41
Isufu u danai alatani ana mogono ma ya'ain
1 Ana a̱ya̱ e re a lazai ɗa Mogono Firi'auna ma ya'in alatani a na wi a kashani o kuɗolu ku Nilu,
2 ɗa anaka a singai e cindere a̱ uta̱i punu o kuɗolu ku Nilu ka ɗa a̱ ka̱na̱i kalina.
3 Ɗa kpamu anaka e cindere a gbanigbani ayambishi ɗa a̱ uta̱i punu e kuyene ku Nilu ɗa a shamgbai lo a̱ kucina ka aza a singai a.
4 Anaka a gbani-gbani n ayambishi a takumai aza a gbaga n ikyamba. Ɗa Firi'auna u jimgbai.
5 Ɗa u doku u latai kpamu, ɗa u doku u ya'ansai alatani o yoku. Arata ilya kpamu a kakungu ke te, arata kpamu e cindere a singai uta̱ kpamu punu a̱ ubuta̱ u te.
6 Lo kpamu a̱ kucina̱ ka ɗa arata e cindere a̱ uta̱i avavau aza ana wunla̱i u kasana warai le.
7 Ɗa avavau a o soɗongi arata a singai a. Ɗa Firi'auna u rikpa̱i, ashe alatani a ɗa yi.
8 N usana ɗa ka̱ɗu ko mogono ka̱ na̱mgba̱i, ɗa u suki e ɗeke yi oboci n aza ugboji a Masar. Adama a na a dana yi alatani a ama babu vuza na u fuɗai u danai ni a ɗa.
9 Ɗa kagbashi ko mogono ka ka danai ni, <<N ciɓa ta̱ n unushi u va̱ anana.
10 Firi'auna vu sa'wa ta̱ kuya'an wupa n kagbashi ka̱ nu vuza na u ci ya'anka wu boroji punu a kpa'a ku ugbashi.
11 A̱ tsu aza e re a̱ tsu ci ya'in alatani, alatani a̱ tsu kpamu i ta̱ a kudansa ili kakau.
12 Punu a ugbashi wa vuza va aza a Ibirahi wi ta̱ punu n a̱ tsu, kagbashi ko kosoji ka gbayin ki ta̱ punu feu. Ɗa tsu danai ni alatani a̱ tsu, ɗa u danai tsu ko yi ɗa̱i alatani a i a kudana.
13 Uteku u na u danai tsu, ta tana ili ya yo okpoi nannai. Mpa ɗa o bonokoi mu a̱ ubuta̱ wu ulinga u va̱, vuza te kpamu vuza na u tsu kangalaka mogono boroji ɗa a unai ni.>>
14 Ɗa mogono ma zuwai ɗa a̱ utuka̱i n Isufu a̱ kunu ku ugbashi uta̱ka̱i ni ubuta̱ ma lo. Ana a punai ni ɗa a saba'i ni ntogu, ɗa u banai e kelime ka Firi'auna.
15 Ɗa Firi'auna u danai Isufu, <<N ya'an ta̱ alatani. Babu vuza na kpamu u fuɗai u danai mu a ɗa. Ama m pana ta̱ a dana vu tsu dana ta̱ uma alatani e le. I ɗa i zuwai ɗa n ɗekei nu.>>
16 Ɗa Isufu u danai ni, <<Mpa mi a kufuɗa ba. Ama Ka̱shile ki ta̱ e kuneke Firi'auna wu ushuki u singai.>>
17 Ɗa Firi'auna u danai Isufu, <<Alatani a ɗa na: Mpa, mi ta̱ a kashani a̱ ka̱kina̱ ke Kuyene ku Nilu.
18 Punu a̱ mini ma, ɗa anaka e cindere a̱ uta̱i punu a̱ mini ma. Aza a ikyamba molu-molu, ɗa a̱ ka̱na̱i lo kalina a̱ ubuta̱ wi ijanu, i na yi lo va.
19 Ana i lo kpamu, ɗa anaka e cindere o yoku o doku ɗa a̱ uta̱i ayambishi, babu kpamu tsuloboi. Mpa ta na ka̱ta̱ n sa'wa kene icu'u ya anaka i nanlo punu na Masar ba.
20 Ɗaɗa ayambishi a anaka a gbani-gbani a, ɗa a takumai anaka a ikyamba a dem.
21 Ko a na a takumai aza a ikyamba a okpoi adanshi a takuma ili ba, i ta̱ lo n una̱mgbi u le tsu na ishi cau. Ɗaɗa n jimgbai.
