40
ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܕܘܝܕ.
1 ܣܦܵܪܵܐ ܣܦܝܼܪܝܼ ܠܡܵܪܝܵܐ،
ܘܦܬܝܼܠܔ ܠܹܗ ܠܟܸܣܠܝܼ ܘܫܡܝܼܥ ܠܹܗ ܓܥܵܝܬܝܼ.
2 ܘܩܵܡ ܡܲܐܣܸܩ ܠܝܼ ܡ̣ܢ ܓܘܼܒܵܐ ܕܚܪܵܒ݂ܵܐ، ܡ̣ܢ ܛܝܼܢܵܐ ܕܙܸܢܵܐ،
ܘܡܘܼܩܸܡ ܠܹܗ ܥܲܠܔ ܩܵܝܵܐ ܐܲܩܠܵܬܝܼ̈، ܟܲܕ ܡܲܩܘܘܼܝܹܐ ܦܵܣܘܿܥܝܵܬܝܼ̈.
3 ܘܡܘܼܬܸܒ݂ ܠܹܗ ܒܦܘܼܡܝܼ ܙܡܵܪܬܵܐ ܚܲܕܬܵܐ ܕܬܸܫܒܘܿܚܬܵܐ ܠܐܲܠܵܗܵܐ،
ܒܸܬ ܚܵܙܝܼ ܪܵܒܵܐ ܘܒܸܬ ܙܵܕܥܝܼ،
ܘܒܸܬ ܣܵܒܪܝܼ ܒܡܵܪܝܵܐ.
4 ܛܘܼܒ݂ܵܐ ܠܐܢܵܫܵܐ ܕܥܵܒܹܕ ܠܡܵܪܝܵܐ ܬܘܼܟ݂ܠܵܢܹܗ،
ܘܠܵܐ ܦܬܝܼܠܔ ܠܹܗ ܠܚܵܬܪ̈ܵܢܹܐ، ܐܘܼܦ ܠܵܐ ܠܐܵܙܵܠ݇ܢܹ̈ܐ ܒܵܬܪ ܕܘܼܓܠܵܐ.
5 ܪܵܒܵܐ ܥܒ݂ܝܼܕ ܠܘܼܟ݂ ܐܲܢ݇ܬ، ܝܵܐ ܡܵܪܝܵܐ ܐܲܠܵܗܝܼ،
ܕܘܼܡܵܪܹ̈ܐ ܘܚܘܼܫܵܒܹ̈ܐ ܐܸܠܲܢ،
ܠܲܝܬ ܐܲܝܟ݂ ܕܝܼܘܼܟ݂،
ܐܸܢ ܡܲܕܥܸܢ ܗܘܵܐ ܘܗܲܡܙܸܡܸܢ ܗܘܵܐ، ܒܸܬ ܗܵܘܝܼ ܗܘܵܘ ܒܘܼܫ ܙܵܘܕܵܐ ܡ̣ܢ ܠܸܡܢܵܝܵܐ.
6 ܒܕܸܒ݂ܚܵܐ ܘܒܩܘܼܪܒܵܢܵܐ ܠܵܐ ܒܣܝܼܡ ܠܵܗ̇ ܠܘܼܟ݂،
ܩܵܡ ܦܵܬܚܹܬ ܠܗܘܿܢ ܢܵܬܝܵܬܝܼ̈،
ܕܸܒ݂ܚܵܐ ܡܘܼܩܕܵܐ ܘܕܸܒ݂ܚܵܐ ܕܚܛܝܼܬܵܐ ܠܵܐ ܛܠܝܼܒ ܠܘܼܟ݂.
7 ܗ̇ܝܓܵܗ ܐܡܝܼܪܝܼ: ”ܗܵܐ، ܐܬܝܼܵܐ ܝܘܸܢ،
ܒܟܸܪܟ݂ܵܐ ܕܟܬܵܒ݂ܵܐ ܦܝܼܫܵܐ ܠܹܗ ܟܬܝܼܒ݂ܵܐ ܒܘܼܬ ܕܝܼܝܼ.
8 ”ܠܸܥܒ݂ܵܕܵܐ ܨܸܒ݂ܝܵܢܘܼܟ݂، ܝܵܐ ܐܲܠܵܗܝܼ، ܩܘܼܒܸܠܔ ܠܝܼ ܒܘܼܣܵܡܵܐ،
ܘܢܵܡܘܿܣܘܼܟ݂ ܓܵܘ ܠܸܒܝܼ ܝܠܹܗ.“
9 ܡܘܼܫܚܸܕ ܠܝܼ ܙܲܕܝܼܩܘܼܬܵܐ ܒܟܸܢܫܵܐ ܓܘܼܪܵܐ،
ܗܵܐ، ܣܸܦܘܵܬܝܼ̈ ܠܹܐ ܡܲܟܠܸܢܗܘܿܢ،
ܐܲܢ݇ܬ ܟܹܐ ܝܵܕܥܹܬ، ܝܵܐ ܡܵܪܝܵܐ.
