19
Aza a Isaraila a Kusan ku Sinai
1 A wotoi u tatsu ana aza a Isaraila a̱ ka̱sukpa̱i Masar, a kanna ka nanlo ɗa a yawai e meremune ma Sinai.
2 Ayin a na a̱ ka̱sukpa̱i Refidim, ɗa a yawai e meremune ma Sinai ɗa a vaki lo ɗevu n kusan.
3 Ɗa Musa u kumbai ɗe adama a na u cina Ka̱shile Vuzavaguɗu, ɗa Vuzavaguɗu u ɗekushei ni punu a kusan ka, ɗa u danai ni, <<Ili i na va kubana va dana ntsukaya n Yakubu i ɗaɗa na, koɓolo n ili i na va kudana aza a Isaraila:
4 <Avu a̱ ka̱ci ka̱ nu ve ene ta̱ ili i na n ya'ankai aza a Masar. Uteku u na kajimba ka ci ɗika muku n ni e evelyu a̱ ni, ta feu n ɗikai ɗa̱ nannai ɗa n tuka̱i ɗa̱ na wa̱ va̱.
5 Gogo na yu ushuku baci kupanaka mu ka̱ta̱ kpamu i tono uzuwakpani u va̱, yi ta̱ o kokpo uma a̱ va̱ a na a la'i n kusuɓa̱ a̱ ka̱tsuma̱ ka aduniyan ra̱ka̱, n nannai dem aduniyan gbende a̱ va̱ a ɗa.
6 Yi ta̱ o kokpo tsugono tsu anan ganu tsu va̱, n iɗika i ciɗa i va̱.> Na ɗaɗa akaka a na va kudana aza a Isaraila.>>
7 Ana Musa u cipa̱i a kusan ka, ɗa u bonoi u ɗekei nkoshi m gba̱ra̱-gba̱ra̱, ɗa u tonokoi le ra̱ka̱ ili i na Vuzavaguɗu u danai ni.
8 Ɗa uma a gbende a̱ ushuki, a danai, <<Ci ta̱ a kuya'an ili dem i na Vuzavaguɗu u danai.>> Ɗa Musa u bonokoi Vuzavaguɗu ili i na uma a a danai.
9 Ɗa Vuzavaguɗu u danai Musa, <<Mi ta̱ a̱ kucipa̱ wa̱ nu tsu keleshu ku uguyi ka̱ a̱miki, ka̱ta̱ uma a panaka mu a kadanshi n avu, ciya̱ a̱ ushuku n avu.>> Ɗa Musa u doku u danai Vuzavaguɗu kpamu ili i na uma a danai.
10 Ɗa Vuzavaguɗu u danai Musa, <<Bana a̱ ubuta̱ u uma a̱ nu ka̱ta̱ vu takpa le nshinda̱ dem anana nu mkpa'a. Vu zuwa le a̱ za̱'a̱ aminya e le,
11 ka̱ta̱ o foɓuso a kanna ka tatsu, adama a na a kanna ka nanlo ka'a Vuzavaguɗu u kucipa̱ gaɗi vu Kusan ku Sinai a̱ a̱shi a uma.
12 Vu zuwaka le uteku n kusan ku nanlo ka vu ka̱ra̱'a̱ka̱, ka̱ta̱ vu dana le, <Ya'in mayin ka̱ta̱ i yawa ɗevu ko i sa'wa kusan ka ba. Vuza na u banai u sa'wai, i ta̱ a kuna yi.
13 Mayun vuma vu nanlo i ta̱ a kuvara yi n atali ko a tawa yi n aya, ka̱ta̱ a sa'wa yi n kukiye ba. Ko vuma ɗa baci ko manama a̱ kuka̱sukpa̱ yi n wuma ba.> I ta̱ a kufuɗa kubana a kusan ka a ayin a na baci a panai a̱ lika̱i kavana ka̱ ka̱giri.>>
14 Ana Musa u cipa̱i a kusan ka ɗa u takpai yaba dem nshinda̱, ɗa a̱ za̱'i aminya e le.
15 U danai le, <<Foɓusoi ka̱ci ka̱ ɗa̱ adama a kanna ka tatsu, ka̱ta̱ kpamu i vaku n a̱ma̱ci a̱ ɗa̱ ba.>>
16 N usana a kanna ka tatsu, ɗa akpanga nu mkpayayan n ulaɗi a̱ cipa̱i lo. Ɗa keleshu ka̱ a̱miki ka̱ kimba̱i gaɗi vu kusan va. Ɗa uma a panai ciliki tsu kavana n kaca'a ka̱u. Ana uma ra̱ka̱ a panai ili i nanlo dem, ɗa e je'ekei ikyamba.
17 Ɗa Musa wu uta̱ka̱i le a̱ a̱pa̱m e le, adama a na a gasa n Ka̱shile, ɗa a shamgbai lo ɗaka vu kusan va.
18 Ɗa ka̱nga̱ ka palai Kusan ku Sinai adama a na Vuzavaguɗu u cipa̱ ta̱ lo uteku tsa akina. Ka̱nga̱ kpamu adanshi i ta̱ o kusongu kuma'a ɗa ka̱ ɗa̱nga̱i gaɗi. Ɗa kusan ka ku gba̱ɗa̱i.
19 Ɗa izumgbi i ciliki i kavana i doki ka̱u. Ɗa Musa u ya'in kadanshi, ɗa Ka̱shile ku ushuki ni an kakpanga.
20 Ɗa Vuzavaguɗu u cipa̱i a Kusan ku Sinai, ɗa u ɗekei Musa u kumba a gaɗi vu Kusan va. Ɗa Musa u kumbai kusan ka.
21 Ɗa Vuzavaguɗu u danai ni, <<Cipa̱ vu bana vu ɓarangu uma a mayin ka̱ta̱ a pasa uteku wa adama a na a dana ya'an e ene mu ba, a ya'an baci nannai uma n a̱bunda̱i i ta̱ a̱ kukuwa̱.
22 Ko anan ganu a na a kiwanai kuyawasa ɗevu n Vuzavaguɗu u ga'an ta̱ takpaka bi'i ka̱ci ke le nshinda̱, ko Vuzavaguɗu u ya'an wupa n ele ka̱ta̱ wu una le.>>
23 Ɗa Musa wu ushuki Vuzavaguɗu, <<Ko vuza u kukumba a Kusan ku Sinai ka ba, adama a na vu ɓarangu tsu ta̱ ɗe, vu danai <I zuwa uteku i ka̱ra̱ka̱ Kusan ka ka̱ta̱ i la̱na̱ ku ɗa ciya̱ ku ya'an ciɗa.> >>
24 Ɗa Vuzavaguɗu u danai Musa, <<Cipa̱ vu bana vu ta̱wa̱ n Haruna na u shamgba n avu. Ama anan ganu n aza a na a buwai ka̱ta̱ a dana i ta̱ a kuciga kupasa uteku wa adama a na a̱ ta̱wa̱ na ba, ta baci nannai ba mi ta̱ a kuya'an wupa ka̱ta̱ mu una le.>>
25 Ɗaɗa Musa u cipa̱i, ɗa u danai uma ili i na Vuzavaguɗu u danai.