48
ܙܡܪܬܐ. ܡܙܡܘܪܐ ܕܒܢܝ̈ ܩܘܪܚ.
1 ܓܘܼܪܵܐ ܝܠܹܗ ܡܵܪܝܵܐ ܘܡܫܘܼܒܚܵܐ ܪܵܒܵܐ،
ܒܡܕܝܼܢ݇ܬܵܐ ܕܐܲܠܵܗܲܢ، ܛܘܼܪܵܐ ܕܩܘܼܕܫܹܗ.
2 ܫܲܦܝܼܪܵܐ ܒܪܵܡܘܼܬܵܐ، ܚܲܕܘܼܬܵܐ ܕܟܠܵܗ̇ ܐܲܪܥܵܐ،
ܛܘܼܪܵܐ ܕܨܸܗܝܘܿܢ ܒܫܸܦܘܼܠܹ̈ܐ ܕܓܲܪܒܝܵܐ،
ܡܕܝܼܢ݇ܬܵܐ ܕܡܲܠܟܵܐ ܓܘܼܪܵܐ.
3 ܐܲܠܵܗܵܐ ܒܩܲܨܪ̈ܘܼܗ̇ ܡܘܼܕܸܥܵܐ ܠܹܗ ܓܵܢܹܗ ܐܲܝܟ݂ ܓܵܘܣܵܐ.
4 ܣܵܒܵܒ ܗܵܐ، ܡܲܠܟܹ̈ܐ ܚܘܼܝܸܕ ܠܗܘܿܢ،
ܥܒ݂ܝܼܪܗܘܿܢ ܥܲܡ ܚܕܵܕܹ̈ܐ.
5 ܐܵܢܝܼ ܟܲܕ ܚܙܹܐ ܠܗܘܿܢ، ܦܝܼܫ ܠܗܘܿܢ ܬܡܝܼܗܹܐ،
ܫܥܝܼܫ ܠܗܘܿܢ ܘܡܘܼܠܝܸܙ ܠܗܘܿܢ ܠܸܥܪܵܩܵܐ.
6 ܪܲܬܪܲܬܬܵܐ ܩܵܡ ܕܵܒ݂ܩܵܐ ܠܗܘܿܢ ܬܵܡܵܐ،
ܘܚܸܒ݂ܠܹ̈ܐ ܐܲܝܟ݂ ܝܵܠܸܕܬܵܐ.
7 ܒܦܵܘܚܵܐ ܕܡܲܕܢܚܵܐ،
ܟܹܐ ܬܵܒ݂ܪܹܬ ܓܵܡܝܼܹ̈ܐ ܕܬܲܪܫܝܼܫ.
8 ܕܵܐܟ݂ܝܼ ܕܫܡܝܼܥ ܠܲܢ، ܗܵܕܟ݂ܵܐ ܚܙܹܐ ܠܲܢ،
ܒܡܕܝܼܢ݇ܬܵܐ ܕܡܵܪܝܵܐ ܚܲܝܠܬܵܢܵܐ،
ܒܡܕܝܼܢ݇ܬܵܐ ܕܐܲܠܵܗܲܢ،
ܐܲܠܵܗܵܐ ܒܸܬ ܡܲܩܘܹܐ ܠܵܗ̇ ܗܲܠܔ ܥܵܠܲܡ.
ܣܹܠܵܗ
9 ܬܘܼܚܡܸܢܲܢ، ܝܵܐ ܐܲܠܵܗܵܐ، ܒܘܼܬ ܛܲܝܒܘܼܬܘܼܟ݂،
ܒܓܵܘܵܐ ܕܗܲܝܟܠܘܼܟ݂.
10 ܐܲܝܟ݂ ܫܸܡܘܼܟ݂، ܝܵܐ ܐܲܠܵܗܵܐ،
ܗܵܕܟ݂ܵܐ ܝܠܵܗ̇ ܬܸܫܒܘܿܚܬܘܼܟ݂ ܗܲܠܔ ܡܲܪ̈ܙܵܢܹܐ ܕܐܲܪܥܵܐ،
ܡܠܝܼܬܵܐ ܝܠܵܗ̇ ܝܲܡܝܼܢܘܼܟ݂ ܙܲܕܝܼܩܘܼܬܵܐ.
11 ܚܵܕܹܐ ܛܘܼܪܵܐ ܕܨܸܗܝܘܿܢ،
ܦܵܨܚܝܼ ܒܢܵܬܹ̈ܐ ܕܝܼܗܘܼܕܵܐ،
ܒܘܼܬ ܕܝܼܘܵܢܘܼ̈ܟ݂.
12 ܚܕܘܿܪܘܼܢ ܚܵܕܸܪ̈ܘܵܢܹܐ ܕܨܸܗܝܘܿܢ، ܘܟܪܘܿܟ݂ܘܼܢ ܠܵܗ̇،
ܡܢܹܝܡܘܼܢ ܒܘܼܪ̈ܓ̰ܘܼܗ̇.
13 ܡܲܣܸܡܘܼܢ ܒܵܠܵܐ ܒܫܘܼܪ̈ܘܼܗ̇،
ܨܲܚܨܹܝܡܘܼܢ ܠܩܲܨܪ̈ܘܼܗ̇،
ܩܵܐ ܕܗܲܩܹܝܬܘܿܢ ܠܕܵܪܵܐ ܐܚܹܪܢܵܐ.
14 ܕܐܵܗܵܐ ܐܲܠܵܗܵܐ، ܐܲܠܵܗܲܢ ܝܼܠܹܗ، ܠܥܵܠܲܡ ܥܵܠܡܝܼܢ،
ܗ̇ܘ ܒܸܬ ܡܕܲܒܸܪܲܢ ܗܲܠܔ ܡܵܘܬܵܐ.