46
ܠܪܝܫ ܓܘܕܐ ܕܙܡܪ̈ܐ. ܡܙܡܘܪܐ ܕܒܢܝ̈ ܩܘܪܚ. ܥܠܔ ܥܠܡܘܬ. ܙܡܪܬܐ.
1 ܐܲܠܵܗܵܐ ܝܠܹܗ ܐܸܠܲܢ ܒܹܝܬ ܓܵܘܣܵܐ ܘܥܘܼܫܢܵܐ،
ܗܲܝܲܪܬܵܐ ܝܠܹܗ ܓܵܘ ܐܘܼܠܨܵܢܹ̈ܐ ܒܟܠܔ ܥܕܵܢܵܐ.
2 ܒܘܼܬ ܐܵܗܵܐ، ܠܹܐ ܙܵܕܥܲܚ ܟܲܕ ܫܲܚܠܸܦܵܐ ܐܲܪܥܵܐ،
ܘܟܲܕ ܫܵܥܫܝܼ ܛܘܼܪ̈ܵܢܹܐ ܒܥܘܼܡܩܵܐ ܕܝܵܡܵܬܹ̈ܐ.
3 ܟܲܕ ܫܵܓ݂ܫܝܼ ܘܓܲܒܓܸܒܝܼ ܡܝܼܵܝ̈ܗܝ،
ܪܲܬܪܸܬܝܼ ܛܘܼܪ̈ܵܢܹܐ ܒܪܝܵܡܬܵܝܗܝ.
ܣܹܠܵܗ
4 ܐܝܼܬ ܢܲܗܪܵܐ ܕܫܵܩܝܼܵܬܘܼ̈ܗܝ ܟܹܐ ܡܲܚܕܝܼ ܠܡܕܝܼܢ݇ܬܵܐ ܕܐܲܠܵܗܵܐ،
ܡܲܫܟܢܵܐ ܩܲܕܝܼܫܵܐ ܕܥܸܠܵܝܵܐ.
5 ܐܲܠܵܗܵܐ ܒܓܵܘܘܼܗ̇ ܝܠܹܗ، ܠܹܐ ܫܵܥܫܵܐ،
ܒܸܬ ܗܲܝܸܪܵܗ̇ ܐܲܠܵܗܵܐ ܒܕܝܵܪܬܵܐ ܕܨܲܦܪܵܐ.
6 ܫܓ݂ܝܼܫ ܠܗܘܿܢ ܐܸܡܘܵܬܹ̈ܐ، ܫܥܝܼܫ ܠܗܘܿܢ ܡܲܠܟܘܵܬܹ̈ܐ،
ܡܘܼܪܸܡ ܠܹܗ ܩܵܠܹܗ، ܦܫܝܼܪܵܗ̇ ܐܲܪܥܵܐ.
7 ܡܵܪܝܵܐ ܚܲܝܠܬܵܢܵܐ ܥܲܡܲܢ ܝܼܠܹܗ،
ܩܲܠܥܵܐ ܐܸܠܲܢ ܐܲܠܵܗܵܐ ܕܝܲܥܩܘܿܒ݂.
ܣܹܠܵܗ
8 ܬܹܝܡܘܼܢ ܚܙܹܝܡܘܼܢ ܦܘܼܠܚܵܢܹ̈ܐ ܕܡܵܪܝܵܐ،
ܕܡܘܼܝܬܹܐ ܠܹܗ ܚܪ̈ܵܒܹܐ ܒܐܲܪܥܵܐ.
9 ܟܹܐ ܡܲܟܠܹܐ ܦܠܵܫܹ̈ܐ ܗܲܠܔ ܡܲܪܙܵܐ ܕܐܲܪܥܵܐ،
ܟܹܐ ܬܵܒܹܪ ܩܸܫܬܵܐ، ܘܟܹܐ ܫܵܡܹܛ ܪܘܼܡܚܵܐ،
ܟܹܐ ܡܲܩܸܕ ܡܲܪ̈ܟܒ݂ܵܬܹܐ ܒܢܘܼܪܵܐ.
10 ܟܹܐ ܐܵܡܹܪ: ”ܗܘܹܝܡܘܼܢ ܫܸܠܝܹܐ ܘܝܕܹܥܡܘܼܢ ܕܐܵܢܵܐ ܝܘܸܢ ܐܲܠܵܗܵܐ،
ܒܸܬ ܦܵܝܫܹܢ ܡܘܼܪܡܵܐ ܓܵܘ ܐܸܡܘܵܬܹ̈ܐ،
ܒܸܬ ܦܵܝܫܹܢ ܡܘܼܪܡܵܐ ܒܐܲܪܥܵܐ.“
11 ܡܵܪܝܵܐ ܚܲܝܠܬܵܢܵܐ ܥܲܡܲܢ ܝܼܠܹܗ،
ܩܲܠܥܵܐ ܐܸܠܲܢ ܐܲܠܵܗܵܐ ܕܝܲܥܩܘܿܒ݂.
ܣܹܠܵܗ