1 Ili i na aza a Isaraila a uɓon u gaɗi i a kuya'an, yo okpo ta̱ gbani a na aza a na i a kuguɓa wunla̱i i o kutono wunla̱i u kasana kulivi dem. I o kudoku kuya'an a'uwa n vishili, ɗa a zuwai uzuwakpani n iɗika i Asiriya, i kpamu a kubansuka n mani'in ma zaitu a iɗika i Masar. 2 Vuzavaguɗu wi ta̱ n kadanshi adama uma a Yahuda, wi ta̱ a kutakacika aza a Isaraila adama a uye u le, wi ta̱ a kutsupa le derere tsu ulinga u na a ya'in. 3 Babu na tana a matsa akaya e le Yakubu, u ka̱na̱i ka̱civa̱ ka̱ vuza̱ ni, makyan ma na u gbonguroi ɗa u ya'in mpolo n Ka̱shile. 4 Yakubu u ya'an ta̱ mpolo n kalingata ɗa u ciya̱i ulya'i. U ya'in ma̱shi ma̱ kula̱nsa̱ una̱singai, u kalingata. Vuzavaguɗu u cinai ni e Betelu, taɗe u ya'in kadanshi n a̱yi. 5 Vuzavaguɗu Ka̱shile Mala'imili, Vuzavaguɗu ɗa kula kuni. 6 Adama a nannai, i bono u Ka̱shile ka̱ ɗa̱. I ciga yi, i ya'an a fada a mayun, i zuwa a̱ɗu a̱ ɗa̱ u Ka̱shile ka̱ ɗa̱ ayin dem. 7 Vuzavaguɗu u danai, <<Aza a tsulaga a tsu ya'an ta̱ u linga n kagisamkpatsu ka a'uwa, ɗa kpamu i ucigi u kuya'an kalya'a. 8 Aza a Isaraila a uɓon u gaɗi a danai, gogo na ci ta̱ n uciyi. Tsu ciya̱ka̱ ta̱ ka̱ci ka̱tsu uciyi. A̱ ka̱tsuma̱ ku uciyi u tsu ra̱ka̱, a̱ kuciya̱ tsu n ka gbani-gbani ba, ana a kudana tsu ya'an ta̱ unushi ba. 9 Mpa Vuzavaguɗu mpa ɗa Ka̱shile ka̱ ɗa̱, ali ɗe a iɗika i Masar, mi ta̱ o kudoku ku zuwa ɗa̱ i da̱sa̱ngu a uye, uteku tsu na i ya'in, a ayin a ka̱ɗiva̱ ka na a zuwakai ɗa̱. 10 N ya'ankai ɗa̱ kadanshi n una̱ u eneki, Mpa ɗa n nekei eneki a ya'in kene n a̱bunda̱i, ɗa n nekei ɗa̱ kadanshi n asan.>> 11 Ko n tsu nannai dem a Giliyadu ka̱ma̱li ki ta̱ ɗe, ama kutoni ku ɗa̱ ku gbani ku ɗa. Ɗe a Giliga i ci ya'an ta̱ alyuka obomburom, ama atali alyuka a̱ɗa̱, i ta̱ a kutaɗuku su le a̱ ka̱pula̱ka̱. 12 Akaya a̱ tsu Yakubu u sumai a kubana a iɗika i Siriya, ta ɗe a̱yi u ya'in tsugbashi tsu kula̱nsa̱ vuka u zuwa, adama a na u ciya̱ vuka, u ya'in kaguɓa ka nlala. 13 Nu utsura u kukiye ku keneki, Vuzavaguɗu wu utuka̱i aza a Isaraila a Masar, n kukiye ku keneki kpamu ɗa we erei le. 14 Ɗa aza a Isaraila a zuwai Ka̱shila̱ ka ya'in wupa ka̱u, Vuzavaguɗu wi ta̱ n katsupu adama a unushi u le, n wono u na a̱ tsunki ni.