22 Punu a alatani a̱ va̱ a kpamu me ene ta̱ arata a ilya e cindere a singai. Ɗa kpamu i a kakungu ke te.
23 Ɗa kpamu arata a ilya o yoku e cindere a̱ uta̱i. Avavau a alumbushi kpamu, aza a na wunla̱i u kasana wi ɗe o ko'uso.
24 Ɗa avavau a o soɗongi arata a ilya a singai a. N danai oboci ukuna u nampa, ama babu vuza na u fuɗai u yevekei mu ukuna wa.>>
25 Ɗa Isufu u danai Firi'auna, <<Alatani a̱ nu icu'u i te ɗa ra̱ka̱. Ka̱shile ka'a ko yotsongi nu ili i na yi lo a̱ kuta̱wa̱.
26 Anaka a ikyamba a singai a ɗaɗa a̱ya̱ e cindere a singai arata e cindere kpamu ɗaɗa a̱ya̱ a singai e cindere kpamu. Alatani a i ta̱ a kadanshi ki ili i te dem.
27 Ayambishi a anaka e cindere kpamu an na uta̱i punu e kuyene ka n avavau e cindere a na wunla̱i u kasana warai ita̱ a kadanshi ka̱ a̱ya̱ e cindere feu a kambulu.
28 Ta ka'a ki nannai Ka̱shile ko yotsongu ta̱ Firi'auna i na yi lo a̱ kuta̱wa̱.
29 A̱ya̱ e cindere i ta̱ lo a̱ kuta̱wa̱, a na yaba dem u kuciya̱ ili i kulya'a na Masar.
30 Ama feu a̱ya̱ e cindere a kambulu i ta̱ lo a̱ kuta̱wa̱. Uma kpamu i ta̱ a kucinukpa n uciyi u na wishi lo dem. Punu na Masar, kambulu kpamu ki ta̱ a̱ kuka̱ra̱'a̱ iɗika ya dem.
31 Wi ta̱ o kokpo adanshi ka̱ta̱ ishi a sa'wa kuciya̱ ilikulya'a ba, adama a na kambulu ka ki ta̱ a kuyimkpa ka̱u.
32 Ili i na i zuwai ɗa alatani a uta̱i ku re ɗaɗa, kadanshi ka̱ Ka̱shile ka'a ko foɓusoi ka'a n ka̱ci ka̱ ni, Ka̱shile kpamu ki ta̱ a kuya'an ka'a m megeshe ba.
33 <<Gogo na u ga'an ta̱ Firi'auna u la̱nsa̱ vuza vu ugboji n cico'o, vuza na u yevei kalyalya'i, ka̱ta̱ u zuwa yi u la̱na̱ iɗika i Masar.
34 Ya'an Firi'auna u zuwa aza a na a kinda iɗika. A ɗika kpamu ili i re a̱ ka̱tsuma̱ ki ili kupa i na uma a Masar a kya'i dem a̱ ka̱tsuma̱ ka̱ a̱ya̱ e cindere a nanlo adama a na o foɓo.
35 Ya'an uma o ɓolongu ilikulya'a a̱ ka̱tsuma̱ ka̱ a̱ya̱ e cindere a singai a nampa a na i lo a̱ kuta̱wa̱, ka̱ta̱ o foɓo ilikulya'a ya nu utsura u mogono Firi'auna, a zuwa i ɗa a̱ likuci i gbagba'in yi iɗika ya.
36 Ilikulya'a i nanlo kpamu a zuwa i ɗa adama a iɗika i Masar. Adama a na uma e pece ka̱ta̱ kambulu ka̱ a̱ya̱ e cindere ka kuna le dem ba.>>
A zuwai Isufu wo okpo gomuna vi iɗika i Masar
37 Kadanshi ka nanlo kpamu ka zuwa ta̱ Firi'auna n abara a̱ ni a̱ ushuku n kadanshi ka.
38 Ɗa we ecei le, <<Ci ta̱ a kufuɗa tsa̱ ciya̱ vuza tsu nampa vuza na kpamu u la'i ni? Vuma vu nampa kpamu wi ta̱ n ayinviki a̱ Ka̱shile.>>
39 Ɗa mogono Firi'auna u danai Isufu, <<Ci ta̱ a kufuɗa tsa̱ ciya̱ vuma vu na ayinviki a̱ Ka̱shile ki n a̱ya̱ nahannai? Babu vuza na u yawai nu ugboji n cico'o tsu nu.
