2
A kanna ke cindere ɗa Ka̱shile ka uvukai
1 Ɗaɗa kuya'an ku gaɗi n iɗika koɓolo n ili i na yi punu dem ku kotsoi.
2 Kafu a kanna ke cindere ɗa Ka̱shile ko kotsoi ulinga u na u ya'in, ɗa wu uvukai a kanna ke cindere ka adama a ulinga u na u ya'in va.
3 Ɗa Ka̱shile ka zuwakai kanna ke cindere ka una̱singai ɗa u bonokoi ka'a kanna ka ciɗa, adama a na a kanna ka nanlo ka'a Ka̱shile ku uvukai.
Ka̱shile ka ya'in vali n vuka
4 Na va ɗaɗa arabali a tsu na a ya'in gaɗi n iɗika.
Ana Ka̱shile Vuzavaguɗu u ya'in gaɗi n iɗika,
5 babu mita̱ ko yutishi i yoku i na yu uta̱i a iɗika. Adama a na a ayin a nanlo Ka̱shile Vuzavaguɗu babu na u gita̱i kuyo'o mini. Babu vuza na kpamu u kucimba iɗika ya,
6 ama ayin a nanlo iɗika i ɗa i ci jemgbe ka̱ta̱ i ta̱na̱ta̱ngu ubuta̱ dem.
7 Ɗa Ka̱shile Vuzavaguɗu u ma'i ikyamba i vuma n kubuta̱ ki iɗika. Ɗa wu uvula̱ka̱ yi ni ayinviki a wuma a̱ vunu vi ni, ɗa vuma wo okpoi n wuma.
8 Ɗa Ka̱shile Vuzavaguɗu u ya'in kashina ka nɗanga Adini a kasana, ta ɗe u zuwai vuma vu na u ya'in va.
9 Ɗa Ka̱shile Vuzavaguɗu u zuwai icu'u yi nɗanga kakau m gbonguroi punu a kashina ka. Ɗa u zuwai nɗanga n na mi n uga'in u kinda punu n na n kumatsa umaci u singai e mere ma kashina ma, ɗa u zuwai kpamu punu nɗanga n re, me te ma na me kuneke wuma, me te kpamu ma na me kuneke vuza kuyeve ki ili i singai n i gbani-gbani dem.
10 Kuyene kuta̱i a Adini, ɗa ku ne'i kashina ka mini ɗa ku peciki ali ugboku u na̱shi.
11 Kula ku kuyene ku iyain ku ɗaɗa Pishon, ku ɗaɗa ku ci yene a kubana a iɗika i Havila gbende a̱ ubuta̱ u na azanariya i.
12 Azanariya a iɗika i nanlo i ta̱ ciɗa, a̱ta̱mba̱ n atali a singai i ta̱ ɗe feu a̱ ubuta̱ wa.
13 Kuyene ku ire ku ɗaɗa e ci ɗeke Gihon, ku ci yene ta̱ a iɗika i Kushi dem.
14 Kula ku kuyene ku tatsu ku ɗaɗa Tigirisu, ku ci yene ta̱ a kuwala a uɓon u kasana u Asiriya. Kuɗolu ku na̱shi tamkpamu ku ɗaɗa e ci ɗeke Yufiretu.
15 Ɗa Ka̱shile Vuzavaguɗu u zuwai vuma va punu a Kashina ka Adini ka. Adama a na wi inda ka̱ta̱ u cimba ka'a mayin.
16 Ɗa Ka̱shile Vuzavaguɗu u danai ni, <<Vi ta̱ a kufuɗa va lya'a nɗanga n na mi punu a kashina ka dem,
17 sai maɗanga ma na ma kuzuwa vuza u ya'an n kuyeve ki ili i singai n i gbani-gbani ma ɗaɗa va kulya'a ba. Kanna ka na baci vi lya'i ma'a, vi ta̱ a̱ kukuwa̱.>>
18 Ɗa Ka̱shile Vuzavaguɗu u danai, <<U ga'an vuma u yongo ende'en ni ba. Mi ta̱ a kuya'anka yi ka̱ɓa̱nki ka singai.>>
19 N kayala ki iɗika ka'a Ka̱shile Vuzavaguɗu u ya'in nnama n kakamba koɓolo nu nnu n gaɗi dem. Ɗa u tuka̱i le a̱ ubuta̱ u vuma adama a na we ene ko nini ɗai u kuɗeke le, tsu na baci de dem u ɗekei manama ɗa ta na u kokpo kula ku ni.
20 Ɗa vuma va u ne'i nnama nu nnu n gaɗi ra̱ka̱ ula.
Ama A̱da̱mu u ciya̱ punu ka̱ɓa̱nki ka na ka ya'in ni ba.
21 Ɗa Ka̱shile Vuzavaguɗu u zuwai vuma va alavu a na a̱ kuwa̱i ni. Ayin a na wi alavu, ɗa u talai ketele ka kakambu ka vali ka, ɗa u bonoi u palai ubuta̱ wa n inyama.
22 Ɗa Ka̱shile Vuzavaguɗu u ya'in vuka n ketele ka na u talai va, ɗa u bankai vuma va.
23 Ɗa vuma va vu danai,
<<Na va ɗaɗa ketele ka na kuta̱i wa̱ va̱,
n inyama i na yu uta̱i wa̱ va̱.
Kula ku ni ku ɗa <vuka>
adama a na ta punu a̱ uta̱ka̱i ni u vali.>>
24 I ɗaɗa i zuwai ɗa vuma u kuka̱sukpa̱ a̱na̱ku a̱ ni n esheku, adama a na u ɓolongu ka̱ci ka̱ ni a̱ ubuta̱ u te n vuka vi ni, ka̱ta̱ o okpo ikyamba i te.
25 Vali va n vuka vi ni dem oshomboɗi a ɗa i, ama babu vuza na u panai wono u vutoku.