1 Ɗa Musa u ɓolongi aza a Isaraila ɗa u danai, ili i na Vuzavaguɗu u danai ɗa̱ i ya'an i ɗa na. 2 Ayin a̱ ta̱li a ɗa i kuya'an ulinga, ama a kanna ke cindere kanna ka kuvuka ka'a adama Ashibi, kana ka ciɗa ka Vuzavaguɗu ka'a. Vuza na baci de dem u ya'in ulinga a kanna ka nanlo i ta̱ a kuna yi. 3 Ka̱ta̱ i tasuku akina a i'uwa i ɗa̱ a kanna ka Ashibi ba.

4 Ɗa Musa u danai aza a Isaraila dem, <<I na Vuzavaguɗu u danai i ɗa na. 5 Banka Vuzavaguɗu kune'e ku ciɗa, yaba dem vu na wi n ka̱ɗu ke kune'e, ya'an u tuka̱ n kune'e ku nampa u Vuzavaguɗu, azanariya, n azurufa, n iyum shili. 6 N tsu mini mu usuni, n tsu na ci yotsoi mini ma garula, n tsu mini ma̱ ma̱ɗiya̱, n arikinla a singai, n cileme tsu nraɗika, 7 n ukpan wu nlala m ma̱ri u na a lapulai mayin, n ukpan u singai u singai, m maɗanga me megele, 8 m mani'in ma zaitu adama a̱ nkuni, n ucanuku u wali adama a mani'in me kerengu, m mani'in ma̱ ma̱gula̱ni, 9 n atali o onis, n atali a na a buwai a singai a singai adama a na a paɗa a ɗa a efodu m mabambata. 10 Aza a na i n kuyeve a̱ ka̱tsuma̱ ka̱ ɗa̱ a̱ ta̱wa̱, adama a na a ya'an ili i na Vuzavaguɗu u danai tsu ci ya'an, 11 Ma̱va̱li ma Kuciɓa n Ka̱shile n ka̱pa̱m n ili i na a kupalaka yi n ashiyatsu a̱ ni, m muntsa mu utsutsu ma̱ ni, n alangu, nu nshikpu, n anci e le, 12 n akpati vu uzuwakpani va n alangu a̱ ni, n ka̱kuya̱mkpa̱tsu ka kutakpaka unushi, n kakashi ku utsutsu ka na a tsu palaka akpati va, 13 kirukpa ka n alangu a̱ ni, n ucanuku wu ulinga u ni ra̱ka̱ m boroji vu ciɗa, 14 n kashamkpatsu ka na ka̱ ka̱na̱i nkuni ma adama a kutashi, n ucanuku wu ulinga u le, nu nkuni ma, m mani'in ma̱ nkuni ma adama a kutashi, 15 n katalikalyuka o kusongu ili ma̱gula̱ni n alangu a̱ ni, m mani'in me kerengu, ni ili ma̱gula̱ni, n ka kashi ku utsutsu ka̱ ma̱va̱li ma kuciɓa n Ka̱shile, 16 katalikalyuka o kusongu, m majaun mi iyum i shili, n alangu a̱ ni, n ucanuku wu ulinga u le, n kakpanu ki iyum i shili n kanci ka̱ ni, 17 n kakashi ka nshilya ku ulanga u ma̱va̱li wa, nu nshikpu n anci e le, n kakashi ku utsutsu u gbayin u ma̱va̱li wa, 18 aguta a̱ kushukpa̱ka̱ ma̱va̱li ma kuciɓa n Ka̱shile ma, n aguta a nshilya mu ulanga u ma̱va̱li wa n awin e le, 19 m motogu mu uca'i ma ku'uka adama a ulinga a̱ ubuta̱ u ciɗa nu ntogu n ciɗa mu ulinga u tsuganu n Haruna, nu ntogu m muku ni, adama a ulinga u tsuganu.>>

