܐ،
ܕܦܘܼܪܩܵܝ ܠܹܗ ܡ̣ܢ ܐܝܼܕܵܐ ܕܡܲܠܝܸܨܵܢܵܐ،
3 ܘܡ̣ܢ ܐܲܪ̈ܥܵܬܹܐ ܓ̰ܘܼܡܥܵܝ ܠܹܗ،
ܡ̣ܢ ܡܲܕܢܚܵܐ ܘܡ̣ܢ ܡܲܥܪܒ݂ܵܐ،
ܡ̣ܢ ܓܲܪܒܝܵܐ ܘܡ̣ܢ ܬܲܝܡܢܵܐ.
4 ܚܕܝܼܪܗܘܿܢ ܓܵܘ ܒܲܪܝܼܵܐ، ܒܐܘܼܪܚܵܐ ܚܵܪܵܒܵܐ،
ܠܵܐ ܡܘܼܫ݇ܟ̰ܸܚ ܠܗܘܿܢ ܡܕܝܼܢ݇ܬܵܐ ܕܥܡܵܪܵܐ.
5 ܟܦܝܼܢܹ̈ܐ ܐܘܼܦ ܨܹܗܝܹ̈ܐ،
ܓܵܢܵܝܗܝ ܕܘܼܪܕܸܫ̃ ܠܵܗ̇ ܒܓܵܘܵܝܗܝ.
6 ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗܝ،
ܘܡ̣ܢ ܐܘܼܠܨܵܢܵܝ̈ܗܝ ܦܘܼܨܝܵܝ ܠܹܗ.
7 ܘܠܘܼܒܠܵܝ ܠܹܗ ܒܐܘܼܪܚܵܐ ܬܪܘܼܨܬܵܐ،
ܠܹܐܙܵܠܵܐ ܠܡܕܝܼܢ݇ܬܵܐ ܕܥܡܵܪܵܐ.
8 ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
9 ܣܵܒܵܒ ܟܹܐ ܡܲܣܒܸܥ ܓܵܢܵܐ ܨܗܝܼܬܵܐ،
ܘܟܹܐ ܡܵܠܹܐ ܛܵܒ݂ܬܵܐ ܠܓܵܢܵܐ ܟܦܝܼܢܬܵܐ.
10 ܐܚܹܪ̈ܢܹܐ ܝܬܝܼܒ݂ ܠܗܘܿܢ ܒܚܸܫܟܵܐ ܘܒܛܸܠܵܢܝܼܬܵܐ ܕܡܵܘܬܵܐ،
ܐܲܣܝܼܪܹ̈ܐ ܒܐܘܼܠܨܵܢܵܐ ܘܒܦܪܸ̈ܙܠܹܐ،
11 ܣܵܒܵܒ ܥܒ݂ܝܼܕ ܠܗܘܿܢ ܡܵܪܘܿܕܘܼܬܵܐ ܥܲܠܔ ܗܹܡܸܙܡܵܢܹ̈ܐ ܕܐܲܠܵܗܵܐ،
ܘܡܸܠܟܵܐ ܕܥܸܠܵܝܵܐ ܡܘܼܣܠܹܐ ܠܗܘܿܢ.
12 ܒܘܼܬ ܐܵܗܵܐ، ܡܘܼܟܸܦ ܠܹܗ ܒܥܲܡܠܵܐ ܠܸܒܵܝܗܝ،
ܬܘܼܪܩܸܠܔ ܠܗܘܿܢ ܘܠܲܝܬ ܗܘܵܐ ܗܲܝܸܪܵܢܵܐ.
13 ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗܝ،
ܘܡ̣ܢ ܐܘܼܠܨܵܢܵܝ̈ܗܝ ܦܘܼܪܩܵܝ ܠܹܗ.
14 ܦܘܼܠܛܵܝ ܠܹܗ ܡ̣ܢ ܚܸܫܟܵܐ ܘܛܸܠܵܢܝܼܬܵܐ ܕܡܵܘܬܵܐ،
ܘܩܛܝܼܥ ܠܹܗ ܐܸܣܘܼܪ̈ܵܝܗܝ.
15 ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
16 ܣܵܒܵܒ ܬܒ݂ܝܼܪܹܗ ܬܲܪ̈ܥܵܢܹܐ ܕܢܚܵܫܵܐ،
ܘܢܣܝܼܪܹܗ ܕܵܒ݂ܪܹ̈ܐ ܕܦܪܸܙܠܵܐ.
