3
Jon buwa aitiag el mo sihiagena
Matyu 3:1-12, Mak 1:2-8, Jon 1:19-28
1 Afa mahim 15 yia fenaba Taiberius Rom elni misog el fena. Afa Pontius Pailat eba distrik Judia gavmanna gosug el fena. Enenaba Herot distrik Galilim nangwaghiage gofna afa ehena sumineg Filip mo distrik Ituria mi afa Trakonitis mi enam nangwagehiagena afa Lisanias mo distrik Abilenem nangwagehiagena.
2 Afa Anas i Kaiafas i eba prisni misog el ahgofena. Enenaba Sekaraiana leg Jon bite bihig wa gafna. Afa God Jonim mo faina.
3 Afa so ma mungwali elim Jordan bu bug muhwa gohka enam sihinwageakai afa enaig esona og, “Sa ma olug wahigifinim, bu wa apaiyeiba afa so ma God ehengelni amtakwalig nihem hugufatini.”
4 Afa enaigba pugunaba eba ati mo fa sihiaule el Aisaiana mo buk wa gofena. Ena mo enaig esona og;
El mungo bite bihig wa mo sihiakaf afa ehe enaig esof og, ‘Ainiyagna mina ambafeaginim numwehiagi.’
5 Afa mungwali mog tutohiageakaiba so ma tafafakai so ma hugufagim fegim fuku gwenaig eseg. Afa mina kiapesegim so ma misosuf gi afa mina mas lahlafeg mo so ma numwehefi.
6 Afa bitenai el mungwali so ma Godna gafugagim nangunim eso ehe bigim wambugum eseg. Ais 40:3-5
7 Afa eso el numb Jon nangum fambofena buwa apaiyegim afa Jon enaig sihifeni og, “Nengel giheana luwalig, God so ma nem tautig fai afa aman nem sihinigbi so na embemba ahuf?
8 Afa ateamba ne inim olug wahigifigbi eba so ma nimbeafgelni nihem wagfui eba ati ne inim olug wahigifig. Nofeka nimbefum esogo, ‘Abraham eba kangelni simbianiga.’ Ka nem sihinig eba God ehe ohuna hunim eseiba eso Abrahamna simbianiga opuko agfohef.
9 Afa mal ati li mog wa gi afa mungwali li so lahlag fug leg hwanigba, eba malna higfihinim suwi wa aitif.”
10 Afa el Jonna mom higinim afa esogona og, “Ahnaig so ka esife?”
11 Afa ehe wahigi sihini og, “El so sambaga lofugna fef eso ma ming mo aman so lofug hwainig feg so ma enam fai. Afa aman so fane hwainig feg ena gaba so ma gwenaig esenai.”
12 Afa mingnag kig wambule el ambugog buwa apaiyofefnaba Jonim sahni og, “Tisa, ahanaig so ka esife?”
13 Afa ehe wahigi sihini og, “Kig so na wambugbi eso ne gavmanna moaihwa wambufum nofena gwesim hilifi.”
14 Afa ami gaba ambugog ehem sahni og, “Ka gaba ahanaig so ka esife?”
Afa ehe sihini og, “Nofeka mingnag elim amtakwal hiaginim kig wambugoni, afa so nofeka mingnagim mungunim mwakwalogon so na nimbeafna kigim oniginim eso ne gwenaig yuhwa eseahufum.”
15 Afa el enaigim nangunim olug fingi feskofenam afa enaig onigini og eba ohuna Jon me awai God Gishu Wahiag el me.
16 Afa Jon piske wahigi sihini og, “Kaba buna nem esenig, afa el so sumi yi obo ena elbi eba kifutigni feg ehena kifutig kana kifutigim kwegfug gwesim ikag, kaba mang lahlag el mo na ka ehena mong lofug weba pigina. Eba ehe nem Godna Sungwagni afa suwina eso nem buwa aitif.
17 Eba ehe savol ningana fanam eso bof afa ehe bonam hunisege mo wit yi nai wambuhiagenam eso wit mo wambinam heafna wit lala skofe afa hunisege mo wambinam suwi higeg lagig yi wahlaf.”