20 Ɗa uma a Isaraila ra̱ka̱ a̱ ka̱sukpa̱i ubuta̱ u na Musa va wi. 21 Aza a na a cigai kuneke, ɗa a̱ɗu e le a̱ ushuki kuneke a̱ tuka̱ n kune'e ku le u Vuzavaguɗu, adama ulinga u Ma̱va̱li mo Oɓolo, nu ulinga u na u buwai dem, nu ntogu n ciɗa n tsuganu. 22 Ɗa ali n a̱ma̱ci aza na ushuki kuneke, ɗa a̱ tuka̱i n kune'e ku le, ili ya atsuvu ya azanariya, n nkawani ma̱ a̱jivu, n ila̱nga̱, n ili i kuɗeku, n ucanuku u tsuloboi kakau, yaba dem u nekei kune'en ku kuɗa̱ngusa̱ ka azanariya ku ni u Vuzavaguɗu. 23 Vuza na baci de dem wi n tsugbere tsu mini mu usuni, n tsu na ci yotsoi mini ma garula, n tsu mini ma̱ ma̱ɗiya̱ n arikinla a singai a na a ya'in, ko cileme tsu nraɗika, ko ukpan wu nlala ma̱ri u na a lapulai ko ukpan u na a lapulai mayin. 24 Vuza na baci u tuka̱i n kune'e ka azurufa ko iyum ishili, u tuka̱ n kune'e ka u Vuzavaguɗu. Vuza na baci kpamu wi m maɗanga me megele ma na a ku ya'anka ulinga, ka̱ta̱ vuza va u tuka̱. 25 A̱ma̱ci a na e yevei kuya'an tsugbere n ekiye e le a̱ tuka̱ n tsu ɗa, tsugbere tsu mini mu usuni, n tsu mini ma na mo yotsoi mini ma garula, n tsu mini ma̱ ma̱ɗiya̱, n arikinla a singai a na a ca'i. 26 A̱ma̱ci a na e nekei a̱ɗu e le ɗa a cigai kuya'an ulinga n kuyeve ku na i n ku ɗa, ɗa a ya'in tsugbere n cileme tsu nraɗika. 27 Aza e kelime a̱ tuka̱ n atali o onis n atali a na a buwai a singai a singai adama a na a paɗa le a efodu m mabambata ma. 28 Ɗa kpamu a̱ tuka̱i n ucanuku u wali m mani'in ma zaitu adama a̱ ma̱kuni, m mani'in me kerengu n ili i ma̱gula̱ni. 29 Uma a Isaraila ra̱ka̱ ali n a̱ma̱ci aza na i n ka̱ɗu ke kuneke ba̱ri ubuta̱ wu linga u Vuzavaguɗu ɗa a̱ tuka̱i n kune'e ku le ku na ka̱ kuɓa̱nka̱ kuya'an ulinga u Vuzavaguɗu tsu na Musa u danai le a ya'an.

30 Ɗa Musa u danai aza a Isaraila, <<Indanai, Vuzavaguɗu u zagba ta̱ Bezale maku ma̱ Uri vashi vu Horu a kumaci ku Yahuda, 31 ɗa u shatangi ni n ayinviki a̱ Ka̱shile, n kuyeve n ugboji wu ulinga ra̱ka̱, 32 adama a na u ya'an ili n tsuzogu n tsuzogu, u yima kpamu ili ya azanariya, n azurufa, n iyum i shili, 33 ka̱ta̱ u she'we atali a na a kuzuwa a urotu wu utsutsu u kenu, u she'we kpamu maɗanga, wo okpo kpamu Vuza na u yevei ulinga we ekiye. 34 Vuzavaguɗu u neke yi ta̱ Oholiya maku ma Ahisamaka, kumaci ku Dan, adama a na u yotsongusu aza o yoku. 35 Ɗa u shatangi le n kuyeve ku ulinga kakau we ekiye, n kuya'an tsuzogu kpamu kakau, n kuca'a, n igani i kuca'a ke ekiye n tsugbere tsu mini mu usuni, n tsu na ci yotsoi mini ma garula, n tsu mini ma̱ ma̱ɗiya̱, n arikinla a uca'i a singai. I ta̱ n kuyeve ku ulinga we ekiye.>>