17 ܣܲܟ݂ܠܹ̈ܐ ܡ̣ܢ ܐܘܼܪܚܵܐ ܕܓܢܵܗܵܝܗܝ،
ܦܝܼܫ ܠܗܘܿܢ ܡܘܼܠܝܸܨܹܐ ܡ̣ܢ ܥܸܠܬܵܐ ܕܥܵܘܠܵܝܗܝ.
18 ܡ̣ܢ ܟܠܔ ܡܹܐܟ݂ܘܼܠܬܵܐ ܓܘܼܢܓܸܙ ܠܵܗ̇ ܓܵܢܵܝܗܝ،
ܘܩܘܼܪܒܸܢܗܘܿܢ ܗܲܠܔ ܬܲܪ̈ܥܵܢܹܐ ܕܡܵܘܬܵܐ.
19 ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗܝ،
ܘܡ̣ܢ ܐܘܼܠܨܵܢܵܝ̈ܗܝ ܦܘܼܪܩܵܝ ܠܹܗ.
20 ܫܘܼܕܸܪܹܗ ܚܲܒܪܹܗ ܘܒܘܼܣܡܵܝ ܠܹܗ،
ܘܦܘܼܨܝܵܝ ܠܹܗ ܡ̣ܢ ܚܪ̈ܵܒ݂ܵܝܗܝ.
21 ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
22 ܘܕܵܒ݂ܚܝܼ ܕܸܒ݂ܚܵܐ ܕܫܲܟܲܪܬܵܐ،
ܘܗܲܩܝܼ ܒܘܼܬ ܦܘܼܠܚܵܢܘܼ̈ܗܝ ܒܩܲܘܲܚܬܵܐ.
23 ܨܵܠܝܵܢܹ̈ܐ ܕܝܵܡܵܐ ܒܓܵܡܝܼܹ̈ܐ،
ܬܲܓܵܪܹ̈ܐ ܒܡ̈ܝܼܵܐ ܪ̈ܘܝܼܚܹܐ.
24 ܐܵܢܝܼ ܚܙܹܐ ܠܗܘܿܢ ܦܘܼܠܚܵܢܹ̈ܐ ܕܡܵܪܝܵܐ،
ܘܕܘܼܡܵܪ̈ܘܼܗܝ ܒܥܘܼܡܩܹ̈ܐ.
25 ܐܡܝܼܪܹܗ ܘܡܘܼܩܸܡ ܠܹܗ ܦܵܘܚܵܐ ܕܥܲܠܥܵܠܵܐ،
ܘܦܝܼܫ ܠܗܘܿܢ ܡܘܼܪܡܹܐ ܠܲܦܹ̈ܐ ܕܝܵܡܵܐ.
26 ܐܣܝܼܩ ܠܗܘܿܢ ܠܫܡܲܝܵܐ ܘܨܠܹܐ ܠܗܘܿܢ ܠܬܗܘܿܡܹ̈ܐ،
ܦܫܝܼܪܵܗ̇ ܓܵܢܵܝܗܝ ܒܣܸܪܝܘܼܬܵܐ.
27 ܦܘܼܢܦܸܠܔ ܠܗܘܿܢ ܘܫܥܝܼܫ ܠܗܘܿܢ ܐܲܝܟ݂ ܪ̈ܵܘܵܝܹܐ،
ܘܟܠܵܗ̇ ܚܸܟ݂ܡܬܵܝܗܝ ܦܝܼܫ ܠܵܗ̇ ܒܠܝܼܥܬܵܐ.
28 ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܵܝܗܝ،
ܘܡ̣ܢ ܐܘܼܠܨܵܢܵܝ̈ܗܝ ܩܵܡ ܦܲܠܸܛ ܠܗܘܿܢ.
29 ܡܘܼܫܬܸܩ ܠܹܗ ܠܥܲܠܥܵܠܵܐ،
ܘܗܘܹܐ ܠܗܘܿܢ ܫܸܠܝܹܐ ܠܲܦܹ̈ܐ.
30 ܘܚܕܹܐ ܠܗܘܿܢ ܟܲܕ ܫܬܝܼܩ ܠܵܗ̇،
ܘܡܕܘܼܒܪܵܝ ܠܹܗ ܠܠܡܹܐܢܵܐ ܕܨܸܒ݂ܝܵܢܵܝܗܝ.
