8
Jejus kêp mẽ pahto Tĩrtũm wỳr xwỳnh maati hã harẽnh
Rukre 22.20; Sikũn Korĩt 3.6-11
E kot paj axtem tanhmã mẽ amã mẽ pahto Tĩrtũm wỳr xwỳnh maatita jarẽnh to ka mẽ inhma. Na hte kaxkwa kamã Tĩrtũm nhĩhkô hã hkrĩ. ĩhkô hã kêp Pahi Maati hã hkrĩ xà hã upôk rũm hkrĩ ho hkrĩ. Wam patre maatijaja na prem Tĩrtũm nhõrkwỹ kaàkre wỳr mra nẽ kamã hitom maati kamã mẽ ho Tĩrtũm wỳr o pa. Nom nhũm Jejus na hte mẽ kurom kaxkwa kamã Tĩrtũm nhõrkwỹ mex kãm mẽ pahto àhwỳr o hkrĩ. Õrkwỹ kaàkreja na prem ĩhkra ho hipêx nom kaxkwa kamã õrkwỹ mexja na pre mẽhõ ĩhkra ho hipêx kêt nẽ. Tĩrtũm na pre tanhmã hipêx to nhũm kamã Jejusja mẽ pahto hwỳr o hkrĩ.
Nẽ mẽ pahpê Ijaew nhõ patre maatijaja na prem mẽ ho hwỳr kaxyw nẽ mẽ kot amnhĩ tomnuj pãnhã Tĩrtũm mã mẽmoj nhõr kôt mẽ ho kuwỳ. No Kris na hte ã amnhĩ nhĩpêx anhỹr kêt nẽ. Ra htyk o kot kãm amnhĩ nhĩ nhõr jakamã na hte wam patre maati pyrà nẽ xatã kãm mẽmoj nhõr kêt nẽ.
Tã na hte arĩ Ijaew Mojes kapẽr kôt amnhĩm Rewi hkwỳ kêp mẽ õ patre kaxyw mẽ unhwỳ nhũm mẽ ho Tĩrtũm wỳr o pa. No Jejus kêp Rewi hkanrẽhã htàmnhwỳ hkêt. Katorxà hkôt kêp Juta hkanrẽhã htàmnhwỳ jakamã kop apu arĩ jar pika ja kamã htĩr nẽ pa ronhỹx Ijaew nhõ patre pyrà nẽ kêp mẽ ho Tĩrtũm wỳr o pa xwỳnh kêt. Ãm Rewi hkanrẽhã htàmnhwỳ pixjaja na htem mẽ kaxyw kãm mẽmoj gõ nẽ hkôt mẽ ho kuwỳ. Jar na htem arĩ ã amnhĩ nhĩpêx anhỹr o pa nom kaxkwa kamã na htem ã amnhĩ nhĩpêx anhỹr hkêt nẽ.
Nẽ jar Tĩrtũm nhõrkwỹ kaàkreja te kot kaxkwa kamã õrkwỹ mexta pyràk. Na pre Mojes õrkwỹ kaàkre nhĩpêx kaxyw nhũm Tĩrtũm tanhmã kãm hã karõ hto nẽ kãm:
—E jãã hixêt prêk nhĩmõk ã axãmta ã na pa pre amã ixkreta kukamã ixprĩ hã tanhmã mẽ ate hipêx to hã amã karõ. Tã kêr ka ã hipêx anẽ. Anẽ.
Hãmri nhũm kuma nẽ kot kãm hã karõ xà hkôt hipêx. Hãmri nhũm mẽ õ patre maati ixkreja kamã mẽ ho Tĩrtũm wỳr o pa. Na prem ã amnhĩ nhĩpêx anhỹr o pa.
Tã nhũm ra Tĩrtũm axtem mẽ hpãnhã mẽ pakaxyw Kris xãm nhũm hte mẽ pahto hwỳr mex o wamtajê jakre. Na hte kaxkwa kamã mẽ pahpiitã mẽ pahpumunh mex rãhã ho hkrĩ nẽ wamtajê rom tanhmã mẽ pahkrã hto pu mẽ tãm amnhĩ nhĩpêx o ri papa. Tĩrtũm kot finat Mojes mã kapẽrja mex nẽ nom axtem na pre. Tã kapẽr nyw na mex o kot wam kapẽr jakrenh. Kapẽr nyw kôt kot puj mẽ pahtyk tã akupỹm pahtĩr nẽ nhỹrmã Tĩrtũm mẽ Jejus wa kuri pamex nẽ pahtĩr tũm nẽ papa ho papa nẽ axte pahtyk kêt nẽ. Kêp apu Tĩrtũm kot Mojes mã kapẽr kôt mẽ kot tãm amnhĩ nhĩpêx o pa ronhỹx pre Tĩrtũm axte kapẽr nyw ã kagà hkêt nẽ. Nom wam kapẽr tũmta na pre mẽ mar tỳx htã arĩ amnhĩ tomnuj rãhã ho pa nhũm tee ri ja hã mẽ omu nẽ mẽ kãm:
Nà kot paj axte nhỹrmã mẽ apê Ijaew mã axtem tanhmã ixkapẽr to.
Amnepêm mẽ anhĩgêtjê mã na pa pre ixkapẽr.
Na pa pre Ejit pê mẽ kator nẽ mẽ kot tanhmã amnhĩ nhĩpêx to ho pa kaxyw tanhmã hã mẽ kãm karõ hto.
Nom na prem ixkapẽr ma nẽ ãm kuma nẽ ixkôt amnhĩ nhĩpêx kêt nẽ. Pa tee ri ja hã mẽ omu hãmri nẽ mẽ hkaga.
10 Tã kot paj mẽ apê mẽ hkanrẽhã mẽ htàmnhwỳ nywjê mã axtem ixkapẽr ka mẽ ixkapẽr nywja ma.
Kot paj nhỹrmã tanhmã mẽ akrã hto ka mẽ ixkapẽr nyw mar tỳx nẽ hã ano htỳx nẽ ho apa.
Nẽ akĩnh nẽ apa.
Nẽ ixkôt ri amnhĩ nhĩpêx mex o apa.
Nẽ axpẽn mã ijarẽnh o: “Nà ãm hãmri Tĩrtũm kêp mẽ panhõ Tĩrtũm na.” Anhỹr o ri axpẽn mã ijarẽnh o apa.
Pa amnhĩ tã mẽ ama nẽ mẽ apumu nẽ amnhĩ xwar mẽ apê ixkra hã amnhĩm mẽ ajarẽ.
11 Kot kaj mẽ apiitã ixte amnhĩ nhĩpêx kôt ixpumunh mex o ri apa. Mẽ akàxpore rũnh xwỳnhjaja nẽ mẽ akàxpore hkryre xwỳnhjaja mẽ apiitã ixpumunh mex jakamã kot kaj mẽ ri axte ixtã tanhmã axpẽn kukjêr to ho ri apa hkêt nẽ.
12 Nẽ kot paj mẽ ato mex rax o ixpa.
Nẽ axte tanhmã mẽ ate amnhĩ tomnu hto ho apaja mã ijamaxpẽr kêt nẽ. Anẽ.
13 Nẽ koja mẽmoj ra htũm hãmri nẽ hapêx tokyx anẽ. Ja pyrà nẽ na pre Tĩrtũm mẽ pamã kapẽr tũmta jarẽnh o:
—E kêr ka mẽ axte ixkapẽr tũm mar kêt nẽ. Pãnhã ixkapẽr nyw pix mãn mar o apa nẽ ãm kôt pix mã mãn amnhĩ nhĩpêx rãhã ho ri apa. Anẽ.