30
Katalikalyuka ko kusonku ili i ma̱gula̱ni
1 <<Vi ya'an katalikalyuka ka na o kusonku ili i ma̱gula̱ni m maɗanga me megele.
2 Ugaɗi u ni u yawa udashi u te n kagimi, wanshi u ni kpamu udashi u te n kagimi, ugaɗi u ni n wanshi u ni u ya'an derere. Uɗa̱ngi u ni u yawa ubapi u tatsu. Ngon n na̱shi n katalikalyuka ka ka̱ta̱ vi ya'an ɗe avana umatyangbani punu.
3 Ka̱ta̱ vu paɗara gaɗi n akambu dem n avana n azanariya koci, ka̱ta̱ vu lapula ka̱ga̱'in ku una̱ u ni n azanariya a̱ ku ka̱ra̱'a̱ka̱.
4 Ka̱ta̱ vi ya'an nkawani n re ma azanariya adama a katalikalyuka ɗaka va̱ ka̱ga̱'in, akambu e re dem a na a̱ ka̱na̱i nshikpu n na a ci ɗikaka katalikalyuka ka.
5 I ya'an ashamkpatsu a nu nɗanga m megele ka̱ta̱ i paɗara a ɗa n azanariya.
6 Ka̱ta̱ vu zuwa katalikalyuka ko kusonku ili i ma̱gula̱ni e kelime ka kakashi ka na ka kpadai akpati vu wila̱ va, ɗevu n ka̱kuyenkpa̱tsu ka kutsupa unushi ubuta̱ u na n kugasa n a̱ɗa̱.
7 Usana lakam Haruna u uwa baci adama a na u lapulasaka nkuni ma, wi ta̱ o kusongu ili ma̱gula̱ni a katalikalyuka ka.
8 N kulivi dem ayin a na wi a kutasuku nkuni ma ka̱ta̱ u songu ili i ma̱gula̱ni ya kpamu. Na va wi ta̱ o kokpo ili ma̱gula̱ni i na yo kuyongo a̱ kukula̱ ayin dem a kubana a̱ ubuta̱ u Vuzavaguɗu ali a kubana n tsukaya n na n kuta̱wa̱.
9 Ka̱ta̱ vi ya'an kune'e ki ili i ma̱gula̱ni i gbani-gbani ba, ko alyuka o kusongu ko alyuka a ili i kashina ko ta na alyuka a ili i kuso'o ba.
10 Ku te a̱ ka̱ya̱ dem Haruna u bonoko katalikalyuka ciɗa nu mpasa n na u kutsungu punu a avana a̱ na̱shi a. Vi ta̱ a kuya'an ili i nampa ya nu mpasa mo obomburom n na a ya'ankai alyuka a kucinukpaka unushi, i ya'ansa ili i nampa ya ali a kubana ntsukaya n ɗa̱, na va ɗaɗa katalikalyuka ka ciɗa a̱ ubuta̱ u Vuzavaguɗu.>>
Ikebe i katsupu ku unushi
11 Ɗaɗa Vuzavaguɗu u danai Musa,
12 Ayin a na baci vi e kukece uma a Isaraila, vuza na baci e kecei dem wi ta̱ a kutsupa katsupu ku unushi a̱ ubuta̱ u Vuzavaguɗu adama a wuma u ni. Nannai babu ma̱dukpa̱ ma na ma̱ kuta̱wa̱ we le a ayin a na baci a̱ ciya̱i ukeci.
13 Yaba dem vuna e kecei e mekecu wi ta̱ a̱ kutsupa ili nampa, kagimi ka kagisamkpatsu ka azurufa, ka̱ta̱ a̱ kunzuku m mokoko'o ma na mi a̱ ubuta̱ u ciɗa ma na a̱miki a̱ ni a yawai kamanga. Yaba dem wi ta̱ a̱ kutuka̱ n kune'e ku nampa a̱ ubuta̱ u Vuzavaguɗu.
14 Vuza na baci de e kecei e meketsu, ɗa u yawai a̱ya̱ kamanga a kubana gaɗi, wi ta̱ a kuya'anka Vuzavaguɗu kune'e.
15 I baci a kuya'an kune'e ku nampa, vuza vu uciyi u tsupa u pasatangu tsu na a gisanki ba, vuza vu unambi feu u tsupa u gusa̱ tsu na a gisanki va ba.
16 Vi isa ikebe i katsupu ka adama a̱ unushi u nanlo a̱ ubuta̱ wa aza a Isaraila, adama a na i ɗa va kuya'anka ulinga u kulapula Ma̱va̱li mo Oɓolo. Wo okpo ili na Vuzavaguɗu u kuciɓasa n aza a Isaraila, adama na u bonoko wuma u ɗa̱ ciɗa.
Kasasu adama a̱ kuza̱'a̱
17 Ɗa Vuzavaguɗu u danai Musa,
18 <<Vi ya'an kasasu ki iyum i shili n kashamkpatsu ka̱ ni feu n iyum i shili adama a̱ kuza̱'a̱. Vu zuwa ka'a e mere ma̱ Ma̱va̱li mo Oɓolo n katalikalyuka, ka̱ta̱ vu tsungu punu mini.