31 ܫܒ݂ܘܿܩ ܫܲܟܪܝܼ ܠܡܵܪܝܵܐ ܒܘܼܬ ܛܲܝܒܘܼܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
32 ܘܡܲܪܡܝܼ ܠܹܗ ܒܟܸܢܫܵܐ ܕܥܲܡܵܐ،
ܘܓܵܘ ܡܵܘܬܒ݂ܵܐ ܕܚܘܵܪ̈ܕܸܩܢܹܐ ܚܵܩܪܝܼ ܠܹܗ.
33 ܟܹܐ ܡܲܚܕܸܪ ܢܲܗܪ̈ܵܘܵܬܹܐ ܠܒܲܪܝܼܵܐ،
ܘܡܲܒܘܼܥܹ̈ܐ ܕܡ̈ܝܼܵܐ ܠܐܲܪܥܵܐ ܨܗܝܼܬܵܐ،
34 ܘܐܲܪܥܵܐ ܕܛܥܘܼܢܝܵܬܹ̈ܐ ܠܐܲܪܥܵܐ ܡܸܠܚܵܢܬܵܐ،
ܡ̣ܢ ܥܸܠܬܵܐ ܕܒܝܼܫܘܼܬܵܐ ܕܝܵܬܒ݂ܵܢܹ̈ܐ ܕܓܵܘܘܼܗ̇.
35 ܟܹܐ ܡܲܚܕܸܪ ܒܲܪܝܼܵܐ ܠܒܸܪ̈ܟܹܐ ܕܡ̈ܝܼܵܐ،
ܘܐܲܪܥܵܐ ܨܗܝܼܬܵܐ ܠܡܲܒܘܼܥܹ̈ܐ ܕܡ̈ܝܼܵܐ.
36 ܘܟܹܐ ܡܲܬܸܒ݂ ܬܵܡܵܐ ܟܦܝܼܢܹ̈ܐ،
ܘܟܹܐ ܫܲܬܐܸܣܝܼ ܡܕܝܼܢ݇ܬܵܐ ܠܸܥܡܵܪܵܐ.
37 ܘܟܹܐ ܙܵܪܥܝܼ ܚܲܩܠܵܢܹ̈ܐ ܘܢܵܨܒ݂ܝܼ ܟܲܪ̈ܡܵܢܹܐ،
ܘܫܵܩܠܝܼ ܛܥܘܼܢܝܵܬܹ̈ܐ ܦܸܪ̈ܝܹܐ.
38 ܘܟܹܐ ܒܲܪܸܟ݂ ܠܗܘܿܢ ܘܟܹܐ ܙܵܝܕܝܼ ܪܵܒܵܐ،
ܘܪܸܣܩܵܝܗܝ ܠܹܐ ܡܲܒܨܸܪ.
39 ܐܝܼܡܲܢ ܕܚܵܣܪܝܼ ܘܦܵܝܫܝܼ ܡܘܼܟܸܦܹܐ
ܡ̣ܢ ܙܠܘܼܡܝܵܐ، ܒܝܼܫܘܼܬܵܐ، ܘܚܲܫܵܐ،
40 ܟܹܐ ܫܲܦܸܟ݂ ܡܲܣܠܲܝܬܵܐ ܥܲܠܔ ܢܲܨܝܼܚܹ̈ܐ،
ܘܟܹܐ ܡܲܚܠܸܛ ܠܵܗ̇ ܐܘܼܪܚܵܝܗܝ ܒܐܲܪܥܵܐ ܚܵܪܵܒܵܐ ܕܠܲܝܬ ܠܵܗ̇ ܦܠܵܛܵܐ.
41 ܐܝܼܢܵܐ ܟܹܐ ܡܲܪܸܡ ܠܗܘܿܢ ܣܢܝܼܩܹ̈ܐ ܠܫܲܝܢܵܐ ܡ̣ܢ ܐܘܼܠܨܵܢܵܐ،
ܘܟܹܐ ܥܵܒܹܕ ܐܲܝܟ݂ ܦܸܣܩܵܐ ܫܲܪ̈ܒܵܬܵܝܗܝ.
42 ܒܸܬ ܚܵܙܝܼ ܬܪ̈ܘܼܨܹܐ ܘܒܸܬ ܚܵܕܝܼ،
ܘܟܠܔ ܥܵܘܠܵܐ ܒܸܬ ܐܵܟ̰ܹܡ ܦܘܼܡܹܗ.
43 ܡܵܢܝܼ ܝܠܹܗ ܚܲܟܝܼܡܵܐ؟ ܫܒ݂ܘܿܩ ܢܵܛܹܪ ܐܲܢܹܐ،
ܘܦܲܪܡܹܐ ܛܲܝܒܘܼܬܵܐ ܕܡܵܪܝܵܐ.