1 <<Ɗeke vuza nu Haruna m muku molobo n ni, Nadabu n Abihu n Eliyaza n Itama. Vu zagbaka mu ele, ka̱ta̱ vu uta̱ka̱ le a̱ ka̱tsuma̱ ka̱ muku mi Isaraila, adama a na o okpo anan ganu aza na a kuya'anka mu ulinga. 2 Ka̱ta̱ vu jilya̱ka̱ mokoshi ma̱ nu Haruna ntogu n singai n tsugbayin, n na n kuyotsongu uzagbi u ni. 3 Ya'an kadanshi n eyevi dem aza a na n nekei kuyeve a̱ ubuta̱ u kujilya̱, a ya'anka Haruna motogu adama a kavasa ke kerengu, adama a na wo okpo ganu vu na u kuya'anka mu ulinga. 4 Na va ɗaɗa ntogu n na a̱ kujilya̱ka̱ yi, ma na mi n mabanbata n efodu, n eleje, m motogu ma gbayin mu ugaɗi m motogu ma gbati mi igani ma na a ca'i n ekiye, m ma̱ku'un ma tsuganu n kashiyatsu. A̱ jilya̱ka̱ mokoshi ma̱ nu Haruna ntogu n kavasa ke kerengu ka nampa, m muku n ni adama a na a ya'anka mu ulinga u tsuganu. 5 Aza na a̱ kujilya̱ ntogu ma a ya'an ulinga n tsugbere tsu na a ci ya'anka kuca'a tsa azanariya tsu na ci an mini mu usuni, n tsu na ci yotsoi mini ma garula n tsu mini ma̱ ma̱ɗiya̱, n arikinla a singai.

6 <<Ka̱ta̱ a̱ jilya̱ efodu* va n tsugbere tsu kuca'a tsa azanariya, tsu na ci an mini mu usuni n tsu na ci yotsoi an mini ma̱ ma̱ɗiya̱ m mini ma garula n arikinla a singai, ulinga u ka̱jili ku usuɓi. 7 Ma ya'an n eleje a avangatsu e re ugasatangbani wu ngo'o n re adama a kushiya. 8 Ogoni a na a ya'ankai kaɗambura ku uca'i ko tsuzogu ka, ko yotso kujilya̱ ku motogu ku efodu ka, ka̱ta̱ ka ya'an umatyangbani ɗe n efodu va, tsa a azanariya, m mini mu usuni, n tsu mini ma garula, koɓolo n arikinla a singai. 9 Vu ɗika atali o onis e re, ka̱ta̱ vu ka̱ra̱ ɗe ula a̱ muku mi Isaraila, 10 vu ka̱ra̱ ula a̱ ta̱li e le ɗe a katali ke te m motonosonoi tsu na a matsai le, ula a̱ ta̱li a na a buwai ka̱ra̱ le feu a katali ka na ka buwai. 11 Vu ka̱ra̱ ɗe ula a̱ muku mi Isaraila a atali e re a, tsu na keshe'wi ka tsu ɗana a̱ ka̱ta̱mba̱ri. Vi ta̱ a kuzuwa katali dem ka na a ya'in n tsuzogu tsa azanariya a̱ kuka̱ra̱'a̱. 12 Ka̱ta̱ a shiya a ɗa a avangatsu a efodu a adama a na o okpo atali a kuciɓasa a̱ muku mi Isaraila. Haruna wi ta̱ a kuɗika ula a nampa a avangatsu a̱ ni ka̱ta̱ mpa Vuzavaguɗu n ciɓa ayin a na baci u banai e kelime ka̱ va̱. 13 Vi ta̱ a kuzuwa katali dem ka na a ya'in n tsuzogu tsa azanariya a̱ kuka̱ra̱'a̱ 14 n ikani ya azanariya i re, uɓishi an kawin ka̱ta̱ vu ɓolongu le punu m muntsa mu utsutsu ka.