10 ܙܲܕܝܼܩܘܼܬܘܼܟ݂ ܠܵܐ ܟܘܼܣܝܵܐ ܠܝܼ ܓܵܘ ܠܸܒܝܼ،
ܗܘܼܡܙܸܡ ܠܝܼ ܒܘܼܬ ܡܗܘܼܡܢܘܼܬܘܼܟ݂ ܘܒܘܼܬ ܦܘܼܪܩܵܢܘܼܟ݂،
ܠܛܲܝܒܘܼܬܘܼܟ݂ ܘܫܲܪܝܼܪܘܼܬܘܼܟ݂ ܠܵܐ ܛܘܼܫܹܐ ܠܝܼ ܡ̣ܢ ܟܸܢܫܵܐ ܓܘܼܪܵܐ.
11 ܐܲܢ݇ܬ، ܝܵܐ ܡܵܪܝܵܐ، ܠܹܐ ܚܵܣܟܹܬ ܪ̈ܲܚܡܘܼܟ݂ ܡܸܢܝܼ،
ܛܲܝܒܘܼܬܘܼܟ݂ ܘܫܲܪܝܼܪܘܼܬܘܼܟ݂ ܐܲܡܝܼܢܵܐܝܼܬ ܟܹܐ ܢܵܛܪܝܼ ܠܝܼ.
12 ܣܵܒܵܒ ܩܵܡ ܟܵܪܟ݂ܝܼ ܠܝܼ ܒܝܼܫܵܬܹ̈ܐ ܒܠܵܐ ܡܸܢܝܵܢܵܐ،
ܡܸܛܝܸܢܗܘܿܢ ܥܵܘܠܝܼ̈ ܘܠܹܐ ܝܘܸܢ ܒܸܡܨܵܝܵܐ ܕܚܵܙܹܝܢ،
ܙܝܼܕ ܠܗܘܿܢ ܡ̣ܢ ܣܲܥܪܵܐ ܕܪܹܝܫܝܼ ܘܠܸܒܝܼ ܩܵܡ ܫܵܒܹܩ ܠܝܼ.
13 ܒܵܣܡܵܐ ܠܘܼܟ݂، ܝܵܐ ܡܵܪܝܵܐ، ܠܦܲܨܘܼܝܝܼ،
ܡܲܠܝܸܙ ܠܗܲܝܲܪܬܝܼ، ܝܵܐ ܡܵܪܝܵܐ.
14 ܢܵܟ݂ܦܝܼ ܘܦܵܝܫܝܼ ܡܘܼܢܟܸܦܹܐ ܟܠܵܝܗܝ ܛܵܥܝܵܢܹ̈ܐ ܠܓܵܢܝܼ ܠܛܲܠܘܼܩܘܼܗ̇،
ܕܵܝܪܝܼ ܠܒܵܬܪܵܐ ܘܗܵܘܝܼ ܡܘܼܣܠܝܼܹܐ
ܐܵܢܝܼ ܕܒܵܣܡܵܐ ܠܗܘܿܢ ܒܒܝܼܫܬܝܼ.
15 ܦܵܝܫܝܼ ܬܡܝܼܗܹܐ ܡ̣ܢ ܢܟ݂ܝܼܦܬܵܝܗܝ،
ܐܵܢܝܼ ܕܟܹܐ ܐܵܡܪܝܼ ܐܸܠܝܼ: ”ܐܘܿܚܲܝ! ܐܘܿܚܲܝ!“
16 ܚܵܕܝܼ ܘܦܵܨܚܝܼ ܒܝܼܘܼܟ݂ ܟܠܵܝܗܝ ܛܵܥܝܵܢܹ̈ܐ ܐܸܠܘܼܟ݂،
ܐܵܡܪܝܼ ܐܲܡܝܼܢܵܐܝܼܬ ܡܲܚܸܒܵܢܹ̈ܐ ܕܦܘܼܪܩܵܢܘܼܟ݂:
”ܗܵܘܹܐ ܓܘܼܪܵܐ ܡܵܪܝܵܐ.“
17 ܘܐܵܢܵܐ ܡܸܣܟܹܢܵܐ ܝܘܸܢ ܘܣܢܝܼܩܵܐ،
ܡܵܪܝܵܐ ܟܹܐ ܬܲܚܡܸܢ ܒܘܼܬ ܕܝܼܝܼ،
ܗܲܝܲܪܬܝܼ ܘܦܲܨܝܵܢܝܼ ܐܲܢ݇ܬ ܝܼܘܸܬ،
ܝܵܐ ܐܲܠܵܗܝܼ، ܠܵܐ ܥܲܪܩܸܠܸܬ.