4
Mẽ pahte Tĩrtũm kukwak ri pajamakêtkati nẽ ri papa hã mẽ pajarẽnh
1 Mẽ pahte Tĩrtũm kukwak ri pajamakêtkati nẽ ri papa ho papaja Tĩrtũm kãm hprãm jakamã kwa kêr pu mẽ amnhĩ pumunh mex o papa. Nẽ wam mẽ panhĩgêt rom Tĩrtũm kapẽr mar tỳx nẽ hkôt mãn kêt ri amnhĩ nhĩpêx mex rãhã nẽ. Kêr pu mẽ kurom mẽ pajamak kãm amnhĩ krit xà hã pika mexta wỳr pôj.
2 Mẽ kot mẽ pahpyrà nẽ Tĩrtũm kapẽr mar mex tã na htem amnhĩ kaxyw hkôt hamaxpẽr kêt nẽ. Te mẽ kot mar kêt pyràk.
3 ãm mẽ kot amnhĩ kaxyw Kris mã hamaxpẽr xwỳnh pixjaja na htem kukwak ri hamakêtkati nẽ ri pa ho pa. Amnepê mã mẽmoj piitã hkêt ri na pre Tĩrtũm mẽmoj piitã ho kator pa hãmri nhũm apkati nhũm axte mẽmoj tã àpênh kêt nẽ. Ãm õ krĩ kamã arĩ hamakêtkati nẽ hkôkôt o hkrĩ. Tã mẽ pahte uràk nẽ pajamakêtkati nẽ papa ho papaja na kãm hprãm. No wam ri mẽ pa xwỳnhjaja mẽ kot amnhĩ tomnuj mỳrapê na pre Tĩrtũm mẽ kot urà nẽ hamakêtkati nẽ paja nê mẽ hkurê. Kapẽr ã kagà htũm kot harẽnh kot:
Na pre Tĩrtũm tee ri amnhĩ tã mẽ kot hipêx ã mẽ omu nhũm ja kêp omnuj nẽ. Hãmri nhũm mẽ kãm: “Nà kot kaj mẽ ixkukwak ri axàmnhĩx ajamakêtkati nẽ apa hkêt nẽ.” Anẽ.
4 Nẽ kot harẽnh kot:
Na pre Tĩrtũm àpênh ã arĩgro kêp 6 hãmri nhũm arĩgro pê 7ta ã nhũm axte mẽmoj tã àpênh kêt nẽ. Na pre arĩ hkôkôt o nhỹ.
Arĩgro pê 7 ã arĩ hamakêtkati nẽ hkôkôt o nhỹ. Anẽ.
5 Nẽ mẽ kot kapẽr mar nẽ ãm mar xwỳnhjê jarẽnh kot:
Kot kaj mẽ aa ixkukwak ri axàmnhĩx nẽ ajamakêtkati nẽ apa hkêt nẽ. Anẽ.
6 Mẽ panhĩgêtjaja kot amnhĩ kaxyw Tĩrtũm kôt hamaxpẽr kêt jakamã na prem hamakêtkati nẽ ri pa hkêt nẽ. Tã mẽ papajaja na Tĩrtũm arĩ kãm mẽ paxàmnhĩx nẽ pajamakêtkati nẽ papa hprãm.
7 Amnepêm Ijaew Tĩrtũm kôt hamaxpẽr kêt jakamã na prem kapôt ã pikaprãr pa. Hãmri nhũm amgrà xohtô nẽ hapêx nhũm Tĩrtũm mẽ hkanrẽhã mẽ htàmnhwỳjê hõ pê finat Tawija mã kapẽr nhũm kuma nẽ mẽ pamã tanhmã kapẽr tota ã kagà nẽ hã kagà kot:
Kwa kêr ka ixkapẽr ma nẽ mar tỳx nẽ.
No mẽ anhĩgêtjê pyrà nẽ akrã hihtỳx ho inhma nẽ ãm inhmar kêt nẽ. Anẽ.
Na pa pre ra mẽ amã ã ja jarẽnh anẽ.
8 Na pre finat Jojueja finat Mojes mỳr pê ma pika pê Kanaã hwỳr mẽ hkanrẽhã mẽ hkrajê o pa nẽ hwỳr mẽ o pôj. Tã nhũm prem Jojue kukwak ri hamakêtkati nẽ pa ho pa hkêt nẽ. Kêp ãm kukwak ri ã amnhĩ nhĩpêx anhỹr ronhỹx Tĩrtũm axte mẽ kãm mẽ hamakêtkati nẽ mẽ hamak kãm amnhĩ krit nẽ mẽ pata hkukamã harẽnh kêt nẽ.