40 Avu ɗa vo kokpo vuzagbayin vu kefeku ko tsugono ka̱ va̱, uma a̱ va̱ kpamu i ta̱ e kuneke wu tsugbayin. Ili i na n kula'aka wu i ɗaɗa kakuba ku tsugono ka̱ va̱.>>
41 Ɗa Firi'auna u danai Isufu, <<Gogo na n zuwa wu ta̱ vo okpo vuza na u kula̱na̱ iɗika i Masar.>>
42 Ɗa Firi'auna u foɗoi makawani a̱ ka̱jivu ka̱ ni ɗa u ukai a̱ ka̱jivu ka̱ Isufu. Ɗa u ukai ni aminya a na a ya'in n arikinla a singai ɗa u ukai ni idolu ya azanariya e kuɗeku ku ni.
43 Ɗa Firi'auna u zuwai Isufu u kumba keke vo odoku vi ni wo okpoi an mogono me i re a iɗika i Masar Ɗa a̱duga̱ri o mogono a̱ ka̱na̱i kusala, <<Nekei uye.>> Ta a zuwai Isufu wo okpoi gomuna vu Masar nannai.
44 Ɗa Firi'auna u danai Isufu,
<<Mpa ɗa mogono, ama koɓolo n kadanshi ka̱ nu ka'a baci ba babu vuza na u kuɗa̱ngusa̱ kukiye ka̱ta̱ u ya'an ili na a iɗika i Masar.>>
45 Ɗa Firi'auna u ne'i Isufu kula Zafinatu Peniya ɗa u nekei ni Asenatu mekere ma Potifera ganu vu Onu wo okpo yi vuka. Isufu ta na wo okpoi vuza vu utsura a iɗika i Masar dem.
46 Ayin a nanlo Isufu wi ta̱ n a̱ya̱ kamangankupa (30), ana u uwai ulinga n Firi'auna a iɗika i Masar. Ɗa Isufu wu uta̱i u Firi'auna, ɗa u ka̱ra̱'i iɗika i Masar dem.
47 A̱ ka̱tsuma̱ ka̱ya̱ e cindere a nanlo ɗa ubuta̱ dem u matsai ili n a̱bunda̱i.
48 Ɗa Isufu u ka̱na̱i ki isa ilikulya n u zuwai a̱ ka̱tsuma̱ ka̱ a̱ya̱ e cindere a nanlo a̱ likuci i gbagba'in i Masar. Likuci dem ɗa u zuwa a zuwai ilikulya'a ya a ashina a na i uka̱ra̱'i u likuci ya.
49 Ta Isufu u zuwai ilikulya'a nannai n a̱bunda̱i i ɗa i yimkpa ta̱ ali ɗa u ta̱wa̱i u ka̱sukpa̱i kukuzuku i ɗa adama a na i la'a ta̱ kukunzuku.
50 Kafu a̱ya̱ e cindere a nanlo a yawa a matsaka ta̱ Isufu muku mo olobo n re aza a na Asenatu mekere ma Potifera ganu vu Onu u matsakai ni.
51 Ɗa Isufu u ne'i maku ma̱ ni kula Manasa (Ncinukpa) adama a na u dansa ta̱ n ka̱ɗu ka̱ ni, <<Ka̱shile ka zuwa mu ta̱ ɗa n cinukpai n atakaci a̱va̱ dem n a kpa'a ke esheku a̱va̱.>>
52 Maku me ire u ne'i ni kula Ifirayimu adama a na u dana ta̱ a̱ ka̱ɗu ka̱ ni <<Ka̱shile ke neke mu ta̱ muku a iɗika i na n takacikai.>> (Akungusan).
53 Ayin a̱ ucuwi a iɗika i Masar o kotsoi.
54 Ɗa a̱ya̱ a kambulu a̱ gita̱i ku'uwa uteku tsu na Isufu u danai va. A̱ ubuta̱ u na u buwai dem, u ɗa wi ta̱ n kambulu ka gbayin. Ama a iɗika i Masar utalu wi ta̱ ɗe.
55 Ana kambulu ka̱ yikpa̱i a iɗika ɗa uma a̱ shi'ika̱i Firi'auna. Ɗa Firi'auna u danai le a bana u Isufu i na baci u danai le dem a ya'an.
56 Ana kambulu ka̱ ka̱ra̱'i iɗika dem ɗa Isufu u zuwai a̱ ɓa̱yuwa̱ mpon ma adama a na e denke aza Masar ilikulya.
57 Uma n a̱bunda̱i a aduniyan a banai Masar adama ana a tsula ilikulya'a e ekiye a̱ Isufu, adama a na kambulu ka ka yimkpa ta̱ a aduniyan.