15 <<Vi ya'an mabambata ma afada, ulinga u keyevi n tso ogoni e efodu, ka̱ta̱ vu ya'an ma'a n azanariya, tsu mini mu usuni, m mini ma̱ ma̱ɗiya̱ n arikinla a na a ya'in n tsugbere. 16 Kakashi ka na a ku ca'a va, akambu a i ta̱ a kuya'an derere n aza na a buwai, wanshi udyawi kuci ka̱ta̱ vu ka̱ta̱la̱ ka'a kure. 17 Ka̱ta̱ vu dara ɗe atali a singai a singai akariki a̱ na̱shi. A kakariki ka iyain vu dara ɗe, karneliyan, n tofa, n zumurudu, 18 a kakariki ke ire a dara ɗe kirisola, n safaya n daimon, 19 a kakariki ka tatsu ɗa a dara ɗe Jesinta, n agata, n amati, 20 a kakariki ka na̱shi ɗa a dara ɗe, berila, n onika, n yasfa. Katali dem ka̱ta̱ a zuwa ka'a punu a̱ ka̱ga̱'in ku utsutsu u kenu u na a ya'in a azanariya a. 21 I ta̱ a kuzama atali kupa n e re, ka̱ta̱ a ka̱ra̱ ɗe ula a umaci a̱ muku mi Isaraila a katali ke te ke te dem. Ula a nampa i ta̱ o kokpo urotu. 22 Ka̱ta̱ vi ya'anka mabambata ma ikani yu uca'i i tsu tsuzogu tsa awin, a na a ya'in n azanariya koci. 23 Vi ya'an nkawani n re ma azanariya n na o kukoɓo ɗe a̱ iga̱'in e re a mabambata ma. 24 Ka̱ta̱ vu shiya ɗe awin e re a azanariya a ɗe a nkawani n re m mabambata ma. 25 Ugasatangbani u re wu uteku wi ikani u re wa, vi shiya u ɗa ɗe a̱ ubuta̱ u re wa, ka̱ta̱ vu koɓo le n tsu kelime a̱ ubuta̱ u te n efodu va. 26 Ka̱ta̱ vi ya'an nkawani n re ma azanariya, ka̱ta̱ vu koɓo ɗe n ɗa ɗe uteku u re u mabanbata ma, n asuvu a ukoci ɗevu n efodu va. 27 Vi ya'an nkawani n re ma azanariya ka̱ta̱ vu koɓo le n kelime ka efodu va, a uɓon u ɗaka wa avangatsu, derere a ubuta̱ u na nroki n kaɗambura ko tsuzogu ka efodu ka ki. 28 Ka̱ta̱ i shiya ɗe mabanbata nu nkawani n ni ɗe a nkawani n efodu koɓolo n awin a̱ mini mu usuni, adama a na wo okpo ulinga u keyevi ka kuca'a ka awin ke efodu, adama a na ka̱ta̱ mabambata ma ma̱ ta̱wa̱ ma̱ ba̱ɗa̱ a efodu va ba. 29 Ayin a na baci Haruna wi a ku'uwa a̱ ubuta̱ u na u la'i n ciɗa, ka̱ta̱ Vuzavaguɗu u ciɓa n ula a̱ muku mi Isaraila a̱ ka̱ɗu ka̱ ni. Adama a na wo okpo ili i kuciɓasa ko wanai. 30 Ka̱ta̱ vu zuwa punu feu Yurim n Tumi † punu a mabanbata, adama a na o yongo punu a̱ ka̱ɗu ka Haruna a ayin a na baci u banai e kelime ka Vuzavaguɗu. Nannai ɗa Haruna u kuyongo n ili i na i kusheshe ukuna u na Vuzavaguɗu u cigai a̱ kuka̱ra̱ka̱ punu a̱ ka̱ɗu ka̱ ni, a ayin a na baci de dem wi e kelime ka Vuzavaguɗu.

