Eprêw
Ijaew hwỳr kagà
Kagà ja na pre Ijaew õ amnhĩ kwỳjê mã hipêx nom mẽ pahte hipêx xwỳnh nhĩxi mar kêt. Na pre tanhmã hamaxpẽr to nẽ amnhĩ nhĩxi hã kagà hkêt nẽ. Apu Pawre rỳ apu axtem mẽhõja na pre hipêx. Ijaew kwỳjaja uràk nẽ Jejus kôt amnhĩ xunhwỳr xwỳnhjê mã na pre hipêx nẽ mẽ hwỳr kumẽ. Ijaewjaja mẽ hixi hõ pê Eprêw. Jakamã nhũm kagà nhĩpêx xwỳnhja mẽ hwỳr hipêx nẽ kumẽ. Nẽ kamã mẽ kãm mẽmoj jarẽnh rax nẽ tanhmã Jejus jarẽnh to.
Nẽ mẽ hkwỳjaja hkwỳjê hkĩnhã kãm Jejus prãm kêt jakamã na prem hkaga nẽ mẽ kot amnhĩ nhĩpêx tũm o ujanãr prãm xàj tanhmã mẽ homnuj to ho pa. Jakamã nhũm kagà nhĩpêx xwỳnhja tanhmã ja hã mẽ kãm kapẽr to.
Nẽ na pre tanhmã Tĩrtũm nhõrkwỹ kaàkre hã kagà hto. Nẽ kaxkwa kamã õrkwỹ mexja nhũm tanhmã hã kagà hto nẽ mex o õrkwỹ kaàkre jakrenh ã harẽ.
Nẽ mẽ kot Jejus ã amnhĩ xà htỳx kamã hamak o pa htã mẽ kot tee ri ja hã amnhĩ pumunh nẽ Jejus kaga nê mẽ hkurê kamã hihtỳx nẽ. Ã mẽhõja mẽ kãm kapẽr anẽ nẽ hã kagà nẽ mẽ hwỳr kumẽ. Nẽ mẽ kãm kapẽr o:
1
1 Pa Kris kôt ixkwỳjaja? Xà mẽ amex? E ot pa mẽ amã kagà nhĩpêx nẽ mẽ awỳr kumẽ. Amnepêm Tĩrtũm na pre mẽ panhĩgêtjê hwỳr ỹ hã kapẽr jarẽnh o ri mẽ pa xwỳnhjê rẽ nhũm mẽ xatã mẽ kãm kapẽr jarẽnh o ri mẽ hkôt pa. Ahpỹnhã tanhmã mẽ kãm kapẽr to ho amnhĩrĩt o mẽ hkôt pa. Nhũm Tĩrtũm xatã mẽ hkanrẽhã mẽ hkra nẽ mẽ htàmnhwỳjê hwỳr mẽ hkwỳjê rẽ nhũm mẽ kãm kapẽr jarẽnh o ri mẽ hkôt pa. Nom mẽ kãm kapẽr piitã harẽnh kurê kumrẽx kêt nẽ. Na prem ãm hkwỳ pix jarẽ. Tã nhũm hpãnhã mẽ hkwỳjaja wamtajê mỳr pê mẽ hwỳr mra nẽ axte mẽ kãm hkwỳ jarẽnh o ri pa. Jao ra mẽ kãm harẽnh jatur xàm mẽnh o mõ.
2-3 Tã nhũm Tĩrtũm Kraja mẽ pahwỳr wrỳ nẽ mẽ pamã kapẽr jarẽnh jatur xàm kumẽ. Kêp Tĩrtũm Kra jakamã te kot amnhĩ nhĩpêx pyrà nẽ pa. Uràk nẽ mex o mex. Nẽ wa hihtỳx xàja tipxi. Nẽ wa àhpumunh tỳxja mããnẽn tipxi. Jakamã mẽ pahte pano ho Tĩrtũm pumunh kêt tã Jejus pumunh pê te mẽ pahte Tĩrtũm pumunh pyràk. Uràk nẽ kot amnhĩ to rax o mẽ pahpiitã mẽ pajakrenh par. Amnepêm kormã mẽmoj kêt ri nhũm Jejus Tĩrtũm kukwak ri mẽmoj piitã ho kator pa. Tã koja Tĩrtũm nhỹrmã kãm mẽmoj piitã õr pa. Kaxkwa kamã mẽmoj piitã nẽ jar pika piitã hkôt nhũm kãm piitã õr pa.
Nẽ Jejus xàhpumunh xà pix kukwak ri na mẽmoja arĩ rãhãã. Na pre mẽ panê mẽ pahte amnhĩ tomnuj piitã hpãnhã amnhĩrer par kaxyw mẽ panê ty. Hãmri akupỹm htĩr hãmri nẽ ma akupỹm kaxkwa hwỳr api. Tĩrtũm xihtỳx o hihtỳx xwỳnhja wỳr akupỹm api. Nẽ õ krĩ kamã upôk rũm pahi maati hkrĩ xà hã kuri hkrĩ ho hkrĩ. Nẽ ĩhkô hã mẽ pahto amnhĩptàr rãhã ho hkrĩ.
Jejus mẽ Tĩrtũm kapẽr o mẽ wrỳk xwỳnhjê jarẽnh
4-5 Nẽ Jejus kot amnhĩ to rax o Tĩrtũm kapẽr o mẽ wrỳk xwỳnhjê jakrenh jakamã na pre ã Tĩrtũm kãm kapẽr anẽ nẽ kãm:
Na ka amnhĩ to rax o mẽ kot ixkapẽr o mẽ wrỳk xwỳnhjê jakre.
