14
Ufolu u kubono u Vuzavaguɗu
A̱ɗa̱ uma a Isaraila, bonoi a̱ ubuta̱ u Vuzavaguɗu Ka̱shile ka̱ ɗa̱,
adama a na unushi u ɗa̱ u zuwa ɗa̱ ta̱ ma̱ta̱ɗa̱.
Bonoi u Vuzavaguɗu n kadanshi,
i folono yi, <<Cinukpaka tsu unushi u tsu,
isa tsu adama a kasingai ka̱ nu,
a̱tsu ci ta̱ a kucikpa wu nu una̱ u tsu.
Aza Asiriya a kufuɗa ku isa tsu ba,
ci kpamu a kuzuwa a̱ɗu odoku o kuvon ba.
ko tsu dana a̱ma̱li,
a̱ɗa̱ ɗa Ka̱shile ka̱ tsu,
adama a na wa̱ a̱ nu u ɗa makpa'an ma tsu ciya̱ kasingai.
Vuzavaguɗu u danai,
mi ta̱ a kucinukpa ka le unushi u le,
Mi ta̱ a kuciga le n ka̱ɗu ka̱va̱ ba̱ri,
adama a na wupa u va̱ we ele u vaku ta̱.
Mi ta̱ o kokpo tsu ciza wa aza a Isaraila,
i ta̱ a kulya'a kelime tsu apulufa,
i ta̱ a kuya'an aralu tsu nɗanga n gbagba'in n Sida a Lebano. Acaka e le i ta̱ a kutatsa,
uga'in u le wi ta̱ o ko okpo tsu nɗanga n Zaitu,
i ta̱ a kuya'an ma̱gula̱ni,
tsu nɗanga n Sida a Lebano.
I ta̱ o kubono a̱ da̱sa̱ngu a̱ kulu ku le,
i ta̱ a kucimba ishina n a̱bunda̱i,
i ta̱ a kuya'an a̱pa̱lu tsu kashina ki itacishi.
Ma̱gula̱ni me ele mi ta̱ a̱ ku uta̱ kula tsu ma̱kya̱n a Lebano. Aza a Ifirayimu i ta̱ a kudana,
yiɗa̱i i burai tsu n a̱ma̱li?
Adama a na mpa Ka̱shile ke le ka'a,
mpa ɗa n kupana ka le, n zuwaka le una̱singai.
tsu nɗanga ma̱ a̱vuku m a̱bunda̱i a makyan dem,
ta feu mpa Vuzavaguɗu n kuzuwa le a yimkpa nannai,
mpa ɗa kumi'i ku una̱singai u le.>>
Yayi wi n ugboji?
Ya'an u yeve ili nampa ya,
Yayi wi n kuyeve?
Ya'an u yeve i ɗa.
Adama a na uye u Vuzavaguɗu derere ɗa u ɗa wi,
aza a kamayun a̱ ka̱ɗu, a ci ya'an ta̱ nwalu a uye wa n ma̱ta̱na̱,
ama aza a unushi wu ucigi u ka̱ɗu, a̱ tsu ta̱ɗa̱tsa̱ ta̱ we ele.