9 Nom mẽ pahte kukwak ri pajamakêtkati nẽ pajamak kãm amnhĩ krit nẽ ri papa ho papaja na Tĩrtũm arĩ kãm hprãm.
10 Na pre arĩgro pê 6ja ã mẽmoj piitã ho kator pa nhũm apkati nhũm hamakêtkati nẽ hkôkôt o nhỹ. Tã kot puj mẽ pahpê hkrajaja amnhĩ to kuwỳ nhũm tanhmã mẽ pahkrã hto pu mẽ kukwak ri uràk nẽ paxàmnhĩx nẽ pajamakêtkati nẽ papa ho papa. Te Tĩrtũm àpênh pa nhũm apkati nhũm hamakêtkati nẽ hkôkôt o ỹrta pyràk.
11 Jakamã kwa kêr pu mẽ amnhĩ to kuwỳ kê ã mẽ panhĩpêx anẽ pu mẽ uràk nẽ ã amnhĩ nhĩpêx anhỹr rãhã ho papa. Nom kot pu mẽ pahkwỳ Ijaewjê pyrà nẽ kapẽr kwỳm amnhĩ nhĩpêx o papa hãmri nẽ mẽ urà nẽ paxàmnhĩx pajamakêtkati nẽ papa hkêt nẽ.
Tĩrtũm kapẽr te kot wapo xwa gix pyràk ã harẽnh
12 Nẽ Tĩrtũm kapẽrja te ĩ ho tanhmã kot mẽmoj to kaxyw hihtỳx pyràk. Nẽ te wapo xwa gix pyràk. Koja mẽhõ õ wapo xwa mex nẽ ho mẽmoj jakàr mex nẽ. Ho mry hi jakàr mex pê kaxwỳnh kãm hi kanhĩn o amnhĩrĩt. Ja pyrà nẽ na hte Tĩrtũm kapẽr mẽ pajamaxpẽr o amnhĩrĩt nẽ mex ã harẽ rỳ omnuj ã harẽ.
13 Nẽ na htem Tĩrtũm pê mẽmoj to pimxur kêt nẽ. Na hte hprĩ hã mẽmoj piitã omunh pa. Nẽ mẽ pajamaxpẽr kôt mẽ pahpumunh pa. Na pu htem ã kot mẽmoj piitã omunh par anhỹr xwỳnhja noo mã tanhmã amnhĩ nhĩpêx to rãhã ho papa.
Jejus kêp mẽ panhõ patre maati hã harẽnh
Eprêw 10.19-25; Wam Juãw 2.1-2
14 Nẽ Ijaew nhõ patrejaja na pre htem Tĩrtũm mã amnhĩ jarẽnh xà hã ixkre hwỳr agjê nẽ kamã mẽ ho Tĩrtũm wỳr o pa. Ja pyrà nẽ na pre ra Jejus Tĩrtũm nhõ krĩ hwỳr api nẽ kamã mẽ pahto hwỳr o hkrĩ. Kêp Kra kumrẽx jakamã kêp mẽ pahto Tĩrtũm wỳr xwỳnh maati. Jakamã kwa kêr pu mẽ amnhĩ kaxyw hkôt pajamaxpẽr tỳx rãhã ho papa.
15 Satanasti na pre te kot mẽ panhĩpêx pyràk o Jejus nhĩpêx. Nẽ tee ri kot tanhmã kãm kapẽr to nhũm kot mar nẽ tanhmã amnhĩ tomnuj to hprãm xàj ãm ri kãm ahkrox kaprỳ nhũm kutã amnhĩ to htỳx nẽ hkôt amnhĩ nhĩpêx kêt nẽ. Tã kot Satanasti kot amnhĩ nhĩpêx ã omunh mex jakamã na hte kêp mẽ pahtãnopxar mex o pa. Kot mẽ paxirerek kôt mẽ pahpumunh mex.
16 Jakamã kwa kêr pu mẽ amnhĩ tã kamã pahpijaàm kêt kãm paxàmnhĩx ri amnhĩ to hwỳr o papa. Kêp mẽ pakutã nojarêt xwỳnh nẽ kêp mẽ pakamã ukaprĩ xwỳnh jakamã kêr pu mẽ tee ri mẽmoj tã amnhĩ pumu nẽ amnhĩ to hwỳr kurê kumrẽx. Hãmri nẽ ỹ hã paxàmnhĩx nẽ pajamakêtkati nẽ ri papa.