Basef Amama Jon Naliꞌ Nandaꞌami
Basef bandami Jon naliꞌ nandaꞌami
1:1-4 Jon naꞌi basef Godi nafela ukup asasimi ma sondanifel
1:5–2:29 God anan nafifili. Eaꞌ apeꞌ mofeꞌ nafifili ma mondaꞌ waf buꞌunai ukup mimila epes hiesi
3:1-24 Apeꞌ mape awasi Godi. Eaꞌ deiꞌ apeꞌ ukup maimaila sahin owan apeꞌisi, eaꞌ epes awasi Satani sandaꞌ waf aonai laꞌelaꞌef.
4:1-6 Apeꞌ mowaloga ambagof hiami mogawa ambal Godi o ambal aonai Satani.
4:7–5:21 God nasapaꞌ Nogalomana Ananinai nafiꞌi etap anaeꞌ nihiꞌambapa waf ukup maimailasanai. Eaꞌ mombaleꞌefana ma mope laꞌifipa molomana mofaꞌ ambal namunai.
1
Basef ambal namunai napaimi
Afaꞌ wandaꞌ basef amama ma anona aman agilinama Basef* anan naseꞌapa ambal namunai napaipai. Aman anama fowaꞌ gani damba damba nape. Afaꞌ wameꞌ basef ananimi watolona naep mahapilana lagof afaꞌimi. Ambal anama namunai nataga eaꞌ afaꞌ watolona naep afaꞌimi. Amama atom deiꞌ afaꞌ wawalipipa ma ambal anama nape laꞌelaꞌefi. Ambal anama fowaꞌ nape naloma Ahalomapa deiꞌ nataga alihina watolona. Amamaga amama afaꞌ watolom wameꞌami deiꞌ waꞌipipam ipeꞌ wapotiꞌ ma pepe ukup etifim pelomafa. Afaꞌ wape wambota atona waloma Ahalomafa naloma Nogalomana ananinai Jisas Krais. Afaꞌ wandaꞌ basef amama ma anona nemaf danifel apeꞌinai notaga luꞌuna ma apeꞌ.
God anan nafifili nandaꞌ waf buꞌunai atona
Basef amama afaꞌ wameꞌama anan naꞌama. God anan nafifili afitinai. Ina anona owamb nailana, owaꞌ. Iꞌi apeꞌ miꞌi mope ukup etifim molomana, ama apeꞌ ataꞌ mape mandaꞌ waf aonai siꞌi mape owamb atona, apeꞌ mambasoꞌma apeꞌ atepa ma basef apeꞌimi maloma feꞌ apeꞌinai. Anan nafifili afitinai. Iꞌi mope mififil siꞌi anan waf aonai aꞌapa, eaꞌ mope ukup etifim moloma sahin owan hiesi. Jisas Nogalomana Godi. Eaꞌ esimbel ananimi masaꞌopa waf aonai apeꞌ mandaꞌanai hianai hiꞌalana mataga boꞌopa. Iꞌi apeꞌ miꞌi waf aonai aꞌapa, apeꞌ mambasoꞌma apeꞌ atepa eaꞌ basef endilisimi ina mapaipa, owaꞌ. Iꞌi apeꞌ mowalapa waf aonai apeꞌ mandaꞌanai alihina, atuwasi Anan nokwahomapa waf hianai aonai apeꞌ mandaꞌanai nosaꞌopapa motaga boꞌopa andeandeꞌ. Basef fowaꞌ naꞌi endilisimi atom nondaꞌ waf buꞌunai andeandeꞌ. 10 Iꞌi apeꞌ miꞌi, “Apeꞌ owaꞌ mondaꞌ waf aonai”, apeꞌ mofala God maꞌi anan aman naꞌi basef basoꞌmaimi. Eaꞌ basef ananimi ina mape opalef apeꞌimi, owaꞌ.
* 1:1 Anona aman agilinama Basef, maꞌi Jisas Krais atona. 1:2 Basefa ambal anama ofagema basef biefim. Anom maꞌi agel waꞌana Krais, siꞌi basef mape lain 1. Eaꞌ anom maꞌi ambal siꞌi ambal epesi.