19 Haruna m muku n ni ta lo a kusa'a ekiye n ene e le.
20 Kafu a uwa a̱ Ma̱va̱li mo Oɓolo sai a sa'asa bi'i ka̱ci ke le m mini ta lo a̱ kuwa̱. Ko kpamu kafu a yawa ɗevu n katalikalyuka ka adama a na a ya'an alyuka o kusongu u Vuzavaguɗu.
21 Ka̱ta̱ a sa'a ekiye n ene e le, ta lo a̱ kukuwa̱. Na va ɗaɗa wila̱ u ayin dem a̱ kugita̱ u Haruna ali a̱ kuta̱wa̱ ntsukaya n na n kuta̱wa̱.>>
Mani'in me kerengu
22 Ɗa Vuzavaguɗu u danai Musa,
23 <<La̱nsa̱ ili i wali i nampa, kilo vu ta̱li vi mini ma̱ mur, kilo vu tatsu vu sinamon vu ma̱gula̱ni, n kilo vu tatsu vu mita̱ ma̱ ma̱gula̱ni,
24 n kilo vu ta̱li vu kasiya vu ma̱gula̱ni, n ka̱kunzukpa̱tsu ka azurufa ka na i a kuya'anka ulinga a̱ ubuta̱ u ma̱va̱li, koɓolo n edele a̱ na̱shi a mani'in ma zaitu.
25 Vi ya'an ili i nampa ya yo okpo mani'in me kerengu ciɗa, usatari n ili i ma̱gula̱ni.
26 M mani'in ma nampa ma ɗaɗa va̱ kutsunku Ma̱va̱li ma, n akpati vu wila̱ va.
27 Kirukpa ka n ucanuku wu ulinga u ni, n kashamkpatsu ka̱ ma̱kuni ka n ikoɓomgushi i ni, n katalikalyuka ko kusongu mani'in ma̱ ma̱gula̱ni,
28 katalikalyuka ko kusongu alyuka n ucanuku wu ulinga u ni ra̱ka̱, n kasasu n kashamkpatsu ka̱ ni.
29 Ka̱ta̱ vi erengu le adama a na o okpo aza a na a la'i n ciɗa, adama a na ili i na baci i sa'wa le dem yi ta̱ o kokpo ciɗa.
30 <<Vu putalaka Haruna m muku n ni mani'in me kerengu, ka̱ta̱ vi erengu le o okpo aza a an a kuya'anka mu ulinga u tsuganu.
31 Vu dana muku mi Isaraila ili i nampa ya, <Na va ɗaɗa mani'in me kerengu ma ciɗa, a̱ kugita̱ anana ali a kubana ntsukaya n ɗa̱.
32 Ka̱ta̱ a̱ tsunku ikyamba i vuma gbani ba, ka̱ta̱ kpamu vuza u ya'an mani'in mo yoku tsu nanlo ba. Adama na mani'in ma ciɗa ma'a, ka̱ta̱ yi indana i ɗa ci ili i ciɗa.
33 Vuza na baci u ya'in mani'in tsu nanlo ko a̱ tsunki vuza na wi ganu ba, i ta̱ a kutakpa yi a̱ ubuta̱ u uma.> >>
34 Ɗaɗa Vuzavaguɗu u danai Musa, <<Ɗika ili i wali i ma̱gula̱ni, cirupa̱, n onika, n galbanum, ka̱ta̱ vu satara n ili i wali i ma̱gula̱ni ya koɓolo n ili ma̱gula̱ni i aluban, vu kunzuku ma'a derere,
35 n ili i nanlo i ɗa va kuya'anka ili ma̱gula̱ni ya, tsu na vuza na u ci ya'an ili i ma̱gula̱ni u ci ya'an, ka̱ta̱ u bula̱ngu punu mkpaɗi. Ka̱ta̱ yo okpo ili ma̱gula̱ni i ciɗa i na a pishai.
36 Vu kenuku punu kenu ka̱ta̱ vu soyo luɓa̱-luɓa̱, vu vishanku akpati vu uzuwakpani vu na vi punu a̱ Ma̱va̱li mo Oɓolo ma na mi a̱ ubuta̱ u na n kugasa n avu. Ili i ma̱gula̱ni i nampa ya yi ta̱ o kokpo ili na i la'i n ciɗa wa̱ ɗa̱.
37 Ka̱ta̱ i ya'anka ka̱ci ka̱ ɗa̱ ili i ma̱gula̱ni tsu nanlo ba, ili i ma̱gula̱ni i nampa ili i ciɗa i ɗa a kubana a̱ ubuta̱ u Vuzavaguɗu.
38 Vuza na baci u ya'ankai ma'a ulinga tsu mani'in ma̱ kusukuya̱, i ta̱ a kutakpa yi a̱ ka̱tsuma̱ ka uma.>>