31 <<Ka̱ta̱ vi ya'an motogu mu ca'i mu ugaɗi ma efodu ma, m mini mu usuni ra̱ka̱. 32 Ka̱ta̱ a ya'an kuɗeku ku motogu ka, uca'i u ni u ya'an ka̱gba̱ta̱ra̱, ta lo wa̱ ta̱wa̱ wa kara. 33 Ɗe a̱ iga̱'in o motogu ma, n tsu ɗaka, vi cindala ɗe tsuzogu tsu umaci u maɗanga ma na a tsu ɗeke ruman, n tsu mini mu usuni, n tsu ma̱ɗiya̱, n tsu mini ma garula, n tsugbere tsu uca'i n tsuzogu tsu singai. 34 E gere ɗe alingi n umaci u ruman o motonosonoi a̱ kuka̱ra̱'a̱ ugupi u motogu wa. 35 Ka̱ta̱ Haruna u uka motogu ma nampa ma ayin a na baci wi a kuya'an ulinga e kelime ka Vuzavaguɗu. Ka̱ta̱ a pana ma̱shi ma alingi ma a ayin a na baci wi a ku'uwa, n ayin a na baci wi a̱ kuta̱ a̱ ubuta̱ u ciɗa e kelime ka Vuzavaguɗu ta lo wa̱ kuwa̱.

36 <<Vi ya'an maganda ma kaci n azanariya koci, ka̱ta̱ vu ka̱ra̱ ɗe iɗani i nampa, uteku tsu uzuwi u kukiye u ka̱ta̱mba̱ri tsu nampa, <ILI I CIƊA U VUZAVAGUƊU.> 37 Ka̱ta̱mba̱ri ka azanariya ka, a shiya ka'a n kawin ka na ki tsu mini mu usuni a gaɗi vo oroli a. 38 Ta ta na nannai Haruna u kapa baci oroli a, ta ɗe e kene iɗani ya a̱ kuca̱'a̱n ku ni. Ta kpamu nannai u kuɗika a̱miki a̱ unushi u uma a Isaraila ayin a na i e kuneke kune'e ku le ku ciɗa. Ta ɗe iɗani i kuyongoso ɗe a̱ kuca̱'a̱n ku Haruna adama a na Vuzavaguɗu u ciya̱ wi isa kune'e ku le.

39 <<Vi ya'an motogu me kenu ma, n arikinla a singai, ka̱ta̱ vi ya'an kpamu oroli n arikinla a singai feu, ka̱ta̱ vi ya'an kaɗambura ko tsuzogu tsu uca'i we ekiye.

40 <<Yi ta̱ a kuya'anka muku n Haruna ntogu n kenke'en, n ashiyatsu, nu nkunku'un, nu ntogu n na n kuneke le tsugbayin n tsuloboi. 41 Vu uka Haruna m muku n ni ucanuku u nampa wa, ka̱ta̱ vu sukumaka le mani'in vu zuwa le o okpo ciɗa ka̱ta̱ vu erengu le ciya̱ a ya'anka mu ulinga u tsuganu. 42 Vi ya'anka le acaka a gbati-gbati n arikinla a na a kuyawa a̱ka̱nga̱tsu a̱ ciya̱ a ya'anka ciyampa. 43 Haruna m muku n ni a uka ucanuku wa a ayin a na baci i a ku'uwa a̱ Ma̱va̱li mo Oɓolo ko a ayin a na i a kuyawa ɗevu n katalikalyuka adama a na a ya'an ulinga a̱ ubuta̱ u Ciɗa, ta lo o ronoko ka̱ci ke le unushi u na u kutuka̱ le n ukpa'a̱. Na lo va wi ta̱ o kokpo wila̱ u ko wanai u Haruna nu ntsukaya n na n kuta̱wa̱ ka̱ca̱pa̱ ka̱ ni.