77
ܠܪܝܫ ܓܘܕܐ ܕܙܡܪ̈ܐ. ܥܠܔ ܝܕܘܬܘܢ. ܡܙܡܘܪܐ.
1 ܟܹܐ ܕܵܪܹܝܢ ܩܵܠܹ̈ܐ ܠܐܲܠܵܗܵܐ، ܘܒܸܬ ܡܲܩܘܸܚܸܢ،
ܟܹܐ ܕܵܪܹܝܢ ܩܵܠܹ̈ܐ ܠܐܲܠܵܗܵܐ، ܘܒܸܬ ܝܵܗܒܹܠܔ ܢܵܬܵܐ ܐܸܠܝܼ.
2 ܒܝܵܘܡܵܐ ܕܥܵܘܩܵܢܝܼ ܠܡܵܪܝܵܐ ܛܥܹܐ ܠܝܼ،
ܐܝܼܕܝܼ ܒܠܲܝܠܹܐ ܦܝܼܫ ܠܵܗ̇ ܦܘܼܫܸܛܬܵܐ ܘܠܵܐ ܬܒ݂ܝܼܢܵܗ̇،
ܡܘܼܚܦܸܠܔ ܠܵܗ̇ ܠܸܫܩܵܠܵܐ ܠܸܒܵܐ ܓܵܢܝܼ.
3 ܟܹܐ ܕܵܟ݂ܪܹܢ ܠܐܲܠܵܗܵܐ ܘܟܹܐ ܢܲܟܢܸܟܸܢ،
ܟܹܐ ܗܲܓܹܝܢ ܘܦܝܼܫ ܠܵܗ̇ ܕܘܼܪܕܸܫ̃ܬܵܐ ܪܘܼܚܝܼ.
ܣܹܠܵܗ
4 ܠܵܐ ܫܒ݂ܝܼܩ ܠܘܼܟ݂ ܐܵܟ̰ܡܝܼ ܛܸܠܦܵܦܝܼ̈،
ܦܝܼܫ ܠܝܼ ܫܓ݂ܝܼܫܵܐ ܗܵܕܵܐ ܕܠܹܐ ܡܵܨܹܝܢ ܗܲܡܙܸܡܸܢ.
5 ܬܘܼܚܡܸܢܝܼ ܒܘܼܬ ܝܵܘܡܵܢܹ̈ܐ ܥܲܬܝܼܩܹ̈ܐ،
ܫܸܢܹ̈ܐ ܕܥܵܠܡܝܼܢ.
6 ܒܸܕܟ݂ܵܪܵܐ ܝܘܸܢ ܙܡܵܪܬܝܼ ܒܠܲܝܠܹܐ،
ܒܠܸܒܝܼ ܟܹܐ ܗܲܓܹܝܢ ܘܟܹܐ ܨܲܚܨܝܼܵܐ ܪܘܼܚܝܼ.
7 ܗܵܐ، ܒܸܬ ܪܲܦܹܐ ܠܝܼ ܡܵܪܝܵܐ ܠܥܵܠܡܝܼܢ،
ܘܠܹܐ ܡܲܙܝܸܕ ܗܸܢܝܵܢܹܗ ܡܸܢܕܪܸܫ؟
8 ܗܵܐ، ܫܠܹܐ ܠܵܗ̇ ܠܥܵܠܲܡ ܛܲܝܒܘܼܬܹܗ،
ܬܝܼܡ ܠܹܗ ܩܵܘܠܹܗ ܠܕܵܪܵܐ ܘܕܵܪܵܐ؟
9 ܗܵܐ، ܡܘܼܢܫܹܐ ܠܹܗ ܠܸܥܒ݂ܵܕܵܐ ܪ̈ܲܚܡܹܐ ܐܲܠܵܗܵܐ،
ܝܲܢ ܒܚܸܡܬܵܐ ܚܣܝܼܟ݂ܵܝ ܠܹܗ ܪ̈ܲܚܡܘܼܗܝ؟
ܣܹܠܵܗ
10 ܘܐܡܝܼܪܝܼ: ”ܒܸܒܙܵܥܵܐ ܝܠܹܗ ܠܸܒܝܼ
ܒܘܼܬ ܫܲܚܠܲܦܬܵܐ ܕܝܲܡܝܼܢܵܐ ܕܥܸܠܵܝܵܐ.