18 Jon mahim ena mo sihinaba afa ena mo elni olugim fuku wasana. Ehe elim Godna lahlag mo sihinwageg gafugafena.
Herot Jonim kalabus i fatina
19 Afa mahim Herot heafna suminegna angwagim Herodiasim fapuguf nagohun eso fana afa ahanaig ahanaig nihem gaba gwenaig esagena naso Jon ehem nunmuna.
20 Afa so ena nangum Herot Jonim kalabus lala fa fati wahiana.
Jon Sisasim buwa fatina
Matyu 3:13-17, Mak 1:9-11
21 Afa Jon mahimsi kalabus seg hwainig fiafnaba afa mungwali el buwa apaigona afa Sisas gaba gwenaig esena buwa pena. Afa buwa penam pugu betene gofenaba afa so of pigina.
22 Afa mahim of pigi gofnaba Godna Sungwag gamp lofug Sisas nangum pe bonam afa higfufnaba Godna mengig heven wa enaig wagofna og, “Ne kana leg, ka nem hugna membenag, afa kana olug nem lahlafenag.”
Sisasna simbianiga unehlag
Matyu 1:1-17
23 Afa so Sisas gafugafena enag ehena krismasba 30 enaig wa fena. Afa el enaig onigini og eba Josepna leg,
afa Josepba Helina leg,
24 afa Heliba Matatna leg,
afa Matatba Livaina leg, afa Livaiba Melkini leg,
afa Melkibi Janaina leg, afa Janaiba Josepna leg,
25 afa Josepba Matatiasna leg, afa Matatiasba Amosna leg,
afa Amosba Nahumni leg, afa Nahumbi Eslina leg,
afa Esliba Nagaini leg,
26 afa Nagaibi Matna leg,
afa Matba Matatiasna leg, afa Matatiasba Semenna leg,
afa Semenba Josekna leg, afa Josekba Jodana leg,
27 afa Jodaba Joananna leg, afa Joananba Resana leg,
afa Resaba Serubabelna leg, afa Serubabelba Sealtielna leg,
afa Sealtielba Nerina leg,
28 afa Neribi Melkini leg,
afa Melkibi Adini leg, afa Adibi Kosamna leg,
afa Kosamba Elmadamna leg, afa Elmadamba Erni leg,
29 afa Erbi Josuana leg, afa Josuaba Elieserna leg,
afa Elieserba Jorimna leg, afa Jorimba Matatna leg,
afa Matatba Livaina leg,
30 afa Livaiba Simeonna leg,
afa Simeonba Judana leg, afa Judaba Josepna leg,
afa Josepba Jonamna leg, afa Jonamba Eliakimni leg,
31 afa Eliakimbi Meleana leg, afa Meleaba Menana leg,
afa Menaba Matatana leg, afa Matataba Natanna leg,
afa Natanba Devitna leg,
32 afa Devitba Jesini leg,
afa Jesibi Obetna leg, afa Obetba Boasna leg,
afa Boasba Salmonna leg, afa Salmonba Nasonna leg,
33 afa Nasonba Aminadapna leg, afa Aminadapba Atminna leg,
afa Atminba Arnina leg, afa Arniba Hesronna leg,
afa Hesronba Peresna leg, afa Peresba Judana leg,
34 afa Judaba Jekopna leg, afa Jekopba Aisakna leg,
afa Aisakba Abrahamna leg, afa Abrahamba Terana leg,
afa Teraba Nahorna leg,
35 afa Nahorba Serukna leg,
afa Serukba Reuni leg, afa Reubi Pelekna leg,
afa Pelekba Eberna leg, afa
Eberba Selana leg,
36 afa Selaba Kainanna leg, afa Kainanba Arpaksatna leg,
afa Arpaksatba Siemna leg, afa Siemba Noana leg,
afa Noaba Lamekna leg,
37 afa Lamekba Metuselana leg,
afa Metuselaba Enokna leg, afa Enokba Jaretna leg,
afa Jaretba Mahalalelna leg, afa Mahalalelba Kenanna leg,
38 afa Kenanba Enosna leg, afa Enosba Setna leg,
afa Setba Adamna leg, afa Adamba Godna leg.