3
Kuma'asaka katalikalyuka
1 Ana wotoi u cindere u shamgbai, ci na ɗe aza Isaraila a̱ da̱sa̱ngu su a̱ likuci i le, ɗa o ɓolongi ra̱ka̱ a̱ ubuta̱ u te a Urushelima.
2 Ɗa Jesuwa maku ma Jozadaku n aza a̱ ni anan ganu, n Zerubabelu maku ma Shiyatiyelu koɓolo n otoku ni, a̱ gita̱i kuma'asaka katalikalyuka ka̱ Ka̱shile ki Isaraila. A ma'i katalikalyuka ka adama e kune'en ka alyuka o kusongu, tsu na ka ki uɗani a̱ wila̱ u Musa vuma vu Ka̱shile.
3 Ɗa a ma'asakai katalikalyuka ka a̱ ubuta̱ u na ka kishi, adama a na i ta̱ a kupana wovon wa aza a iɗika ya. Ɗa a ya'in kune'en ku kusongu u Vuzavaguɗu usana n kulivi,
4 ɗa kpamu a ya'in Ka̱ɗiva̱ ka̱ A̱pa̱m tsu na ka ki uɗani. Nu e nekei kune'en ku kusongu ku kanna dem tsu ka̱bunda̱i ka alyuka ka, tsu na a zuwai.
5 Ana ka nanlo ko kotsoi ɗa a lya'i kelime n kune'en alyuka o kusongu a kanna dem, n kune'en ku ka̱ɗiva̱ ko wotoi u savu, n ku ka̱ɗiva̱ ka Vuzavaguɗu ka na a zuwai kanna, n ku kune'en kakau ku ucigi u ka̱ɗu u Vuzavaguɗu ku na uma e ci neke.
6 Ili i na i ɗikai a kanna ka ugiti ko wotoi u cindere ɗa a̱ gita̱i kuneke kune'e ku kusongu u Vuzavaguɗu. Ama babu na a vara ku kuma'a ka̱ A̱'isa̱ a gbayin a Vuzavaguɗu.
A̱ gita̱i kuma'asaka A̱'isa̱ a gbayin
7 Ɗa uma e nekei ikebe adama a na a tsupa ama'i n eshe'wi. Ɗa kpamu e nekei aza a Sidon n aza a Taya ilikulya'a, n ili i kuso'o n mani'in ma zaitu, adama a na a̱ tuka̱ n nɗanga n sida a Lebano a mala a kubana a̱ ubuta̱ u na antsu a tsu shamgba a Jopa. A ya'an ta̱ ili i nanlo ra̱ka̱ tsu na Sayiru mogono ma pashiya me nekei le una̱.
8 A̱ a̱ ka̱tsuma̱ ko wotoi u ire a̱ ka̱ya̱ ka i re ana a yawai a kpa'a ku Ka̱shile a Urushelima, Zerubabelu maku ma Shiyatiyelu n Jesuwa maku ma Jozadaku koɓolo n aza ni anan ganu n aza Levi n aza na o bonoi a Urushelima a ubuta̱ u tsugbashi. Ɗa a̱ gita̱i ulinga u kuma'a ka a zuwai aza e Levi aza na a yawai a̱ya̱ kamanga a kubana gaɗi, adama a na a̱ la̱na̱ ulinga u kuma'asaka Kpa'a ku Vuzavaguɗu.
9 Jesuwa koɓolo n muku n ni olobo n aza a̱ ni, Kadimiyelu n muku mo olobo n ni, n muku n Hodaviya n muku n Henadadu aza e Levi a ɗa a̱ la̱na̱i ulinga u kuma'a ku Kpa'a ku Ka̱shile ka.
10 Ana a ma'in a a varai kuma'a ka̱ A̱'isa̱ a Vuzavaguɗu, ɗa anan ganu uta̱i a shamgbai lo nu ntogu n le u uki, yaba dem vu le uɓa̱ni n ishari. Ɗa aza e Levi a na uta̱i a kumaci ku Asafa ele feu uta̱i a shamgbai, yaba dem vu le uɓa̱ni n ugogi. Uta̱ ta̱ adama a na a cikpa Vuzavaguɗu, tsu na a zuwai ali a makyan Dawuda mogono.
11 Ɗa aza o yoku a cananai ishipa i kucikpa Vuzavaguɗu, aza o yoku a̱ ku ushuku n a danai,
<<Vuzavaguɗu vuza kasingai ɗa,
ucigi u ni u na u tsu saba'a ba ko wannai
wa aza a Isaraila.>>
Ɗa uma ra̱ka̱ a̱ ɗa̱ngusa̱i a̱la̱ka̱tsu n utsura a cikpai Vuzavaguɗu Adama a na a vara ta̱ kuma'a ku Kpa'a ku Vuzavaguɗu.
12 Ama a̱ ka̱tsuma̱ ka nkoshi m gba̱ra̱-gba̱ra̱, n anan ganu n aza e Levi n aza e kelime ka i'uwa a na enei Kpa'a ku Ka̱shile ku ugiti, ɗa o ɓosoi ka̱da̱wuri ana enei kumi'i ku kpa'a ka. Aza o yoku tankpamu a̱ ɗa̱ngusa̱i a̱la̱ka̱tsu adama a̱ ma̱za̱nga̱.
13 Ali vuza u kufuɗa kuyeve a̱la̱ka̱tsu a̱ ma̱za̱nga̱ n a̱ ma̱shi ba, adama a na uma a̱ ɗa̱ngusa̱ ta̱ a̱la̱ka̱tsu n utsura ka̱u ali uma a na i da'in a panai.