Mẽ kot inhmã tanhmã amnhĩ nhĩpêx to ho mẽ pa xwỳnh na mẽ.
No mẽ kurom apê Ixkra kumrẽx jakamã amex o ate mẽmoj piitã hakrenh par.
Nẽ apê pika nhõ xwỳnhjê hwỳr ixte amẽnh mã xwỳnh na ka. Nà apê Ixkra kumrẽx.
Kot paj jarãhã ixpê anhĩpêêxà hã mẽ piitã mẽ kãm amnhĩ to amnhĩrĩt. Pa na ixpê anhĩpêêxà.
Anhỹr o Kra Jejus mã kapẽr. Na pre kapẽr o mẽ wrỳk xwỳnhjê mã ã kapẽr anhỹr kêt nẽ. Jejus mã pix mã ã kapẽr anẽ.
6 Nẽ koja nhỹrmã akupỹn mẽ pahwỳr Kra mẽnh kaxyw hãmri nẽ kapẽr o mẽ wrỳk xwỳnhjê mã kãm:
E ota Ixkrata. Ixkra kumrẽx na. Kot amnhĩ to rax o mẽ piitã mẽ hakrenh par.
Jakamã kêr ka mẽ apiitã kutã arôrôk nẽ kãm mex o mex ã harẽ.
Anhỹr o mẽ kãm kapẽr.
7 Nẽ kapẽr o mẽ wrỳk xwỳnhjê na pre axtem tanhmã mẽ harẽnh to nẽ mẽ harẽnh o:
Ixkapẽr o mẽ wrỳk xwỳnhjaja na pa hte nhỹhỹm mẽ kurẽ nhũm htem inhmar xà hkôt ma nhỹhỹm mra nẽ inhmã tanhmã amnhĩ nhĩpêx to.
Te ixte ma nhỹhỹm kôk nẽ kuwyja mẽnh nhũm ixkapẽr kôt nhỹhỹm mõrja pyràk.
Anhỹr o mẽ harẽ.
8 No ã Krata jarẽnh anhỹr kêt nẽ. Na pre tanhmã kãm kapẽr to nẽ amnhĩ pyrà nẽ kêp Tĩrtũm ã harẽ nẽ kãm:
Pa Tĩrtũm? E ka kot kaj mẽ ho amnhĩptàr rãhã ho akrĩ. Nẽ akatàt kôt mẽ ho amnhĩptà.
9 Koja mẽ tãm amnhĩ nhĩpêx ka ja hã mẽ omu nhũm ja amã mex nẽ.
No koja mẽ tanhmã amnhĩ tomnuj to ka ja hã mẽ omu nhũm ja apê omnuj nẽ. Mẽ kot tanhmã amnhĩ tomnuj to ho paja na omnuj tỳx.
Tã ate inhmã hprãm xà hkôt amnhĩ nhĩpêx jakamã na pa mẽ kaxyw axãm ka akĩnh kãm mẽ ho amnhĩptà.
Ixpê anhõ Tĩrtũm na pa ã amã ixkapẽr anẽ. Anẽ.
10 Hãmri nẽ kãm:
Pa Pahihti. Nà amnepêm kormã mẽmoj kêt ri na ka pre ixkukwak ri pika nẽ kaxkwa ho akato. Ãm hãmri na ka pre ã amnhĩ nhĩpêx anẽ.
11 Tã nom koja nhỹrmã hamẽ wa hapêx pa. Ãm kaxipix kot kaj kurom arĩ arãhãã nẽ aa ajapêx kêt nẽ.
Kaxkwa nẽ pika koja wa nhỹrmã te ixkre hã pô htũm kot amnhĩ nhĩpêx pyràk.
12 Kot kaj wa hipêx o te mẽ kot ixkre nê pô htũm mã hikranh par nẽ hpãnhã hã nyw janhôr pyràk.
Jao pika nẽ kaxkwa htũm o ajapêx pa nẽ hpãnhã nyw nhĩpêx. Kaxkwa nyw nhĩpêx nẽ pika nyw nhĩpêx.
Nom kot kaj pika nẽ kaxkwa tũmta pyrà nẽ aa awej nẽ axirerek kêt nẽ.
Kot kaj arĩ anyw nẽ axihtỳx rãhã apa ho apa nẽ aa ajapêx kêt nẽ. Arãhã atĩr tũm nẽ apa ho apa xwỳnh na ka.
13 E jar inhĩhkô hã nhỹ nẽ inhmã mẽ ho amnhĩptàr o akrĩ.
Kot paj mẽ kãm akurê xwỳnhjê pynênh pa nẽ man awỳr mẽ o mra nẽ anhĩhkram mẽ haxàr pa. Anẽ.
à na pre Tĩrtũmja Kra Jejus mã kapẽr anẽ. No kapẽr o mẽ wrỳk xwỳnhjê mã ã kapẽr anhỹr kêt nẽ.
14 E kot paj hpãnhã ixprĩ hã mẽ amã Tĩrtũm kapẽr o mẽ wrỳk xwỳnhjê jarẽ ka mẽ inhma. Tĩrtũm mã na htem tanhmã amnhĩ nhĩpêx to ho pa. Na hte nhỹrmã kuri mẽ htĩr tũm nẽ mẽ pa mã xwỳnhjê hwỳr mẽ kurẽ nhũm mẽ ma mẽ hwỳr wrỳ nẽ tanhmã mẽ ho ajuta hto ho pa. Na htem ã amnhĩ nhĩpêx anhỹr o pa.