Katagarda ke Ezira
Kuɓa̱yuwa̱
A̱ ciya̱ kuyeve ku vuza na u ɗanai katagarda ka nampa ba. I ta̱ e kusheshe a ɗana ta̱ katagarda ke Ezira ka a̱ a̱ya̱ amangatawa̱na̱shi n amangere (440) kafu a matsa Yesu. Arabali a katagarda ka nampa ka lya'a ta̱ kelime a̱ ubuta̱ u na katagarda ka Arabali ka shamgbai.
Kukiye ku Ka̱shile ki ta̱ punu a̱ ka̱tsuma̱ ki ili i na i gita̱i a katagarda ka. Ka̱shile ka ya'an ta̱ ili i nanlo adama a na u shatangu kadanshi ka na u ya'ain a̱ una̱ u keneki Irimiya.
Na ɗa ili ya i gita̱i punu:
1 Ka̱tsura̱ ka̱ ugiti ka aza a Yahuda a na i a iɗika i tsugbashi ɗa uta̱i a Babila tsu na Sayiru mogono ma Pashiya ma dansai.
2 O doku a ma'asakai A̱'isa̱ a gbayin ɗa erengi a ɗa, ɗa kpamu a cikpai Ka̱shile punu a Urushelima.
3 Ana a̱ya̱ o yoku a lazai, ka̱tsura̱ ka aza a Yahuda o yoku o bonoi a Urushelima o tsugono tsu Ezira.
Ezira kaɗani ka'a keyevi ka̱ wila̱ u Musa. A̱yi ɗa u ɓa̱nka̱i uma a lapulasaka kuyongo ku le ku anana n makpa, adama a na o tono wila̱ u le, ɗaɗa uzuwakpani n Ka̱shile n kuyongo ku ni n uma a̱ ni aza a Isaraila.
Ili i na yi punu
Uboni wu ugiti a ugbashi 1:1--2:70
O doku a ma'asakai A̱'isa̱ a gbayin ɗa erengi a ɗa u Ka̱shile 3:1--6:22
Ezira u bonoi koɓolo n aza o yoku a iɗika yi ugbashi 7:1--10:44
1
Mogono Sayiru u danai aza a ugbashi o bono
(2 Ar 36:22-23)
1 A̱ ka̱ya̱ ka̱ ugiti ko tsugono tsu Sayiru mogono ma iɗika i Pashiya, ɗa Vuzavaguɗu u shatangi kadanshi ka na u danai a̱ una̱ u keneki Irimiya a̱ ubuta̱ u kusa'wa ka̱ɗu ko mogono Sayiru u nekei kadanshi aza a Yahuda o bono. Ɗa mogono ma zuwai a salai ukuna wa ka̱ta̱ kpamu a ɗana u ɗa a uɓon u tsugono ci ni.
2 <<Ukuna u na mogono Sayiru ma Pashiya u salai u ɗa na, Vuzavaguɗu Ka̱shile ka gaɗi, ke neke mu ta̱ tsugono tsa aduniyan ra̱ka̱, ɗa kpamu u nekei mu ulinga u kuma'aka yi kpa'a a Urishelima a iɗika i Yahuda.
3 Yayi a̱ ka̱tsuma̱ ka̱ ɗa̱ wu uta̱i a uma a̱ Ka̱shile ki Isaraila? Ya'an u bono a Urishelima vu na wi a iɗika i Yahuda, u doku u ma'asaka Kpa'a ku Vuzavaguɗu Ka̱shile ki Isaraila, Ka̱shile ka na ki a Urishelima. Ya'an Ka̱shile ka̱ ni ko yongo koɓolo n a̱yi.
4 A̱ ubuta̱ u na baci de dem vuza Yahuda u buwai, aza a na i lo ida̱shi ɗevu n a̱yi, a̱ ɓa̱nka̱ yi n azurufa n azanariya, n ucanuku n ili i kuzuwa, n kune'e ku ucigi u ka̱ɗu adama a kpa'a ku Ka̱shile ku na ki a Urishelima.>>
5 Ɗa anan ganu n aza e Levi n aza e kelime ka i'uwa i Yahuda m Bayami, aza a na Ka̱shile ka sawai a̱ɗu e le ɗa kpamu ushuki ku bono a Urishelima a ma'asaka Kpa'a ku Vuzavaguɗu ku na ki a Urishelima.
6 Aza a na i a̱ ida̱shi ɗevu n aza a Yahuda, a̱ ɓa̱nka̱i le n ucanuku u na a ya'in n azurufa n azanariya, n ucanuku u yoku n ili kuzuwa, koɓolo n ki ili i singai n kune'e ku uneki u ka̱ɗu.
7 Mogono Sayiru u tuka̱i n ucanuku u na wi u Kpa'a ku Vuzavaguɗu, u na mogono Nebukadnezaru wishi u pura̱i a Urishelima ɗa u zuwai a kpa'a ka̱ a̱ma̱li a̱ ni.
8 Ɗa Sayiru mogono ma Pashiya u nekei ucanuku wa ekiye a Mitiredatu kazuwi ku kpa'a ku mogono, ɗa u kecei u ɗa. U nekei Sheshibazaru vuza vu kelime va aza a Yahuda.
9 Na ɗa ucanuku u na Mogono Sayirus u nekei.
Asasu a gbagbain a azanariya kamangankupa n
Asasu a gbagbain a na a ya'in n azurufa, ka̱kpa̱n (1,000) nu
Nsasu ma azurufa kamanga n kuci.
10 Apara azanariya kamangankupa
N apara o yoku a azurufa, amangatawa̱na̱shi n kupa (410) n
Ucanuku u yoku ka̱kpa̱n (1,000).
11 Ucanuku wa azanariya n wa azurufa a yawa ta̱ a̱kpa̱n a tawun n amangatawa̱na̱shi (5,400). Sheshibazaru u ta̱wa̱i n ucanuku wa ra̱ka̱ u na a̱ pura̱i aza a na a bankai ugbashi a Babila ɗa o bonokoi u ɗa a Urishelima.