8
Sisasba bigelni prisni misog el feg
Kangelni mog mo eba enaig feg. Bigelbi ati feg prisni misog elbi yuhwafeg go. Afa ehe heven wa God kifutig nemugna muhwa pega. Afa ehe afsug lala meg gam sahugum eso prisni misog el gafuga feg afa enag lala God ehe nimba wahiag elbi mas ena lalaba esei. Eba Godna inim lofug lala.
Afa mungwali prisni misog el enaig esifini gawig Godum faifinim afa sis tigi tuhlu faifini. Eso prisni misog el bigelni ehe gaba so ma mang Godum fai. Afa so ehe ohuna bite wa gofiteba eba mas pris gofite afa eba pris ohuna bite wa agfohiafena afa so ehengel Ju elni nihe mo pahlukuiafenaba eso Godum gawig faifini. Afa pris gafugag so finibi enaba eba isug enaigim wagfug afa ini nemugba eba heven wa goh. Afa enaig Moses esenaba enag gaba isug wagfug. Afa ehe mahim Godna lofug lala nimbanaba eso God kifutig mo enaig sihifena og, “So na numwehe gafugafe so na mungwali gawig esegba so ma mungwal lofug fe osa ka nem mug wa wagfuna.” Afa Sisas enag pris gafugag fagba eba sonag elni gafugagim kwegfukag. Afa God ati sihi wahiana eso Sisas God nangum ikag mina tuhla wahiag afa eba ena mina mi afa mo mi gofanaim kwegfukag.
Afa gofwanai mina yuhwafegba God mas ming minaba tuhla wahiai. Afa God heafna elni amtakwalig nihem nangwagigim eso mas sifakaleni afa so ehe enaig esog og;
Ainiyag enaig esog mahim enanam ofefiba ka so mulug mo Israel el mi afa Juda el mi sihi wahian. Afa enag mulug mo sihi wahiag mo eba mas mungwal lofug fena mo ehengelni simbianiga osa ka esini. Afa enanam ka ehengelim ningana kikenam eso ka Isipim wanwahianam wanikana. Afa osa ka ehengelim sihi wahinibi afa ehengel mas pahlukuna mo eso ka ehengelim masig fatinig. 10 Afa nengigim ka Israel elim enaig mo sihi wahiani fi. Afa kana nihe mo ka ehengelni onigig wa wahian fi afa ka ehengelni olug yi ginofe wahiaf. Eso ka ehengelni God fenif afa ehengel kana el fif. 11 Afa mas aman mungo heafna hihem Ainiyagna mo wagfunag mo afa mas aman mungo heafna nilitem enaig esona og, ‘So na Ainiyagim anwanafini.’ Eso ma nalig el i afa isug el i mungwali kam anwanafini. 12 Afa ka ehengelni amtakwalig nihem fafatinim afa mas ka enam piske onigkafi. Jer 31:31-34
13 Afa God enaig esog ka mulug mo sihi wahiag afa enam eba wagfug gofwanai mo ehe sihi wahiag eba ati muhunag. Afa mang so autunaieg enaba isug gohba awaiegim ofe.