13
1 Afa so ka elni ahanaig ahanaig mona afa ofwanai elni mona sihiagba afa so ka elim membenig hwanigba eba kana mo lagig ofenaiba li megim tigigbi eso isug wago afa ofenaiba ainim heugugbi eso angwenig.
2 Afa ateamba God kam kifutig faigba eso ka Godna mo fa sihiaule el lofeg afa ateamba ka mungwali gawigim anwanafeg afa ka Godna mungwali meaganai onigigim anwanafeg afa ateamba kana olug onigig yuhwafegba eso ka mugum esonaf so hili ika afa ka nai yi elim membenig nihe gohug hwanigba eba ka isug feg.
3 Afa so ka kiafna mungwali gawig el gawig hwainig elim mimagegoniba afa so ka kikeafna eligim wahiaiba so kam suwina tuhluf afa so ka nai yi elim membenig nihe gohug hwainig eba enag gafugag so ka eseg eba mas kam kweagfui.
4 Afa el mingnagim membenig eba enaig eseg elim nengigim afa afoahlanam enaig esenag afa enaig el mas elim ambobugenai afa mas hefum fingi fei afa mas tutonbusiagei.
5 Afa el mingnagim membenig eba enaig eseg nigmagegim eba mas ehe ika gosui. Afa ehe mas ikagna ninimui afa amtakwalig ehem esinig enam mas onigaufi.
6 Afa membenag nihe eba mas amtakwaligim sifakalenag mo eba inim mom sifakalenag.
7 Afa membenag nihe eba enaig eseg ahanaig ahanaig kinig so enaig elim pugunafe eba ehe mas enam kusi. Afa enaig elbi eba higeg Godum hugna anwanafenagim eso higeg ningegohba eso higeg ehem kinig mas pigaupi.
8 Afa membenag nihe eba gwese higeg gofif afa Godna mo fi sihiaule elni mo eba awaief afa ahanaig ahanaig mona wanwagig gaba eba awaief afa el so nalig anwanafig afa ehengelni enag anwanag gaba awaief.
9 Afa lahlag anwanag so big fig eba mingnagim mungo big wambug. Afa Godna mo fi sihiaule elni mo eba mingnagim mungo wambug.
10 Afa mahim mang etini so puguiba eso mang mungo mungog so big wambug eba gweyi awaief.
11 Afa mahim ka luwal lofug gofenaba kana mo lagig i afa onigig i afa kwefihiageg i eba luwal wesig nihig. Afa mahim ka amunai lofegba eso ka luwalna niheba wahiag.
12 Afa yawo big mangim so nanguig eba ofenaiba mangna sungwagim bu nof wa mas big numwehe nanguig mo. Afa autunai wa big enam numwehe ambagwa nanguf. Afa yawo ka mungo mungoagim anwanafeg afa enanam mahim mang etini puguiba eso kana anwanag gaba enanam etini puguf eso ofenai mungwalofug God ati kam anwanafenag.
13 Afa sambaga mungo nihe gwese higeg gohug eba Godum olug onigig i afa nengeafu God lahlag bigim esenig i afa membenag nihe i. Afa membenag nihe enam nihem mungwali gosu wambugu.