10
Afada a Vuzavaguɗu a kubana wa aza a Isaraila
1 Aza a Isaraila i ta̱ tsu maɗanga mi itacishi,
ma na ma tsu neke umaci n a̱bunda̱i.
a makyan ma na muku n le mi o kudoku,
Ta feu atali alyuka a̱ma̱li e le o kudokusu nannai.
a makya'a ma na uciyi wi iɗika i le wi o kudoku n ka̱bunda̱i,
ta feu tsuloboi tsu katalikalyuka ka ki a kuyimkpa nannai.
2 A̱ɗu e le e pecei kure,
ama gogo na mayun ɗa a isa atakaci a unushi u le.
Vuzavaguɗu wi ta̱ o kuɓososo atali alyuka ele ra̱ka̱
ka̱ ta̱ kpamu u la̱nga̱sa̱ atali a na a tsu ya'an ka alyuka.
3 Gogo na i ta̱ a kudana, <<Tsu buwa n mogono ba,
adama a na tsu pana wovon u Vuzavaguɗu ba.
Ko cishi baci n mogono,
ama yiɗa̱i mogono mi a kufuɗa kuya'an ka tsu?>>
4 Motonu ma'an koci i a kuya'an,
a kuya'an a uzuwakpani wa a'uwa,
adama a nannai afada a'uwa a̱ ka̱na̱i kuɗa̱nga̱,
tsu mita̱ ma gbani-gbani mo tsukono a kashina.
5 Aza a na i a ida̱shi a Samariya e je'ekei ikyamba adama o wovon,
adama a̱ ka̱ma̱li ke medendem ma Betu-avin,
uma i ta̱ a kuya'an kpalu adama a̱ ni.
anan ganu vu ka̱ma̱li va, i ta̱ a̱ ku na̱mgba̱, ka̱tsuma̱ adama a̱ ni,
adama a na tsugbayin tsu ka̱ma̱li ka tsu ka̱sukpa̱ yi ta̱.
6 I ta̱ a kubanka m medendem ma Asiriya
adama a na a tsupaka mogono ma gbayin utafu.
I ta̱ e kuneke Ifiraimu wono,
Aza a Isaraila tana i ta̱ a kupana wono, adama odoki a na o tonoi.
7 Mogono ma aza a Samariya mi ta̱ a̱ ku puwa̱nka̱,
tsu kapufu a gaɗi vu mini.
8 Ubuta̱ wa avasa a gaɗi vu aginda a Avin,
a uɓon u na aza a Isaraila a tsu ya'an unushi,
ra̱ka̱ i ta̱ o kuɓoso le,
Awana i ta̱ o ku gbonguro a gaɗi vu atali alyuka ele,
Uma i ta̱ a kudana nsasan m gbagba'in ma, <<palai tsu,>>
wa nsasan n kenke'en kpamu, <<Yikpa̱i a gaɗi vu tsu>>
Vuzavaguɗu u kiɗaka ta̱ aza a Isaraila afada.
9 Vuzavaguɗu u danai, ali a̱ ugiti wu unushi u ɗa̱ a Gibiya,
i ka̱sukpa̱ ba
kuvon tana ki ta̱ a kulya'a le a Gibiya?
10 Mi ta̱ a kutakacika uma a nanlo aza a unushi,
ka̱ ta̱ o ɓolongu uduniyan a ya'an tsurala n e le,
i ta̱ a kutakacika ɗa̱ adama a unushi wa̱ a̱bunda̱i u ɗa̱.
11 Kumaci ka aza a Ifiraimu ki ta̱ tsu kanaka ka na a pi'isakai kunima,
ka na kpamu ka tsu pana uyo'o u kuya'an kuyelyukpu.
gogo na n zuwaka ta̱ Isaraila kogboro ka̱ a̱miki e kuɗeku ku singai ku ni.
n zuwai kumaci ku Yahuda ku rono ma̱ba̱ri ma kulima.
kumaci ku Yakubu tankpamu ki ta̱ a kucimba ka ka̱ci ka̱ ni.
12 Ya'ankai ka̱ci ka̱ ɗa̱ vica̱'a̱ vu singai,
ka̱ ta̱ i kya'a ili i na i cigai,
adama a na makyan ma kula̱nsa̱ Vuzavaguɗu ma yawa ta̱,
adama a na u ta̱wa̱ u tsuwa̱nka̱ tsu una̱singai.
13 Ama ɗa i kucukpai i ca̱'i kawuya,
ɗa kpamu i kya'i kawuya,
i lya'i katsupu ka a'uwa.
Adama a na i neke ta̱ a̱ɗu a uye u ka̱ci ka̱ ɗa̱,
koɓolo kpamu n ka̱bunda̱i ko ovonshi a̱ ɗa̱.
14 Adama a nannai yoroli i kuvon yi ta̱ a̱ kuɗa̱nga̱ a̱ ka̱tsuma̱ ka uma a̱ nu,
a̱ likuci yi ukanji i ɗa̱ ra̱ka̱, i ta̱ o kuɓoso le.
uteku tsu na Shalmanezer wu unai Betarbel a kanna ka kuvon,
ɗa kpamu u ɓasangi aci a̱ma̱ci koɓolo n a̱ muku a iɗika.
15 Ta feu a kuya'anka ɗa̱ nannai, A̱ɗa̱ aza e Betelu,
adama a ka gbani-gbani ka̱ a̱bunda̱i ka̱ ɗa̱.
n ugiti u kuvon i ta̱ a ku una mogono mi Israila.