Katagarda ka Daniyan
1
Tsumani tsu Daniyan n a̱ja̱'a̱ a̱ ni
1 A̱ ka̱ya̱ ka tatsu ko tsugono tsu Johoyakim mogono ma Yahuda, ɗa Nebukaneza mogono ma Babila u ta̱wa̱i n aza o kuvon a̱ ni a Urishelima ɗa u kambuki likuci.
2 Ɗa Vuzavaguɗu nekei Johoyakim mogono ma Yahuda u Nebukanezaru ɗa u lya'i ni utsura, ali ɗa u ɗikai ucanuku u na a ci ya'anka ulinga wa̱ A̱'isa̱ a̱ Ka̱shile. Ana mogono ma mo bonoi a Babila n ucanuku wa, ɗa u zuwai u ɗa a̱ a̱'isa̱ a̱ ni, a̱ ubuta̱ u na u tsu zuwa ucanuku u singai u ka̱ma̱li ka̱ ni.
3 Ɗa mogono Nebukanezaru u zuwai Afishenazu kabara ka gbayin ka̱ ni ka̱ tuka̱ yi n olobo o yoku a Isaraila, aza a na a̱ uta̱i a kpa'a ku tsugono n i'uwa ya aza a gbagba'in,
4 olobo a na ikyamba i le yi babu muna, aza a na a̱ gusa̱i ikyamba ba. A ya'an kpamu n tsuloboi, n kuyeve ka̱u, n ugboji, ka̱ta̱ a fuɗa kuya'an ulinga e kefeku ko mogono. Afishenazu a̱yi ɗa u kuyotsongu le kelentsu n iɗani ya aza a Babila.
5 I ta̱ kpamu a kulya'a ilikulya n ili i kuso'o a̱ ka̱tsuma̱ ki ili i na mogono ma zuwakai le a kanna dem i kpa'a ku mogono. U danai o kuyotsongusu ta̱ olobo a ali a̱ya̱ a tatsu, ka̱ta̱ e yeve a̱ ka̱na̱ kuya'anka mogono ulinga.
6 A̱ ka̱tsuma̱ ka aza a̱ na̱shi a na a zagbai va, ele ɗa Daniyan, n Hananiyan, m Mashiyelyu, n Azariya. Gbende vi le aza a umaci a Yahuda a ɗa.
7 Kagbashi ka gbayin ko mogono ka Nebukanezaru ka saba'a le ta̱ ula, u ne'i le ula a aza a Babila a nampa:
Daniyan u ɗekei ni Belshaza.
Hananiyan u ɗekei ni Shedaraku. Mashiyelyu u ɗekei ni Mesheku. Azariya u ɗekei ni Abenego.
8 Ama Daniyan u sheshei n ka̱ɗu ka̱ ni u ku'uka ka̱ci ka̱ ni nshinda̱ a̱ ubuta̱ u kulya'a ilikulya n ili i kuso'o i mogono ya ba. Ɗa u folonoi kagbashi ko mogono ka u ka̱sukpa̱ yi, adama a na ka̱ta̱ u uka ka̱ci ka̱ ni nshinda̱ ma ba.
9 Gogo na Ka̱shile ka zuwa ta̱ kagbashi ko mogono ka nanlo u yotsongu ucigi n wishi a kubana u Daniyan,
10 ama ɗa kagbashi ka ka danai Daniyan, <<Mi ta̱ a kupana wovon u vuzagbayin vu va̱ mogono, vuza na u zuwakai nu ilikulya n i kuso'o adama a̱ nu. Nini ɗai u kene ikyamba i nu i na̱mgba̱ i la'a aza a̱ nu a na a matsai a ayin e te? Mogono mi ta̱ a kufuɗa kuna mu adama a̱ nu.>>
11 Ɗa Daniyan u danai kindi ka na kagbashi ko mogono ka zuwai ulinga u kinda yi, n Hananiyan, m Mashiyelyu, n Azariya,
12 <<Mi ta̱ o kufolono wu kondo tsu ali ayin kupa, ka̱ta̱ i neke tsu ili i yoku ba, sai a̱vuku a kulya'a m mini mo kuso'o koci.
13 A ukocishi u ayin kupa a nanlo vi gisanku tsu na ci n olobo a na a buwai va a na i a kulya'a ilikulya i mogono ya. Ka̱ta̱ vi sheshe n ka̱ci ka̱ nu ili i na ve enei n tsu na va kuya'an n a̱ tsu.>>
14 Wu ushuki ɗa u kondoi le ali ayin kupa.
15 Ana ayin kupa a a yawai, ɗa Daniyan n a̱ja̱'a̱ a̱ ni a la'i ele vu na i a kulya'asa ilikulya i mogono ya m ma̱ta̱na̱ n ucuwi wi ikyamba.
16 Ɗaɗa kindi ke le ka ka takpai ilikulya n i kuso'o i na mogono mi ishi ma zagbakai le va ɗa u nekei le a̱vuku a kutakuma koci.
17 Olobo a̱ na̱shi a nampa a Ka̱shile ke neke le ta̱ ugboji n kuyeve ku mekecu dem. Ɗa Daniyan ta na u ciya̱i kuyeve ku kindana n alatani kakau.
18 A kubana uteku wa̱ a̱ya̱ a tatsu a na mogono ma zuwai, ɗa kagbashi ka gbayin ka ka bankai le ra̱ka̱ a̱ ubuta̱ u Nebukanezaru.
19 Ɗa mogono ma ya'ankai le kadanshi ra̱ka̱ vi le. U panai uyo'o u Daniyan n Hananiyan m Mashiyelyu n Azariya, a la'i aza a na a buwai. Ɗa a zagbai le o okpo aza a na a kuya'an ulinga e kefeku ko mogono.
20 A̱ ka̱tsuma̱ ka kakuna ku ugboji n kuyeve ka na mogono me ecei le dem, ɗa u cinai le n kuyeve ku na ku la'i ko oboci, n aza a imoɗi a uɓon u na wi a kulya'a tsugono dem.
21 Ɗaɗa Daniyan u lya'i kelime n ida̱shi ɗe e kefeku ko mogono ali sai a̱ ka̱ya̱ ka iyain ko mogono Sairusu.