11 ”ܒܸܬ ܡܲܕܟܸܪܸܢ ܥܒ݂ܵܕܹ̈ܐ ܕܡܵܪܝܵܐ،
ܗܹܐ، ܒܸܬ ܕܵܟ݂ܪܹܢ ܕܘܼܡܵܪ̈ܘܼܟ݂ ܡ̣ܢ ܙܲܒ݂ܢܵܐ ܩܲܕܝܼܡܵܝܵܐ.
12 ”ܘܒܸܬ ܗܲܓܹܝܢ ܟܠܹܗ ܦܘܼܠܚܵܢܘܼܟ݂،
ܘܒܘܼܬ ܥܒ݂ܵܕܘܼ̈ܟ݂ ܒܸܬ ܬܲܚܡܸܢܸܢ.“
13 ܝܵܐ ܐܲܠܵܗܵܐ، ܒܩܲܕܝܼܫܘܼܬܵܐ ܝܠܵܗ̇ ܐܘܼܪܚܘܼܟ݂؛
ܡܵܢܝܼ ܝܠܹܗ ܐܲܠܵܗܵܐ ܓܘܼܪܵܐ ܐܲܝܟ݂ ܐܲܠܵܗܲܢ؟
14 ܐܲܢ݇ܬ ܝܼܘܸܬ ܐܲܠܵܗܵܐ ܥܵܒ݂ܕܵܢܹ̈ܐ ܕܕܘܼܡܵܪܹ̈ܐ،
ܡܘܼܕܸܥ ܠܘܼܟ݂ ܓܵܘ ܥܲܡܡܹ̈ܐ ܚܲܝܠܘܼܟ݂.
15 ܦܘܼܪܸܩ ܠܘܼܟ݂ ܒܕܪܲܥܢܘܼܟ݂ ܠܥܲܡܘܼܟ݂،
ܒܢܲܝ̈ ܝܲܥܩܘܿܒ݂ ܘܝܵܘܣܸܦ.
ܣܹܠܵܗ
16 ܚܙܹܐ ܠܗܘܿܢ ܐܸܠܘܼܟ݂ ܡ̈ܝܼܵܐ، ܝܵܐ ܐܲܠܵܗܵܐ،
ܚܙܹܐ ܠܗܘܿܢ ܐܸܠܘܼܟ݂ ܡ̈ܝܼܵܐ ܘܪܘܼܬܪܸܬ ܠܗܘܿܢ،
ܐܘܼܦ ܪܓܝܼܕ ܠܗܘܿܢ ܬܗܘܿܡܹ̈ܐ.
17 ܥܢܵܢܹ̈ܐ ܫܘܼܦܸܟ݂ ܠܗܘܿܢ ܡ̈ܝܼܵܐ،
ܩܘܼܪܩܸܡ ܠܗܘܿܢ ܫܡܲܝܹ̈ܐ،
ܐܘܼܦ ܓܹܐܪ̈ܘܼܟ݂ ܣܛܹܐ ܠܗܘܿܢ.
18 ܩܵܠܵܐ ܕܩܲܪ̈ܩܲܡܝܵܬܘܼܟ݂ ܒܓܵܪܕܵܒܘܼܠܹܐ،
ܒܘܼܗܪܸܢܗܘܿܢ ܒܸܪ̈ܩܹܐ ܠܒܪܝܼܬܵܐ،
ܪܓܝܼܕ ܠܵܗ̇ ܘܕܘܼܪܘܸܕ ܠܵܗ̇ ܐܲܪܥܵܐ.
19 ܒܝܵܡܵܐ ܝܼܗܘܵܐ ܐܘܼܪܚܘܼܟ݂،
ܘܫܒ݂ܝܼܠܘܼܟ݂ ܝܼܗܘܵܐ ܒܡ̈ܝܼܵܐ ܪܵܒܵܐ،
ܘܫܵܘܦܵܦܹ̈ܐ ܕܐܲܩܠܘܼ̈ܟ݂ ܠܵܐ ܦܝܼܫ ܠܗܘܿܢ ܚܸܙܝܹܐ.
20 ܡܗܘܼܕܹܐ ܠܘܼܟ݂ ܐܲܝܟ݂ ܥܸܪ̈ܒܹܐ ܠܥܲܡܘܼܟ݂،
ܒܐܝܼܕܵܐ ܕܡܘܼܫܹܐ ܘܕܐܲܗܪܘܿܢ.